Pres. Aquino mibisita ug pasyente sa kanser sa bukog sa iyang adlawng natawhan

Ni Alfonso T. Ruda

DIPOLOG CITY, FEB. 9(PIA)---Si Presidente Benigno Aquino III mibisita ug pasyente sa kanser sa bukog sa usa ka tambalanan sa dakbayan sa Quezon sa pagsaulog sa iyang ika53 ka tuig nga adlawng natawhan.

Sa press briefing sa Malakanyang, gipahayag ni Presidential Communication Development and Strategic Planning Office Secretary Ricky Carandang nga gisugdan ni Presidente Aquino ang iyang adlaw pinaagi sa pagbisita sa batang si Jericho Rafols didto sa Philippine Orthopedic Center.

“Basig matingala mo ug unsay nahitabo rong buntag, mibisita ang Presidente  sa-batang si Jericho Rafols-usa ka 15 anyos nga batang dunay sakit nga kanser sa bukog sa Philippine Orthopedic Center,” matod pa ni Carandang.

“Mao kini ang pangandoy ni Jericho nga makita ang Presidente. Busa gikuhaan sa Presidente ug oras ang iyang schedule. Duna usab siyay miting sa Philippine Management Staff, busa iyang gikuhaan ang iyang schedule aron makagahin ug panahon para motimbaya sa bata,” matod pa ni Carandang.

 Sa usa ka pakighinabi didto sa Davos, ang Hepe Ehikutibo nagkanayon nga gusto niyang simple lang ang iyang adlawng natawhan pinaagi sa pagsaulog niini uban sa iyang pamilya ug mga higala.

“Basig matingala mo kon kinsa na ang nakatimbaya sa Pangulo? Tug-anan ko kamo  nga kini ang Presidential Security Group. Ang PSG mipahalipay sa Presidente pagsugod sa iyang adlaw. Sanglit sila man ang dunay kahigayonan kaniya, sila ang unang nakapahalipay sa Presidente,” nagkanayon si Carandang.

Sayo niini, gipahayag ni Carandang nga ang adlawan sa Presidente usa ra ka laing adlaw sa trabaho.

Human nga gibista ang batang may sakit nga kanser, gipangunahan dayon sa Presidente ang miting uban sa iyang gabinete.

“Kadaghanan sa mga gituki kabahin sa ekonomiya. Dunay report gikan kang Budget Secretary Florencio Abad. Dunay diskusyon kabahin sa macro-economic numbers. Sa inyong nahibaw-an ang gabinete magmiting by-cluster apan usahay, magmiting kini sa kinatibuk-an  aron hingpit nga ma-ambitan ang mga impormasyon. Kana ang tumong sa miting karong adlawq,” matod pa ji Carandang dihang gipangutana kabahin sa agenda sa miting sa gabinete. (ATR/PCOO/PIA9-Zamboanga del Norte)  

Palasyo mipahayag nga ang kagamhanan mopatuman sa balaod pagtubag sa gubat nga nahitabo sa Sulu tali sa MNLF ug Abu Sayyaf Group

By Gideon C. Corgue

PAGADIAN CITY, February 9 (PIA) –- Ang kagamhanan mopatuman sa balaod kung ang mga sibilyan ma-apektuhan sa nagpadayon nga panaggubat tali sa Moro National Liberation Front (MNLF) ug Abu Sayyaf Group (ASG) aron pagluwas kanila, ang opisyal sa Palasyo nagkanayon ning Biyernes.

Si Presidential Communications Development and Strategic Planning Office Secretary Ramon Carandang nagkanayon nga gawas paglikay sa mga sibilyan gikan sa kakuyaw ang militar naglihok aron pagpugong sa kagubot nga nahitabo sa Sulu.

Ang MNLF kinsa mipirma sa kasabutan sa kalinaw uban sa kagamhanan sa 1996 ang mopatin-aw sa iyang bag-o nga gibuhat batok sa Abu Sayyaf, matud pa ni Carandang.

“Ang matag-usa ang mosunod sa balaod ug ang balaod ang ipatuman, apan sumala sa akong gikaingon kagahapon, ang mahinungdanon nga butang mao nga kita ang mohatag kaseguruhan sa kaluwasan sa mga sibilyan,” matud pa niya sa press briefing sa Malakanyang ning Biyernes.

“Adunay gubat nga nahitabo dinha sa Sulu ug ang pinakadali nga kakuyaw mao ang mga inosente nga tawo kinsa walay mahimo niining maong gubat kinsa ang mapagan niini. Ang pinakauna mao ang paghatag kaluwasan kanila ug paglikay kanila. Sa dili madugay kita ang mopatuman sa balaod ug unsa ang angay nga pagabuhaton.”

Dihang gipangutana sa mga tigbalita kung ang MNLF makig-alayon ba sa militar paglusad pag-atake batok sa Abu Sayyaf, si Carandang nagkanayon,  ang Presidente wala nagtugot sa operation sa MNLF sa Sulu.

“Sumala sa gipahayag sa Presidente , wala kini gitugotan. Busa kita ang nagkinahanglan nga magpaabot hangtud nga ang una nga prayoridad ang mahimo sa dili pa ang lain nga butang himoon,” ang opisyal sa Palasyo nagkanayon nga nagpahayag nga ang dako nga pagpakabana sa kagamhanan mao ang kaluwasan sa mga sibilyan sa gubot nga dapit. (GCC/PCOO/PIA9-Pagadian City)

2.5 milyon ka mga domestic helpers makabenepisyo sa PhilHealth

Ni Claro A. Lanipa

PAGADIAN CITY, 09 Feb (PIA) – Gibanabana sa 2.5 milyon ka mga katabang sa panimalay ang makabenepisyo gikan sa PhilHealth human gipirmahan ni Presidente Benigno S. Aquino III bag-o lang ang Republic Act No. 10361 gitumong kini sa pagpanalipod sa kahimtang sa lokal nga mamumuo sa nasud.

Ang bag-ong balaod nagsaysay sa katungod sa buhat sa mga domestic workers kon katabang, adunay sukaranan ang ilang suhol, ug makadawat sila sa social protection benefits sama sa health insurance ubos sa programa sa PhilHealth, tali sa uban.

Ubos sa bag-ong balaod, ang usa ka domestic helper ug ang iyang kuwalipikadong dependents sama sa legal nga asawa o bana, mga anak ubos sa 21 ang pang-edaron, ug ginikanan 60 anyos pa taas makadawat usab sa mga benepisyo gikan sa PhilHealth.

Ang mga miyembro makapahimulos sa full inpatient benefits kon ugaling makulong siya sa bisan unsang ospital sa kagamhanan o pribado nga accredited sa PhilHealth.

Aron maangkon ang Philhealth coverage, ang katabang sa panimalay kinahanglan mosubmitir ug PhilHealth Member Registration Form (PMRF) nga mahimong makuha sa bisan asa nga buhatan sa PhilHealth, puede usab i-download gikan sa www.philhealth.gov.ph, inubanan ang dokumento sa mga kuwalipikadong dependents, ug i-submitir kini sa pinaka duol nga PhilHealth Local Health Insurance Office.

Ang tinuig nga kontribusyon sa P1,800 mahimong bayran matag tulo ka bulan o matag unom ka bulan, pinirmahan sa ilang amo alang niadtong modawat ug suweldo sa P5,000 pa ubos. (PCCO/CAL/PIA9)