DBP scholars mirehistro ug 100% passing rates sa Nursing Exams

Ni Alfonso T. Ruda

DIPOLOG CITY, SEPT. 1(PIA)--- Gipahibalo sa Development Bank of the Philippines nga 109 sa ialng mga scholars nga migradwar ilalom sa DBP Endowment for Education Program(DEEP) mipasar sa Nursing Board Licensure Examinations nga gipahigayon niadtong Hunyo niining tuiga.

Sa 109 ka mga scholars nga mikuha sa pagsulay, upat kanila ang mitugpa sa unang napulo ka puwesto.  

Matod pa ni DBP President ug Chief Executive Officer Francisco F. del Rosario Jr., ang mga nakasulod sa unang napulo ka puwesto gilangkuban nila ni Joey Dela Torre Jr., sa Cebu Normal University(ika-upat nga puwesto, 85%); Mar John Jambora, Xavier University-Ateneo de Cagayan( ika-limang puwesto,84.8%); Gina Baylosis, Xavier University-Ateneo de Cagayan(ika-walong puwesto, 84.2%); ug Alexis Aguinaldo sa St. Louis University(ika-napulo nga puwesto, nakakuha ug 83.8%).    

Ang DEEP maoy usa ka corporate social responsibility project sa bangko nga naghatag ug scholarship sa utokan nga mga kabataan lakip na kadtong dunay kabilinggan sa panglawas gikan sa kabus nga mga banay kinsa gustong mopadayon sa ilang pagtungha sa kolehiyo aron pagkab-ot ug degree ug non-degree nga kurso sama sa maritime education; agriculture; technical/vocational courses; entrepreneurship; forestry; education; ug hotel and restaurant management. Ang tabang gikan sa DEEP magsakop sa tanang kinahanglanon sa scholars, hangtud na sa cost of living allowance.

Si Dela Torre, nga taga Zamboanga City anak sa usa ka factory worker. Si Joey, ang ikaduha sa upat ka managsoon, miangkon nga gumikan sa kawad-on, naglisod ang iyang mga ginikanan nga suportahan ang ilang edukasyon. Usa kanila mihunong pagtungha, samtang ang iyang igsoong babaye, wala pa usab makakuha ug Nursing licensure examination gumikan sa problemang pinansyal.

Ang tulo ka mga DBP partner schools nga gilangkuban sa Cebu Normal University; West Visayas University ug St. Louis University nalakip usab sa mga nag-unang napulo ka mga nursing schools nga dunay passing rates nga 100%; 99.36% ug 98.94% subay sa pagka-kasunod.

Ang mga nursing graduates naglangkob sa unang hugna sa mga DBP scholars nga nagpa-enroll sa 7 ka mga partner-schools niadtong 2008. Gikan sa pasiunang 120 ka mga magtutngha, nahimo na lang kining 113, kinsa pulos migradwar karong tuiga. Nakatakda pa usab nga tabangan sa DBP ang mga nursing graduates nga makakita ug kasudlan ug trabaho.

Niadtong 2009, gisuab sa DBP ang ilang focus sa suporthang estudiante sa natad sa maritime ug mga short-term technical/vocational courses isip tubag sa nagakadakong pangihanglan sa mga tripulante ug mga technically-skilled woekers. Nag-establisar usab kini ug tie-ups uban sa mga inila ug dungganang employers ug manning companies aron magarantiyahan nga dunay masudlan ug trabaho ang ilang mga scholars nga mogradwar. Karon sa ikalimang tuig, miabot na sa 1,351 ka mga scholars sa tanang level ang gisuportahan sa DBP.

Matod pa ni Del Rosario, gi-organisa sa DBP ang DEEP Scholars Association Inc.(DEEPSA) aron masiguro ang pagpadayon sa programa. Ang DEPSA modawat ug boluntaryong kontribusyon gikan sa mga DEEP graduates aron mapadayon ang programa inigbiya sa DBP sa DEEP sa tuig 2017.(ATR/PCOO/PIA9-Zambo Norte)

IRR sa bag-ong polisiya sa pagmina gilaumang masumiti na sa Mining Industry Coordinating Council sa Malakanyang sa katapusan sa Septyembre

Ni Alfonso T. Ruda

DIPOLOG CITY, AUG. 31(PIA)---Gilaumang masumiti na sa Mining Industry Coordinating Council (MICC)ngadto kang Presidente Benigno Aquino III ang implementing rules and guidelines sa bag-ong polisiya sa pagmina sa katapusan sa bulan sa Septyembre.

Ang MICC mao ang bag-ong lawas nga gimugna ug gitahasan nga magpanday sa implementing rules and regulations para sa Orden Ehikuitbo No. 79 nga mas naila isip New Mining Policy.

“Ingnon ko kamo nga ang industrya pagmina nagpaabot nga manawagan ang EO nga repasuhon ang kasamtangang balaod sa royalties sa pagmina. Ang MICC nga kanunayng nagmiting naglaum nga makapanday ug bag-ong balaod sa katapusan sa Septyembre aron mapakita kini sa Palasyo,” matod pa ni Presidential Communications Development and Strategic Planning Secretary Ramon Carandang.

“Busa, akong ipasalig sa industriya nga naglihok kini karon sa maayong dagan. Ako nagtoo, nga sa higayon nga maklaro na kadtong maong mga isyo, makalaum na kita ug daghang kalihokan gikan niining maong sektor,” nagkanayon si Carandang.

Matod pa ni Carandang, ang Executive Order nagtumong pagkita dugang revenue para gobyerno aron patubag sa problema sa industriya pagmina ug palibot o kinaiyahan.

Ai Presidente Aquino mipirma sa Executive Order No. 79 niadtong Hulyo 6, 2012 (Institutionalizing and Implementing Reforms in Philippine Mining Sector by providing policies and guidelines to ensure Environmental Protection and Responsible Mining in the utilization of Natural resources).

Uban sa pagpanday sa bag-ong polisiya sa pagmina, naglaum ang Administrasyong Aquino nga ang bag-ong balaod makamugna ug dugang kita (revenue) para sa gobyerno atubangan sa taas nga panginahanglan sa metallic resources. Ang bag-ong EO nagtumong usab pabalanse sa problema sa pagpanalipod sa atong palibot ug kinaiyahan ug ekonomikanhong kaayuhan.(ATR/PCOO/PIA9-Zambo Norte)     

Aquino nanawagan sa CEAP nga makigtambayayong sa gobyerno sa “nation-building”

Ni Alfonso T. Ruda

DIPOLOG CITY, AUG. 30(PIA)--- Nanawagan karon si Presidente Benigno Aquino III sa Catholic Educational Association of the Philippines nga makigtambayayong sa gobyerno aron masustain ang momentum sa tul-id ug matarong nga dalan padulong sa katumanan sa gidamgong kalambuan sa nasod.

“Kami sa gobyerno nagpabiling lig-on ang baruganan nga makab-ot ang atong hiniusang tahas nga positibong nasudnong kausaban,” matod pa sa Hepe Ehikutibo sa iyang mensahe sa gipahigayong CEAP 2012 National Convention niadtong Miyerkules.

Ang CEAP, ang labing dakong kahugpungan sa mga tunghaan nagbukas sa ilang 2012 National Convention sa SMX Convention Center sa  niadtong Miyerkules nga molungtad hangtud sa Biyernes.

“Ang inyong institusyon dunay dakong papel sa pag-umol sa diwa sa mga estudiante, ug kami sa gobyerno nalipay ug dako nga kamo ang among katambayayong isip tipik sa pribadong sector, paghimo sa atong mga kabataan nga mahimong mahadlukon sa Ginoo ug mga responsableng lumulupyo sa atong katilingban,” matod pa ni Presidente Aquino.

Naglaum ang Pamuno Nasod nga ang okasyon labi pang magpalig-on sa inyong tinguha nga mapalig-on ang curriculum sa administrasyon ug teaching competencies sa 1,345 ka mga membro sa tunghaan isip tubag sa kalibutanong kausaban.

“Tuod man, ang mga doktrina sa atong pagtoo nga gikinahanglan sa atong panaghiusa mahinungdanon usab alang sa katumanan sa prinsipyo sa kaangayan, subay sa gilatid sa atong Katilingbanong Kontrata uban sa katawhang Filipinhon,” nagkanayon ang Pangulo.(ATR/PCOO/PIA9-Zambo Norte)    

Bag-ong Kalihim sa DILG ipahibalo ni Presidente Aquino sunod semana

Ni Alfonso T. Ruda

DIPOLOG CITY, AUG. 30(PIA)---Itudlo na ni Presidente Benigno Aquino III ang bag-ong Kalihim sa Department of Interior and Local Government(DILG) sa di pa siya molarga aron motambong sa Asia Pacific Economic Leaders Summit nga ipahigayon didto sa Rusya sunod semana.

Apan samtang mangita pa si Presidente Aquino ug ipuli ni anhing DILG Sec.retary Jesse Robredo, matod pa ni Presidential Spokesperson Edwin Lacierda, magpabilin una si Executive Sec. Paquito Ochoa Jr., nga Officer-in-Charge sa DILG.

Ang numero unong konsiderasyon sa Presidente sa ipuli ni Robredo mao ang tawong makapadayon pagpatuman sa mga reporma nga iyang gustong mahitabo para sa maayong pang-gobyerno ug pulisya.

“Dako kaayo ang nahimo ni Sec. Robredo sa pagpalambo sa lokal nga pangagamhanan  pinaagi sa mga kagamhanang-lokal ug ang mga repormang nasugdan ni Robredo mahimo nang permanenting polisiya sa sunod nga Kalihim sa DILG,” matod pa ni Lacierda.

Gihatagan ug punto ni Lacierda, nga walay gikasulti si Prsidente Aquino sa bisan kinsa sa mga kandidato nga ipuli kang Robredo apan higpit niining gitun-an ang labing maayong ipuli sa mipanaw nga Kalihim.

Si Robredo nga namatay human mihagsa ang iyang gisakyang ayroplano sa kadagatan sa Masbate niadtong Agosto 18 (Sabado) gihatagan ug state funeral sa administrasyong Aquino. Si Presidente Aquino mipasidungog kang Robredo nga Philippine Legion of Honor uban ang ranggong Chief Commander sa wa pa siya gitumod sa iyang katapusang pahulayan sa Dakbayan sa Naga niadtong Martes.(ATR/PCOO/PIA9-Zambo Norte)

Presidente Aquino mobiya sunod semana para Vladivostok sa Russia aron mosalmot sa 20th APEC Leaders' Summit

Ni  Gideon C. Corgue

PAGADIAN CITY, August 30 (PIA) – Si Presidente Benigno S. Aquino III mobiya ngadto sa Vladivostok, Russia sunod semana aron makigduyog sa kawhaan nga uban mga pangulo sa nasud pagsalmot sa 20th Asia-Pacific Economic Cooperation (APEC) Leaders' Summit sa September 8 ngadto sa 9.

Ning tuiga nga APEC summit nga adunay tema "Integrate to Grow, Innovate to Prosper," gidumala sa Russian Federation.

Si Presidente Aquino kuyugan ni Foreign Affairs Secretary Albert del Rosario, Trade and Industry Secretary Gregory Domingo ug Finance Secretary Cesar Purisima.

Atol sa APEC Economic Leaders’ Meeting (AELM), ang mga pangulo motuki sa upat ka mga mahinungdanon nga butang sama sa mosunod: trade and investment liberalization ug  regional economic integration, pagpalig-on sa seguridad sa pagkaon, ug pagmugna sa sa  kooperasyon alang sa kalamboan.

Si Undersecretary for International Economic Relations Laura del Rosario sa Department of Foreign Affairs nagkanayon nga ang Presidente mosalmot sa APEC Business Advisory Council (ABAC) Dialogue uban sa mga lideres, usa ka mahinungdanon nga paghulagway sa AELM.

Ang  APEC Business Advisory Council Dialogue naghatag sa ABAC members sa kahigayonan nga makigtagbo uban sa mga APEC leaders aron pagtuki sa kinatibuk-an nga ABAC work program ug pagdala sa mga isyu nga adunay kalabutan ang suliran sa komunidad sa pamatigayon.

Ang ABAC Philippines paga-reprsentahan sa A. Magsaysay Inc. president ug chief executive officer Doris Magsaysay, Jollibee Food Corp. Chairman and CEO Tony Tan Caktiong, ug Ayala Corp. chairman and CEO Jaime Augusto Zobel de Ayala.

Si Undersecretary Del Rosario mipahayag nga atol sa 20th APEC Summit sa Vladivostok, si Presidente Aquino magpahigayon ug bilateral meetings uban ang mga nasud.

Si Del Rosario mipahayag usab nga atol ning maong summit, ang pagpahibalo sa Pilipinas pagdumala sa APEC summit sa 2015 ang gilauman pinaagi sa deklarasyon sa APEC Leaders.

Ang APEC usa ka kahugpungan sa mga ekonomiya sa Asia-Pacific region. Mao kini ang nanag-una nga katiguman aron pagpasayon sa pagpalambo sa ekonomiya, kooperasyon, pamatigayon ug pamhunan sa Asia-Pacific region.

Aduna kini 21 ka mga miyembro kinsa moabot ngadto sa gibanabana nga 40 porsiyento sa popolasyon sa kalibutan, gibana-bana nga 54 porsiento sa gross domestic product sa kalibutan ug 44 porsiyento sa patigayon sa kalibutan. (GCC/PIA9-Zambosur) 

‘Legion of Honor Award mihaum sa commitment sa akong bana sa serbisyo publiko,’ matud pa ni Leni Robredo

Ni  Gideon C. Corgue

PAGADIAN CITY, August 29 (PIA) – Ang magbabalaod nga si Leni Robredo midawat ning Martes sa Philippine Legion of Honor award nga gihatag ngadto sa iyang bana, ang mitaliwan nga si Interior and Local Government Secretary Jesse Robredo, kinsa iyang giingon mimatuod sa kinabuhi ug trabaho sa mitaliwan nga DILG Secretary isip matinud-anon nga dedicated public servant.

“Akong gidawat kini nga Legion of Honor award uban sa halawom nga pagtahud ug pagpasalamat. Kining pasidungog nag-ila sa kalampusan nga nagkab-ot sa akong bana sa natad sa serbisyo publiko, nga nagmatuod sa iyang kinabuhi ug trabaho. Dungog kini sa kinatibuk-an sa among pamilya,” matud ni Ginang Robredo sa iyang acceptance message human sa pagdawat sa award gikan kang Presidente Benigno S. Aquino III.

Sa samang higayon, si Ginang Robredo nagpasalamat sa Presidente sa tanang hinabang nga gitanyag sa iyang administrasyon sa iyang pamilya, lakip na ang lugar ug  panahon nga iyang gihatag kanila diha sa pagbangutan.

Siya usab ang mihatag sa iyang pagpasalamat kang Transportation and Communication Secretary Mar Roxas, Budget Secretary Florencio Abad ug Kongresista  Jun Abaya kinsa mao ang suod niya nga higala smatang siya ang buhi pa.

Si Ginang Robredo nagpasalamat usab kang Social Welfare and Development secretary Dinky Soliman, Presidential Communications Development and Strategic Planning Office Secretary Ramon Carandang, Presidential Spokesman Edwin Lacierda, Energy Secretary Jose Rene Almendras, Presidential Peace Adviser Teresita Deles and Justice Secretary Leila de Lima.

Si Ginang Robredo nagpasalamat usab sa tabang ug mga natampo sa mga ginsakpan sa Gabinete ni Aquino, sarescue teams ug divers, mga local officials sa Masbate ug Naga City, ug sa tanang mga tawo nga miapil sa rescue operation.

Si Presidente Aquino mihatag sa Philippine Legion of Honor nga adunay ranggo sa Chief Commander kang Robredo kinsa namatay sa pagkahagsa sa eroplano sa Masbate niadtong Agusto 18 samtang naglupad pauli gikan sa Sugbu.

Ang pasidungog, kinsa mao ang pinakataas nga ang naglingkod nga presidente mahatag nga walay pag-uyon sa kongreso, ang gihatag human sa funeral mass sa Basilica Minore de Peñafrancia ning Martes.

Ang nasangpit nga pasidungog gihatag kang  Robredo "tungod sa iyang pagsuporta sa tinuod nga kausaban nga miresulta sa gitawag nga revitalized city of transparency, accountability ug  people empowerment," matud pa sa pasidungog nga gibasa ni Budget Secretary Abad.

Sa paghatag sa pasidungog, ang Presidente mitumbok sa kalampusan sa kinabuhi ni Robredo isip nangulo sa Department of Interior and Local Government ug mayor sa dakbayan sa Naga. (GCC/PIA9-Zambosur) 

Aquino malaumon nga ang bag-o nga Chief Justice mousab sa pagsalig sa katawhang Pilipino sa judicial system

Ni  Gideon C. Corgue

PAGADIAN CITY, August 28 (PIA) – Si Presidente Benigno S. Aquino III mipadayag sa iyang paglaum nga ang pagsalig sa katawhang Pilipino sa  judicial system ang mausab ug dugang mopalig-on diha pagtudlo sa bag-o nga Chief Justice Maria Lourdes Sereno sa Korte Suprema.

Ang hepe ehekutibo mipadayag sa iyang paglaum sa iyang pakigpulong sa pagsaulog sa National Heroes Day sa Libingan ng mga Bayani sa dakbayan sa Taguig ning Lunes.

Si Sereno, ang kinamanghuran ug una nga babaye nga Chief Justice sa Korte Surema, ang gitudlo ni Presidente Aquino niadtong Agusto 16 ug nanumpa sa iyang katungdanan ngadto kaniya ning nakalabay nga Sabado, Agusto  25 sa Malakanyang.

“Naglaum ako nga imong timbangon ang paghukum ug paghatag desisyon aron nga mobalik ang pagsalig sa katawhan sa gambalay nga imong gidumala,” matud pa sa Presidente.

“Ang mando kanimo sa katawhan mao ang patigbabaw ang patas nga sistema sa hustisya; wala kini paboran  adunahan man o kabus, yanong tawo man ug gamhanan,” dugang pa niya.

Ang Presidente miseguro kang Chief Justice Sereno sa iyang administrasyon ingon man ang suporta sa mga tawo paghimo sa iyang trabaho isip kinatas-an nga hukum sa kinatas-an nga korte sa yuta.

“Sa atong bag-o nga Chief Justice --- ayaw pagpakawala sa imong paglaum kung ugaling moabot man kanimo ang mga pagsulay nga gikinahanglan nga imong pas-anon; makalaum ka nga kauban nimo ang katawhang Pilipino,” matud pa sa Presidente. (GCC/PIA9-Zambosur) 

Aquino nanguna sa oath-taking ceremony para ni Chief Justice Sereno

Ni Alfonso T. Ruda

DIPOLOG CITY, AUG. 26(PIA)----Gidumala kagahapon didto sa Rizal sa Malakanyang  ni Presidente Benigno Aquino III ang pagpanumpa sa katungdanan sa bag-ong natudlong Hepeng Mahistrado sa korte suprema nga si Maria Lourdes Punzalan Aranal-Sereno human siya napili nga mahimong ika-24 nga Hepeng Mahistrado sa labing taas nga hukmanan sa nasod.

Kauban ni Sereno sa iyang pagpanumpa sa iyang bag-ong katungdanan ang iyang kapikas sa kinabuhi, Mario Jose Sereno ug duha ka anak nga sila si Maria Sofia ug Jose Lorenzo.

Mitambong usab sa pagpanumpa ni Sereno sila si Representante Erin Tañada, Budget Secretary Florencio Abad, Executive Secretary Paquito Ochoa, Jr., Justice Secretary Leila De Lima, Bishop Efraim M. Tenderop, kanhi SC Justice Artemio Panganiban, mga Associate Justices sa korte suprema ug kanhing mga mahistrado sa korte suprema.

Sa usa ka pakighinabi human ang seremonya, gipahayag ni Presidential Communication Operations Office (PCOO) Sec. Herminio Coloma nga si Chief Justice Sereno duna nay igu-igong panahon aron iduso ang mga reporma sa hudikatura, ilabi na kadtong nasugdan panahon sa impeachment trial batok sa kanhing Hepeng Mahistrado.

Ang pagkatudlo ni Sereno sa labing taas nga hukmanan maoy magdala ug balik sa pagsalig ug kompiyansa sa publiko sa sistema sa hudikatura ug patas nga pagpanalipod sa balaod, matod pa ni Coloma, uban ang pag-ingon nga si kinsa man kadtong kabus sa kinabuhi, kinahanglang adunahan sa balaod.

Si De Lima nga usa sa mga kandidato sa maong posisyon, mitunol usab sa iyang pahalipay kang Sereno, uban ang pag-ingon nga naa na karon sa maayong mga kamot ang korte suprema ilalom sa iyang pagdumala.

“Ang kabatan-on, ka-aktibo ug kalantip sa salabutan ni Sereno maoy magsiguro nga ang hudikatura angayan nang hatagan ug pagsalig sa katawhan, “matod pa ni De Lima.

Si Sereno, ang labing unang babayeng Hepeng Mahistrado, gitudlo ni Presidente Aquino niadtong Agosto 16, 2010 isip ika-169 nga mahistrado sa korte suprema. Siya ang unang appointee ni Presidente Aquino sa korte suprema.

“Access to Justice” mao ang usa sa sentro sa adbokasiya ni Sereno. Usa sa iyang nahimo sa tunghaan sa balaod naglakip sa interface between domestic laws ug indigenous customary laws.

Sa wa pa siya mauban sa korte suprema, nalambigit una si Sereno sa major international litigation isip co-counsel sa Republika, diin human niini, miuban siya sa Asian Institute of Mamanagement isip Executive Director sa ilang think-tank---ang AIM Policy Center, diin iyang gipadayon ang iyang interes sa polisiya sa reporma ug ang epekto nini sa pang-gobyerno ug ekonomiya.(ATR/PCOO/PIA9-Zambo Norte)

Presidente Aquino nangulo sa state funeral ni DILG Secretary Robredo sa Malakanyang

Ni  Gideon C. Corgue

PAGADIAN CITY, August 25 (PIA) – Si Presidente Benigno S. Aquino III midawat sa pamilya sa mitaliwan nga  Interior and Local Government Secretary Jesse Robredo human nga ang iyang pataya’ng lawas miabot sa Malakanyang ning Biyernes sa buntag.

Ang iyang patay’ng lawas nahidangat sa Palasyo alas 11 ang takna sa buntag ug gihatagan ug arrival honors sa Presidential Security Group (PSG) lakip na ang napulo’g siyam nga gun salute. Ang arrival honors nga gihimo nga mahinuklugon ang kabahin sa state funeral alang sa mitaliwan nga DILG Secretary.

Ang administrasyong Aquino nangandam sa state funeral kang Secretary Robredo, ang maong pagpangandam giabiba sa iyang pamilya. Ang galastuhon sa state funeral pagaabagahon sa nasud dugang pa sa full honors gihimo sa namatay lakip na ang military honors.

Si Presidente Aquino ingon man ang uban nga mga ginsakpan sa Gabinete nakasaksi sa seremonya nga naglakip pagdala sa lungon sa walo ka mga casket bearers ug unom ka honorary pallbearers.

Ang Department of the Interior and Local Government (DILG) ug ang iyang attached agencies, urban poor groups, ug ang Kaya Natin Movement magpahigayon sa memorial services kang Secretary Robredo sa hapon. Alas 7 ang takna sa gabii ngadto sa 11 ang patay’ng lawas ni  Robredo ang gipahimutang alang sa public viewing sa  Kalayaan Hall sa Palasyo.

Sa Sabado, Agusto 25, ang public viewing magsugod alas 8 ang takna sa butang ngadto sa alas 5 ang takna sa gabii. Ang Liberal Party ug ang kauban ni Robredo nga mga ginsakpan sa Gabinete ang mo- sponsor sa memorial services sa gabii.

Sa Domingo sa buntag, ang patay’ng lawas sa kalihim pagadalhon ug balik sa Villamor Airbase nga moagi sa Pili Airport sa Camarines Sur. Ang Departure honors pagahimoon sa PSG sa Malakanyang.

Ang funeral mass pagahimoon sa Martes sa buntag sa may alas  10 ang takna sa buntag ug si Presidente Aquino gilauman nga mohatag sa eulogy alang sa mitaliwan nga DILG secretary.

Si Robredo ug duha pa nga mga kauban nga namatay dihang ang twin-engine, four-seater Piper Seneca plane nga nagdala kanila agi sa dakbayan sa nagagikan sa dakbayan sa Sugbu mihagsa sa  Masbate human pagkaangkon sa pagkadaot sa makina.

Si Robredo nagsilbi isip Naga City mayor sa ubay-ubay ka mga termino sa wala pa siya natudlo nga Interior and Local Government Secretary ni Presidente Aquino sa 2010. (GCC/PIA9-Zambosur) 

Opisyales sa gobyerno, magbabalaod, dignitaryo ug mga higala mihugpa sa Malakanyang aron paghatag ug katapusang pagtahod kang anhing DILG Sec. Robredo

Ni Alfonso T. Ruda

DIPOLOG CITY, AUG.25(PIA) --- Mga opisyales sa gobyerno, mga magbabalaod, dignitaryo, ug mga higala mihugpa sa Malakanyang niadtong Biyernes aron paghatag ug katapusang pagtahod kang anhing Interior and Local Government Secretary Jesse Robredo nga namatay human nahagsa ang gisakyang ayroplano sa kadagatan sa Masbate niadtong Sabado.

Si Presidente Benigno Aquino III mismo, nga nagsul-ob ug itom nga arm band ang midawat sa patayng lawas ni Sec.  Robredo sa Kalayaan Hall ground sa Malakanyang alang sa usa ka state funeral.

Ang mga membro sa Philippine Air Force, sakay sa Philippine chopper mipaulan ug confetti samtang gibalhin gikan sa porlon sa 8 ka membro sa Presidential Security Group (PSG) isip mga casket bearers ang iyang lungon ngadto sa ceremonial hall. Ang haya ni Robredo magpabilin sa Malakanyang hangtud karong adlawa ug nakatakda kining dalhon ug balik sa Dakbayan sa Naga ugma, adlawng Dominggo.

Subay sa tradisyon, bugtong ang Presidente ug kanhing mga Presidente lamang ang ihaya sa Malakanyang, ilabi na gyud sa Rizal Hall. Hinuon, dunay mga kaso nga ang lamay o vigil gipahigayon sa Heroes Hall, base sa Bulletin No. 6 nga gipagawas sa Committee on Funeral Arrangement and Burial para sa kanhing Kalihim sa DILG.

Hugtanon karong gisunod sa kagamhanan sa Pilipinas ang protocol uban sa Kagamhanan sa Estados Unidos alang sa state funeral ni Robredo.

Lakip sa dunay katungod alang sa state funeral mao ang Presidente, kanhi Presidente; Bise –Presidente, kanhi Bise-Presidente; Presidente sa Senado ug Tigpamaba sa Kongreso.

Ang mga National Artists ug mga National Scientists makapahimulos usab sa state funeral base sa gitakda sa balaod.

Ang Presidente, sa iyang kapasidad isip Pangulo sa Estado ug Commander-in-Chief dunay diskresyon nga imando ang state funeral alang sa kinsa mang tawo nga naghupot ug taas nga posisyon sa gobyerno nga angayang hatagan sa maong pasidungog.

Ang katapusang state funeral gipahigayon niadtong HJulyo 4, 2012 alang kang Naitonal Artist Perla Santos-Ocampo. Ang labing ulahing state funeral nga gihatag sa kanhing Presidente mao ang kang kanhi Presidente Diosadado Macapagal niadtong 1997.(ATR/PCOO/PIA9-Zambo Norte)

Data Privacy Act of 2012, gipirmahan na ni Presidente Aquino

Ni Alfonso T. Ruda

DIPOLOG CITY, AUG.24(PIA)---Gipirmahan na ni Presidente Benigno Aquino III niadtong Agosto 15, 2012 ang Data Privacy Act of 2012 aron mahimo nang hingpit nga balaod dinhi sa Pilipinas.

Ang Data Privacy Act of 2012 nagtumong nga panalipdan ang pribadong komunikasyon sa usa katawo, ingon man ang sistema sa komunikasyon sa gobyerno ug pribadong sektor.   

Ang bag-ong balaod, nga nagmando sa pagmugna ug National Privacy Commission magsakop sa pagproseso sa tanang matang sa personal nga impormasyon, lakip na ang mga personal information controllers ug processors nga wala ma-establisar dinhi sa Pilipinas. Ang balaod manalipod usab sa mga peryodista, publishers ug ilang tinubdan.

Ang National Privacy Commission nga maoy ang magpatuman sa balaod gimanduan usab nga modawat ug reklamo, mo-isyo ug cease and desist orders, momando sa mga entities nga mosunod sa ilang kamanduan ug magmonitor sa pagsunod sa maong mga kamanduan.

Ang komisyon gimanduan usab nga makig-coordinate sa ubang ahensiya sa gobyerno ug mga non-government organizations para sa implementasyon sa plano.

Ang komisyon pagalangkuban sa Privacy Commissioner, Deputy Commissioners ug pag-establisar ug Secretariat.

Kadaghanan sa mga membro sa Secretariat kinahanglang naka-alagad na ug dili moubos sa lima ka tuig sa mga ahensiya sa gobyerno nga nagproseso ug inpormasyon sama sa Social Security System(SSS); Government Service Insurance System(GSIS); Land Transportation Office(LTO); Bureau of Internal Revenue(BIR); Philippine Health Insurance Corporation(Philhealth); Commission on Elections(COMELEC); Department of Foreign Affairs(DFA); Department of Justice(DOJ) ug Philippine Postal Corporation(PPC).

Ang bag-ong balaod mo-epekto 15 ka adlaw human mapublikar sa duha ka dagkong  nasudnong pamantalaan nga dunay kinatibuk-ang sirkulasyon. Ang Data Privacy Act of 2012 mao ang consolidation sa House Bill 2965 ug House Bill 4155.(ATR/PCOO/PIA9-Zambo Norte)

Ecolink Phils, DILG ug PNP nagpahigayon ug candle ligthing ceremony kagabii alang sa namatay nga si DILG Sec. Robredo

Ni  Gideon C. Corgue

PAGADIAN CITY, August 24 (PIA) – Ang Ecolink Philippines , usa ka nanag-una nga Civil Society Organization sa Mindanao nga nagpalambo sa good governance, social accountability, ug anti-corruption inabagan sa Department of the Interior and Local Government (DILG), ug PNP  nagpahigayon ug candle lighting ceremony alas 6:00 ang takna kagabii atubang sa monumento ni Dr. Jose Rizal, City Hall ning dakbayan.

Ang nasangpit nga kalihokan gitambongan sa mga ginsakpan sa kapulisan, municipal local government operation officers, mga tinun-an, ug non-government organizations.

Matud pa ni Faye Reyes, ang Executive Secretary sa Ecolink Philippines, ang nasangpit nga kapunungan nakig-abag sa buhatan sa DILG alang sa Bantay Red Plate, LGU Fleet  Management Project, Governance ug Social accountability nga susama sa damgo sa mitaliwan nga si Secretary Robredo.

Matud pa ni Reyes nga ang kalit nga kamatayon ni Robredo malisod dawaton tungod kay siya ang usa ka tawo nga ang kagamhanan ug ang nasud nagtuo nga ang maayong pagdumala sa kagamhanan mao ang pinaagi sa transparency, integrity ug accountability sa mga opisyal sa kagamhanan ug sa katawhan.  Kini nga nasud ang nawad-an sa gitahod nga tawo, ug ang tawo nga maayo nga modumala sa kagamhanan.

“Ang candle lighting ceremony nga gipahigayon mao ang pagpasalamat sa tanang nga natampo ni Secretary Robredo sa atong nasud,” matud pa ni Reyes.

Samtang gipahayag ni Balangasan SK official Alvin Jim Genon nga siya ang nasubo sa kamatayon ni Secretary Robredo tungod niini ang mga hut-ong sa mga kabatan-onan misalmot sa nasangpit nga kalihokan.

Matud pa ni Genon nga si Robredo kinsa mao ang gitawag nga father of good governance dakong natampo sa SK.  Iyang nasinati ang maayong liderato niini dihang siya ang nahimo nga pinasidunggang mamumulong sa seminar sa SK nga gipahigayon sa dakbayan sa Sugbu sa nakalabay nga tuig.

Si Genon ang nalipay usab sa gipakita nga aktibong pagsalmot sa mga kabatan-onan sa nasangpit nga kalihokan nga bisan ug nahuman na ang ilang mga klase apan migahin gayud sa ilang oras pagtambong pinaagi pagdagkot kandila ug pagtanyag pag-ampo sa mitaliwan nga DILG Secretary. (GCC/PIA9-Zambosur)

Aviation authorities mo-imbistigar pagkahagbong sa eroplano nga nakapatay kang DILG Secretary Robredo, matud pa sa Palasyo

Ni  Gideon C. Corgue

PAGADIAN CITY, August 23 (PIA) – Ang mga tinugyanan sa Aviation sa dili madugay moimbistigar sa hinungdan pagkahagbong sa eroplano nga nakapatay kang Interior and Local Government Secretary Jesse Robredo ug sa duha ka mga piloto kung ang tanang mga mahinungdanon nga parte sa maong sakyanan ang makuha, ang Palasyo mipahayag ning Miyerkoles.

Sa regular press briefing sa Malakanyang, si Presidential Spokesman Edwin Lacierda nagkanayon nga si Transportation and Communication Secretary Mar Roxas mimando sa Civil Aviation Authority of the Philippines (CAAP) mo-imbestigar sa panghitabo human nga ang eroplano mihagsa ning Sabado sa hapon.

“Wala pa mahibaloi sa publiko apan si Secretary Roxas ang mimando na sa CAAP pag-imbestigar niini. Apan walay dinagsa nga nakaplagan busa gipaaabot nila,” matud pa ni Lacierda.

“Ang una nga dinagsa nakaplagan mao ang pako. Busa karon daghan na man, hinay-hinay nga nakuha ang dinagsa, si General [William] Hotchkiss sa CAAP ang mangulo sa imbestigasyon o ang iyang team magpahigayon sa imbestigasyon,” dugtong pa niya.

Matud pa ni Lacierda nga siya ang mopahibalo sa publiko nga kung ang imbestigasyon magsugod na nga nagtumong paghibalo sa hinungdan sa maong aksidente.

Ang mga divers nakakaplag sa patay’ng lawas ni Robredo ning Martes sa buntag ug ang retrieval operations nagapadayon aron pagkuha sa patay’ng lawas sa duha ka mga piloto. Ang patay’ng lawas ni Robredo karon anaa na sa dakbayan sa Naga ug ang mga pagpangandam gipahigayon aron pagdala niini sa Manila ning semanaha.

Si Robredo ug ang duha ka mga piloto namatay dihang ang duha ka makina nga four-seater Piper Seneca plane nagdala kanila nga miagi sa dakbayan sa Naga ngadto sa dakbayan sa Sugbu ug mihagsa sa Masbate human pagkaangkon sa pagkadaut sa makina.

Ang mga mulupyo sa dakbayan sa Naga nagbangutan sa kamatayon ni Robredo. Si Robredo nasilbi isip mayor sa dakbayan sa Naga sa ubay-ubay nga termino sa wala pa siya gitudlo isip kalihim sa  Interior and Local Government ni  Presidente Aquino.  (GCC/PIA9-Zambosur)

Public Viewing sa haya ni DILG Sec. Robredo molungtad hangtud sa Biyernes, sumala pa sa Malakanyang

Ni Alfonso T. Ruda

DIPOLOG CITY, AUG. 23(PIA)--- Padayong masud-ong sa publiko ang patayng lawas ni anhing DILG Secretary Jesse Robredo didto sa Palasyo sa Arsobispo sa Dakbayan sa Naga taman sa Biyernes, sumala pa sa usa ka opisyal sa Malakanyang.

Gihimo ni Presidential Communications Development and Strategic Planning Office Secretary Ramon Carandang ang pahibalo samtang gipangunahan ni Presidente Benigno Aquino III ang pagbangutan sa kamatayon ni Robredo gikan sa Agosto 21 hangtud nga itumod na lubnganan ang patayng lawas niini.

Alayon niini, gipirmahan sa Presidente niadtong Martes (Agosto 21) ang Proklamasyon numero 460 nga nagdeklarar sa “Adlaw sa Pagbangutan” (Days of Mourning).

Ang haya ni Robredo gibalhin gikan sa Funeraria Imperial ngadto sa Archbishop’s Palace sa Naga City, mga alas 11 ang takna sa buntag niadtong Martes.

Matod pa ni Carandang, usa ka misa ang gipahigayon alas 9 ang takna sa buntag sa maong adlaw didto Archbishop’s Palace diin gipahimutang ang haya sa Kalihim.

Ang public viewing nagsugod niadtong Miyerkules, gikan sa alas 8 sa buntag hangtud sa alas 5 sa hapon.

Laing misa ang gipahigayon gikan alas 5 ngadto sa alas 6 sa hapon, ug pagkahuman niini, nagsugod na usab ang public viewing.

Ang patayng lawas ni Robredo nakatakdang dalhon sa Malakanyang alas 9 ang takna sa buntag karong Biyernes.

Subay sa Proklamasyon nga gipirmahan sa Presidente, si Carandang nagkanayon nga ang tanang nasudnong bandila ibutang sa half-mast gikan sa pagsilang hangtud sa pagsalop sa adlaw sa tanang mga edipisyo ug institusyon sa gobyerno dinhi sa nasod sulod sa unom ka adlaw.

Base sa maong proklamasyon, ang tanang nasudnong bandila ibitay sa half-mast sulod sa 6 ka adlaw gikan sa pagsilang hangtud na sa pagsalop sugod niadtong Miyerkules.

“Niadtong Martes, ang dakbayan sa  Naga, Palasyo, Department of Interior and Local Government ug mga nakatapot nga ahensiya ug Philippine National Police mipaubos sa ilang bandila sa half-mast.

Hinuon, subay sa maong balaod, ang unom ka adlaw diin naka-half mast ang bandila nagsugod niadtong Agosto 22, 2012 sanglit ang proklamasyon gipirmahan niadtong Agosto 21, 2012 man lang, human nga misalop na ang adlaw. Ang tanang buhatan sa gobyerno gilaumang mosunod niini,“ matod pa ni Carandang. (ATR/PCOO/PIA9-Zambo Norte)  

De Lima mipahayag molingkod balik sa Judicial and Bar Council

ni Franklin P. Gumapon

DIPOLOG CITY, Aug. 17 (PIA)- - Gipahayag karong bag-o ni Justice Secretary Leila de Lima nga mobalik siya ug lingkod isip ex-officio member sa Judicial and Bar Council human wala siya maapil sa hamubong listahan sa mga kandidato alang sa pagka chief justice.

Gipasabot ni de Lima nga ang iyang paglingkod isip ex-officio member sa JBC usa ka pagtuman sa gimando sa batakang balaud sumala sa Article 8 Section 8 nga nagmando nga ang JBC pagalangkuban sa Chief Justice isip ex-officio chairman, kalihim sa hustisya ug representante sa kongreso isip ex-officio members ug upat ka regular members nga magagikan sa Integrated Bar of Philippines (IBP), professor sa kursong law, retiradong membro sa korte suprema ug sa pribadong pundok.

Matud pa ni de Lima nga wala siya’y nakitang suliran sa iyang pagbalik sa JBC.

Ang JBC misumiter ngadto ni Pangulong Aquino sa listahan sa walo ka nominado paka chief justice nga iyang pili-an sa dili pa muabot ang Agosto 27, ang katapusang adlaw nga gisitar sa pagtudlo sa bag-ong chief justice.

Wala maapil si de Lima sa walo human siya gi-disqualified atubangan sa mga disbarment cases nga gipasaka batok kaniya didto sa IBP.

Lima nga kasamtangang naglingkod isip associate justice sa korte suprema ang nasulod sa walo ka nominado nga gisumiter ngadto sa Pangulo. Sila mao si acting chief justice Antonio Carpio nga nakakuha ug pito ka boto, Roberto Abad, unom ka boto, Arturo Brion, unom ka boto, Maria Lourdes Sereno, unom ka buto, ug Teresita de Castro, lima ka boto.

Ang laing tulo mao sila si Solicitor-General Francis Jardelez, unom ka boto, kanhi executive secretary Ronaldo Zamora, unom ka boto, ug Ateneo de Manila University Law Dean Cesar Villanueva, lima ka boto.

Kining walo ka mga kandidato nga nakakuha sa unang tolo ka dapit napili human sa makuting pag-ayag sa may 20 ka kandidato alang pagka chief justice.

Si de Lima mi-inhibit isip membro sa JBC tungod kay usa man siya sa mga nominado pagka chief justice. (FPG/PIA-Zamboanga del Norte)

Palasyo nagtoo ganti patong sa ulo sa kadagko-an sa CPP-NPA dili maka-apektar sa panagsabut alang sa kalinaw

ni Franklin P. Gumapon

DIPOLOG CITY, Aug. 17 (PIA) - - Nagtoo karon ang kagamhanan nga ang ganti nga gitagana sa pagsikop sa mga kadagku-an sa partido komunista ug New People’s Army (NPA) dili maka-apektar sa panagsabut alang sa kalinaw tali sa walhong pundok.

Gipahibalo ni Pangulong Benigno Simeon C. Aquino III kaniadtong Huwebes nga adunay gigahin ang gobyerno nga P5.6 milyones isip ganti niadtong makahatag sa impormasyon aron madagpan ang duha ka pangulo sa NPA nga sila si BenitoTiamzon ug Jorge Madlos nga pareho’ng nag-atubang ug mga kaso.

Sa panagtagbo sa pundok sa mga tigbalita didto sa Malakanyang karong bag-o, gipahibalo ni Presidential Spokesperson Edwin Lacierda nga wala mahimoot si Pangulong Aquino nga wala gihapon madakpi si Tiamzon ug Madlos.

Gipasabot usab ni National Security Adviser Cesar Garcia nga ang pagbutang ug ganti alang sa mga wanted nga lider sa NPA maoy naandan na nga buhaton sa kagamhanan bisan wala pa masugdi ang panagsultianay alang sa kalinaw.

Si Tiamzon usa sa pundok sa NPA nga nagsabwag ug kagubot sa nasud nga ang kasagarang naapektuhan mao mga inosenteng katawhan.

Si Madlos usab maoy utok sa mga pag-atake sa sibilyan ug ekonomikanhong kalihukan sa mga dapit sa Mindanao.

Ang CPP-NPA wala usab motahud sa gihimong panagsabut alang sa kalinaw tali sa gobyerno ug sa National Democratic Front (NDF).

Sa hangyo sa mga NPA nga buhi-an ang uban nilang kauban nga nadakpan sa kasundalohan, gibutyag ni Garcia nga daghan na ang ilang gipangbuhi-an.

Samtang nagpabilin ang ganti aron masikop ang nga malapasong pangulo sa NPA, gipatas-an usab karon ni Presidente Aquino ang ganti alang sa pagdakup sa nagtago-tago nga si retired general Jovito Palparan ug ang kanhi gobernador sa Palawan nga si Joel Reyes.

Aduna usa’y gigahin nga P2 milyones nga ganti alang sa pagkasikop nila ni Delfin Lee ug pangulo sa Philippine Benevolent Missionaries Association (PBMA) nga si Ruben Ecleo Jr. (FPG/PIA-Zamboanga del Norte)

Aquino mimandong dugangan ang ganti pagdakop sa mga high-profile fugitives

Ni Alfonso T. Ruda

DIPOLOG CITY, AUG. 17(PIA)--- Gimando karon ni Presidente Benigno Aquino III nga dugangan ang ganting salapi nga ihatag sa mga tawong makahatag ug mahinungdanong impormasyon nga magresulta sa pagkadakop sa mga high-profile fugitives nga nagtago gikan sa balaod sa nakalabayng mga bulan.

Sa usa ka press briefing sa Malakanyang, gibutyag ni Presidential spokesperson Edwin Lacierda ang direktiba sa Presidente nga tabangan ang nagkalain-laing ahensiya sa gobyerno nga tigpatuman sa balaod pagsikop sa pipila ka mga high-profile fugitives nga nakaikyas sa silot sa kasal-anan nga ilang nahimo sama nila ni Retired General Jovito Palparan; kanhi Palawan Governor Joel Reyes ug iyang igsoon nga si Coron Mayor Mario Reyes; Dinagat Island Representative Ruben Ecleo ug daghan pang uban.

Matod pa ni Lacierda, nadismaya ang Presidente sa kawalay kalambuan sa pagdakop sa nasangpit nga mga personalidad.

“Aron matabangan ang mga otoridad sa ilang tahas pagdakop niining maong mga fugitives, gimando sa Presidente ang pagdoble sa ganting salapi gikan sa usa ngadto sa duha ka milyon ka pesos  sa para sa impormasyon nga magresulta sa pagdakop ni Jovito Palparan; 1.55 ngadto sa 2 milyones ka pesos alang kang Joel Reyes; 2 milyones ka pesos alang kang Mario Reyes,” matod pa ni Lacierda.

Dugang pa niini, gimando usab sa Presidente ang paghatag ug 2 ka milyon ka pesos nga ganti alang sa kinsa mang makahatag ug impormasyon aron madakpan ang uban pang mga pinangita sa balaod sama nila ni Delfin Lee ug Ruben Ecleo Jr. Sa samang higayon, gipahinumdoman usab Pamuno Nasod ang publiko sa kasamtangang ganti nga 5.6 milyones ka pesos alang sa pagdakop sa mga lider sa CPP-NPA nga sila si Benito Tiamzon ug Jorge Madlos, nga pulos dunay outstanding warrant of arrest. “Naghatag na kamig briefer batok niining mga tawhana ngadto sa media ug sa publiko,” matod pa ni Lacierda. Mahinumdoman nga si Palparan gipasakaan ug kaso human nga nalambigit sa pagdagit-patay sa duha ka estudiante sa University of the Philippines. Ang magsoong Reyes gipangita usab gumikan sa pagpatay sa broadcast-journalist nga si Gerry Ortega niadtong Enero 2011. Samtang si Ecleo nagtago-taho human nga nakonbikto sa kasong parricide.(ATR/PCOO/PIA9-Zambo Norte)

Kagamhang Aquino naglaum nga ang Senado moduso sa Sin Tax Reform Bill sa pagkabalaod

Ni  Gideon C. Corgue

PAGADIAN CITY, August 17 (PIA) – Ang administrasyon Aquino naglaum  nga ang Senadomoduso sa Sin Tax Reform Bill nga nagtumong pagpauswag sa abot sa kagamhanan aron pagpalig-on sa health care system sa nasud , ang opisyal sa Palasyo nagkanayon ning Huwebes.

"Ang Senado nagsugod sa ilang sa committee hearing sa nasangpit nga balaodnon nga mopatuman sa excise taxes sa mga produkto sa ilimnon ug tabako. Kung kini ang mapasa, kini nga balaodnon ang makapauswag sa abot sobra sa 31 bilyones sa unang tuig sa pagpatuman niini," si Presidential Communications Development and Strategic Planning Office (PCDSPO) Secretary Ramon Carandang nagkanyon sa iyang pamahayag nga gipagula ning Huwebes. 

"Kining mga pundo makapauswag sa basic health care ilabi na sa mga kabus nga mga Pilipino," si Carandang nagkanayon. 

Ang pagduso sa Sin Tax Reform Bill ang mopalig-on health care system sa nasud sanglit ang mga buhis gikolketa gikan sa mga sigarilyo ug ilimnon ang gilauman nga mohatag pundo sa universal healthcare coverage, matud pa ni Carandang.

"Adunay 17.3 milyones nga managirilyo sa Pilipinas. Kadaghanan kanila ang gikan sa ubos hut-ong sa katilingban, ug dili maka-afford sa tukma nga pagpatambal kung sila ang magkasakit gikan sa panagirilyo," matud pa niya.

"Ning maong mga hinungdan, naglaum nga ang Senado makakita ug kaalam pagduso sa Sin Tax Bill. Ning maong balaodnon mao ang pinakauna lakang sa maayong panglawas. Atong gidayeg si Senador  Franklin Drilon sa iyang suporta," matud pa niya.  (GCC/PIA9-Zambosur)

Korte Suprema mipagula’g P252-M aron ayohon ang courtrooms

ni Franklin P. Gumapon

DIPOLOG CITY, Aug. 16 (PIA) - - Migahin karon ang Korte Suprema sa kantidad nga P51,360,686.57 gikan sa pahat niini ubos sa General Appropriations Act (GAA) ning tuiga aron ayohon ang mga courtroom sa may 78 ka mga sala sa tibook nasud.

Sumala pa ni Acting Chief Justice Antonio T. Carpio, ang Korte Suprema migahin ug pundo aron ayohon ang may 84 ka buok nga one-storey, one-courtroom “Ansaldo-type” buildings sa may 14 ka judicial regions.

Sa iyang pakigpulong atol sa pag-subo sa Angeles City Hall of Justice sa Pampanga, si Carpio namahayag nga ang pagpahimutang ug mga bag-o ug modernong Hall of Justice kabahin sa Judicial Reform Program nga gipahimutang karon uban sa tabang gikan sa World Bank.

Dugang pa ni Carpio nga ang Halls of Justice gipahimutang ug gitukod dili lang aron adunay maanindot nga edipesiyo ang mga korte kon dili isip simbolo sa kaligdong ug dedikasyon sa paghatag ug kaangayan aron mahimo sa mga korte ang pagpahamtang ug usa ka makatarunganon ug makiangayon nga hutisya sa tanan. (FPG/PIA-Zamboanga del Norte)

DBM mipagawas P1.31-B alang sa DSWD internship program

ni Franklin P. Gumapon

DIPOLOG CITY, Aug. 16 (PIA) - - Gipagawas karong bag-o sa Department of Budget and Management (DBM) ang kantidad nga mokabat sa P1.31 bilyones alang sa Expanded Government Internship Program (EGIP) nga gidumala sa Department of Social Welfare and Development (DSWD).

Ang maong pundo nasulod sa 2012 General Appropriations Act (GAA) nga maoy isuhol sa mga out-of-school youth ug in-school youth nga motrabaho sa public sector.

Gipasabot ni Budget Secretary Florencio Abad nga gitinguha karon sa kagamhanan nga magamit ang talento sa mga mga kabatan-onan kinsa nanginahanglan ug trabaho ug aron makatabang sa DSWD.

Ubos sa EGIP, ang mga batan-ong trabahante motrabaho sulod sa 52 ka adlaw isip mga government intern sa DSWD.

Nakita usab ni Pangulong Benigno Simeon C. Aquino III nga kinahanglan matagaan ang mga kabtan-onan ug higayon nga makatrabaho aron sila makabaton ug kahanas sa pagtrabaho nga maoy gikinahanglan karon.

Ang EGIP naghatag usab ug kahigayonan sa mga miundang nga tinun-an nga makatungha sa sunod ting-abri sa klase.

Ubos ning maong programa, ang DSWD mo-hire ug 90,869 ka mga batan-on nga nag-edad gikan sa 18 ngadto sa 30 anyos lakip na kadtong nagtungha o nakaundang o mga nakatapos na sa pagtungha apan way trabaho sa tibook kapupud-an.

Ang paghatag sa mga kabatan-onan ug kahigayonan nga makatrabaho sa gobyerno nagtinguha usab nga ilang masabtan kon giunsa sa mga buhatan sa kagamhanan pagpatuman ang mga programa niini, panapos ni Abad. (FPG/PIA-Zamboanga del Norte)   

Kagamhanang Aquino midayeg sa mga Pilipino nga aktibo mihimo sa kampanya batok sa 'wang-wang' mentality

Ni  Gideon C. Corgue

PAGADIAN CITY, August 16 (PIA) – Ang administrasyong Aquino midayeg sa katawhang Pilipino paghimo sa aktibo nga papel sa kampanya ni Presidente Benigno S. Aquino III’batok sa “wang-wang mentality” human ang television network nag-upload sa video nagpakita sa usa ka motorista nga miatake sa usa ka enforcer sa Metropolitan Manila Development Authority (MMDA).

Si Presidential Spokesperson Edwin Lacierda mipakanaog ug pamahayag atol sa regular press briefing sa sa Malakanyang ning Miyerkoles human pagpagula sa nasangpit nga video sa news department sa TV5 sa YouTube.

Ang TV5 producers akto nga nakasakop sa usa ka motorista nga naila nga si Robert Blair Carabuena, usa ka resourcing supervisor sa Philip Morris International nga mibun-og sa usa ka nag-duty nga MMDA traffic enforcer nga si Saturnino Fabros.

Ang maong insidente nahitabo sa Capitol Hills Drive corner Tandang Sora dakbayan sa Quezon City ning Sabado.

“Atong gidayeg ang mga mabinantayon nga mulupyo kinsa ang aktibo nga nangita sa tawo gikan sa publiko ug pribado nga hut-ong. Usa ka video nakuha ni Karen Bernadette Keith,  researcher for the “T3: Kapatid Sagot Kita” program sa TV5 nga nagpakita sa usa ka tawo nga mibun-og sa usa ka enforcer sa Metro Manila Development Authority (MMDA) nga napakaylap online ug nga mipasipala ug mitampalas sa atong kaigsoonan pinaagi sa social media," si Lacierda nagkanayon sa pamahayag.

Si Lacierda nagkanayon nga ang administrasyon nagsuporta sa lakang sa MMDA pagpasaka ug kaso batok sa motorista.

"Kung ang mga tawo misaway sa madaugdaugon, nakita nato ang atong katawhan nga aktibong mihimo sa ilang papel pagsuporta sa kampanya sa Presidente batok sa “wang-wang mentality.” Usa kini nga hiiusang kooperasyon nga direktang nag-link sa indibidwal, pinaagi sa social ug traditional media ngadto sa usa ka dako nga paningkamot aron pagkab-ot sa kausaban pinaagi paghatag kahayag sa bisan unsa man nga kasaypanan nga mahimo," dugtong pa niya.

"Ang pagpakigkutay sa publiko mao ang haligi sa demokrasya. Kini ang mas gamhanan pinaagi sa kanunay nga pagbantay sa katawhan nga nagsilbi nga mopakgang sa mga supak sa balaod nga kahimoan," dugang pa ni Laciarda.

Dihang ang video gi-uplaod sa YouTube, ang mga naglantaw sa social networking sites sama sa Twitter nagpadayag sa ilang pagsaway sa gipakita nga pagka-arogante sa motorista. (GCC/PIA9-Zambosur)

Inisyatibo sa mga Mechanical Engineers pagtabang sa gobyerno paglambo sa Mindanao, giila ni Pres. Aquino

Ni Alfonso T. Ruda

DIPOLOG CITY, AUG. 16(PIA)--- Gihatagan ni Presidente Benigno Aquino III ug dakong pag-ila ang inisyatibo sa mga mechanical engineers nga makab-ot sa gobyerno ang social, economic ug industrial growth dinhi sa Mindanao.

“Usa ka dakong garbo sa atong nasod, kining maong matang sa mga propisyonal, kinsa bisan pa man sa mga hagit sa ilang tagsa-tagsa ka panimalay, nagpabilin gihapong nakigtandi sa ilang mga counterparts sa ubang bahin sa kalibutan,” matod pa sa Hepe Ehikutibo sa iyang mensahe sa gipahigayong 15^th Mindanao Regional Conference sa Philippine Society of Mechanical Engineers(PSME).

Ang PSME Davao Chapter nagbukas niadtong Miyerkules sa ilang regional conference uban ang temang “Mechanical Engineers Upholding Excellence Through Unity and Professionalism didto sa Waterfront Hotel sa Lanang, Davao City. Ang komperensiya matapos ugmang adlawa, Agosto 17.

“Ang makina nga anaa halos sa tanang kalihokan sa tawo, naghatag kanatog kahigayonan nga masinatian ang kasayon nga makalihok ug mahimong produktibo. Ang presensiya niining maong mga instrumento sa atong mga adlaw-adlawng panginabuhi nagkinahanglan sa katakos ug abilidad sa mga mechanical engineers para sa pagmintinar, ingon man ang mga innovation ug disenyo-niining maong mahinungdanong kahimanan,” matod pa ni Presidente Aquino.

“Mahinungdanon ang pag-update sa atong kinaadman ug katakos kon gusto natong mahimong mas epektibo niining ensaktong siyensiya. Kining maong convention maoy usa ka positibong lakang padulong sa maong direksyon, uban ang kalihokang magpaila labing bag-ong teknolohiya ug magdasig sa paghigayon ug diskusyon sa mga mahinungdanong isyo sa inyong propisyon,” nagkanayon ang Presidente.

Si Presidente Aquino nanawagan sa tanang mechanical engineers nga magpabiling committed sa balor sa pasyon, integridad, sa pagpadayon nga ma-improve ang propisyon, ug makatampo sa pagpalambo sa siyensiya ug teknolohiya ug paglambo sa nasod ug uban pa niining panahon sa kabag-ohan.(ATR/PCOO/PIA9-Zambo Norte)