Ni Claro A. Lanipa
PAGADIAN CITY, 18 July (PIA) – Si Presidente Benigno S.
Aquino III nagtudlo sa bag-ong mga opisyales sa nagkalain-laing ahensiya sa
kagamhanan, matod pa sa usa ka opisyal sa Palasyo.
Si Presidential Spokesperson Edwin Lacierda mipahibalo
sa mga natudlo atol sa regular press briefing didto sa Malakanyang ning
Miyerkoles.
Si Lacierda miingon, ang Hepe Ehekutibo mipirma
niadtong Julyo 11, ang appointment letter ni kanhing Land Transportation
Franchising and Regulatory Board Chairman Nelson Pena Laluces isip Deputy
Director General sa Intellectual Property Office of the Philippines nga ubos sa
Department of Trade and Industry (DTI).
Si Laluces mihulip kang Andrew Michael Ong. Ang iyang
termino sa maong buhatan molungtad hangtod Disyembre 31, 2017.
Si Laluces nakatrabaho isip partner sa Ligon Solis
Mejia Florendo Law Firm sukad Enero ning tuig hangtod siya natudlo karon.
Nakatrabaho usab siya isip partner sa Rodriguez Laluces
Ecarma & Dias Law Offices gikan Nobyembre 2011 hangtod Oktubre 2012 ug 2000
hangtod Septyembre 2010. Nahimo usab siya LTFRB chairman gikan sa Septyembre 2010 hangtod Septyembre
2011 ug naghupot usab ug mga puwesto sa
Department of Tourism gikan sa 1995-2000.
Gitudlo usab ni Presidente Aquino ning Julyo 11 si Dr.
Ray Roderos isip Assistant Director General sa National Security Council, hulip
kang Fernando Mesa. Ang iyang termino co-terminus uban sa nagtudlo kaniya.
Si Roderos migraduwar sa Philippine Military Academy
(PMA batch 1975), ug nakahupot sa nagkalain-laing posisyon sa Philippine
National Police (PNP).
Sa susamang higayon gitudlo usab sa Presidente si Romeo
Fajardo ug Honorato delos Reyes isip Acting Director III ug Acting Director II,
sa Office of Civil Defense (OCD) ubos sa Department of National Defense (DND).
(PCOO/CAL/PIA9)