Pilipinas ug Malaysia nagkauyon pagpalig-on sa ilang relasyon

Ni Alfonso T. Ruda

DIPOLOG CITY, OCT. 16(PIA)---Ang Pilipinas ug Malaysia nagkauyon nga labi pang lig-onon ang ilang relasyon sa natad sa turismo, edukasyon, kultura, panglawas, teknolohiya sa impormasyon, labor ug anti-trafficking.

Ang kasabutan nakab-ot dihang gipahigayon ang bilateral meeting sa Malakanyang niadtong Lunes nila ni Presidente Benigno S. Aquino III ug Malaysian Prime Minister Dato Sri Mohd Najib Bin Tun Abdul Razak, kinsa ania sa nasod sa usa ka opisyal nga pagbisita.

Sa pahayag nga giluwatan human sa ilang miting, ang duha ka lider nagkauyon nga labi pang lig-onon ang dynamic ug protective partnership sa duha ka nasod pinaagi sa (1) Pagpahimulos sa Philippines-Malaysia Joint Commission Meeting aron molahutay ang momentum sa ilang partnership; (2) pagpahigayon ug regular nga investment forum; (3) pagbinayloay ug trade ug investment missions; (4) pagpadali sa negosasyon sa gisugyot nga kasabutan sa pagtinabangay.

Si Primero Ministro Najib nahidangat sa Manila niadtong Dominggo para sa iyang Opisyal nga pagbisita sa nasod gikan sa Oktubre 14 hangtud sa Oktubre 16. Kauban niya sa iyang delegasyon ang iyang asawa nga si Madam Datin Paduka Sri Rosmah Mansor.

Si Primero Ministro Najib ania sa nasod aron saksihan ang makasaysayanong pagpirma sa Framework Agreement tali sa Pilipinas ug Moro Islamic Liberation Front isip third-country facilitator.

Gipahalipayan ni Najib si Presidente Benigno Aquino III uban ang pagpasalig nga padayong suportahan sa  Malaysia ang nagpadayong negosasyon sa kalinaw ug ang implementasyon sa Framework Agreement.

Sa iyang bahin, gipasalamatan usab ni Presidente Aquino si Primero Ministro Najib sa suportang gilugway niini isip facilitator sa nagpadayong negosasyon sa kalinaw tali sa gobyerno ug MILF sukad niadtong 2001 ug sa ilang pagpangulo sa International Monitoring Team sukad niadtong 2004. (ATR/PCOO/PIA9-Zambo Norte)

Aquino nag-awhag sa mga opisyal ug kawani sa kagamhanan , GOCCs ug LGUs nga aktibo mosuporta pagsaulog sa Climate Change Consciousness Week sa Nobyembre

Ni Gideon C. Corgue

PAGADIAN CITY, October 15 (PIA) – Si Presidente Benigno S. Aquino III nag-awhag sa tanang mga opisyal ug kawani sa kagamahanan lakip na ang Government-Owned and Controlled Corporations (GOCCs), ug local government units (LGUs) nga aktibo nga mosuporta sa Climate Change Consciousness Week gikan sa Nobyembre 19-25, ning tuiga.

Ang Hepe ehekutibo mipakanaog sa dikretiba tubay sa Memorandum Circular No. 35 serye sa tuig 2012 nga gipirmahan Executive Secretary Paquito N. Ochoa Jr. ning nakalabay nga Agusto 14.

Ang Proclamation No. 1667  serye sa tuig  2008 nagdeklarar sa Nobyembre  19-25, 2008 ug matag tuig isip Global Warming and Climate Change Consciousness Week.

Ang proklamasyon nagtumong aron pagmugna ug kasayuran mahitungod sa global warming ug climate change pinaagi sa halapad nga impormasyon ug educational campaigns. 

Ang nasangpit nga proklamasyon nagtinguha sa hiniusa nga kooperasyon sa tanang mga katawhan ingon man ang hiniusa nga aksyon sa mga pribado ug publiko nga sektor aron pagpangita ug solusyon sa mga hulga sa pagkausab sa klima" 

Ang Climate Change Commission (CCC) mangulo pagsaulog sa Climate Change Consciousness Week uban pag-abag sa Cabinet Cluster sa Climate Change Adaptation and Mitigation (CCAM).

"Ang tanang mga opisyal ug mga kawani sa government agencies and instrumentalities, lakip na ang GOCCs ug LGUs, ang gimandoan nga aktibo nga mosalmot ug mosuporta sa awareness campaign," matud pa sa Presidente. 

Ang hepe ehetubibo mimando sa Presidential Communications Operations Office (PCOO) ug Philippine Information Agency (PIA) nga motanyag ug mga mahinungdanon nga pagbulig sa  media sa maong kalihokan. 

Ang mga buhatan sa kagamhanan gi-awhag nga magpahigayon ug susama nga mga kalihokan atol sa among semana. 

Sa nakalabay nga Agusto, si Presidente Aquino mitimaan sa pagkabalaod sa People's Survival Fund Bill aron pagahimo sa kagamhanan nga epektibo nga mosulbad sa suliran sa Climate Change.

Ang People's Survival Fund Law giusab ngadto sa Climate Change Act of 2009 pinaagi pagtukod sa People's Survival Fund nga adunay pasiuna nga P1 bilyon matag tuig. (GCC/PCOO/PIA9-ZamboSur)