Presidente Aquino mibisita sa haya sa mga sundalong marines nga namatay sa enkuwentro sa Sulu tali sa grupong Abu Sayyaf

Ni Claro A. Lanipa

PAGADIAN CITY, 29 May (PIA) – Mibisita si Presidente Benigno S. Aquino III ang haya sa pito ka mga Marines kinsa namatay sa Sulu ning  Sabado human sa nahitabong panag-enkuwentro tali  sa mga miyembro sa Abu Sayyaf Group (ASG).

Sa iyang pagbisita sa Philippine Marines Headquarters sa Fort Bonifacio, ang Presidente mitunol sa hinabang pinansyal  ngadto sa pamilya sa mga sundalo nga mikantidad sa P250,000 matag usa.

Matod pa sa Armadong Kusog sa Pilipinas (AFP) ang mga sundalo gikan sa 2^nd Marine Brigade, samtang ilang gigukod ang grupo sa Abu Sayyaf nga gitoohan naghupot sa asawa sa usa ka sundalong marine, naka-enkuwentro sila sa dakong grupo sa mga miyembro niini sa may alas 6:30 sa buntag, Sabado sa Tupay, Patikul, Sulu.

Ang pagbayloay sa bala milungtad sa kapin sa usa ka oras diin pito sa mga sundalong Marines, lakip ang usa ka tenyente ug siyam ka mga teroristang Abu Sayyaf ang namatay. Siyam ka mga marines ug napulo ka mga miyembro sa Abu Sayyaf ang nasamdan usab.

Dugtong pa sa AFP ang mga terorista mibiya human sa enkuwentro ug ang militar naglusad sa pursuit operations batok sa maong grupo.

Ang militar nagtaho nga mga helicopters ang gipadala aron sa pagbakwit sa mga sundalong samaran ug gihatod sa balay tambalanan sa Jolo, Sulu.

Ang mga sundalo nga naglambigit sa maong insidente nagpahigayon sa gitawag “route security” sa diha nahitabo ang panag-enkuwentro sukwahi kini sa unang taho sa kapulisan nga matod pa ang mga sundalo gi-ambush.

Ang  Abu Sayyaf, gitukod sa 1990s, ug nagpahigayon sa mga dakong pag-atake lakip ang pagdagit sa mga langyaw tawo. Ang grupo responsable usab sa mga nahitabong pagpamomba.

Gibanana sa militar ang ginsakupan niini mikabat sa 300, kasagaran nagbase sa habagatang bahin sa mga probinsya sa Pilipinas kon sa Sulu ug Basilan. (PND/CAL/PIA9)