Kaso sa leptospirosis sa mga lugar nga gibahaan, sakupon na sa Philhealth

Ni Alfonso T. Ruda

DIPOLOG CITY, AUG.15(PIA)--- Sakupon na sa Philippine Health Insurance Corporation (Philhealth)ang kaso sa leptospirosis sa mga lugar nga apektado sa pagbaha aron makuhaan ang problema sa kabus nga mga komunidad, sumala pa sa Malakanyang.

“Niadtong na-apektahan sa baha, sugod niadtong Agosto 7, ang tanang ma-admit sa tambalanan gumikan sa uncomplicated leptospirosis moabot ngadto sa 11 mil pesos alang sa tanang matang sa membro,” matod pa ni Deputy Presidential spokesperson Abigail Valte sa usa ka press conference sa Malakanyang niadtong Martes.

Sa samang higayon, gipatuman usab sa Philhealth ang “No balance billing policy” sa pagsakop sa leptospirosis ilabi na sa mga sponsored program members.

Para sa mga dili membro sa Philhealth nga magkasakit ug leptospirosis sa mga lugar nga apektado sa baha, matod pa ni Valte, otomatiko silang ma-enroll sa Philhealth isip sponsored program members ug hatagan sa tukmang benepisyo.

Ang premium dili na pabayran ug ang membership validity magsugod sa Agosto 1,2012, hangtud sa Hulyo 31, 2013.

“Kana ang motubag sa problema sa mga kabus natong mga kagisoonan nga dili membro sa Philhealh kon ugaling magkasakit sila ug leptospirosis. Otomatik silang ma-enroll sa Philhealth,” matod pa ni Valte.

Ang panahon usab sa pagduso sa benepisyo sa mga membro sa Philhealth ug dependents gilugwayan usab ngadto sa 120 ka adlaw para sa mga discharges gikan sa Hunyo 8 ngadto sa Agosto 21, 2012.

Para sa mga accredited institutional healthcare providers kang kansang mga claim documents ang na-apektuhan sa baha, giawhagan lang sila nga makigkita sa lokal nga buhatan health insurance sa Philhealth para sa gikinahanaglang tabang, matod pa ni Valte.

Ang ubang healthcare institutions nga nagkinahanglan ug pag-atiman ug uban pang serbisyo nga makonsiderang emerhensiya mahimong ulian sa mga dili akreditadong pasilidad sa Philhealth basta duna silay akreditasyon gikan sa Department of Health(DOH).

Matod pa ni Valte, ang pagbayad sa premium gilugwayan ngadto sa Agosto 17 alang sa mga pormal nga sector kon kadtong  mga nagtarabahong membro sa Philhealth.’

Ang leptospirosis maoy usA ka bacterial disease nga maka-apektar sa tawo ug sa hayop, sumala pa sa Center for Disease control and Prevention. Dala kini sa bacteria nga gitawag ug leptospira. Magresulta kini ug halapad nga sintoma diin usahay masaypan kining nagumikan sa laing balatian. Kon dili matambalan, ang leptospirosis mahimong magresulta sa kadaot sa kidney; meningitis(inflammation of the membrane around the brain and spinal cord); sakit sa baga; respiratory distress; ug posibling ikamatay.(ATR/PCOO/PIA9-Zambo Norte)

DSWD mitanyag sa P41.66 milyones nga bili sa relief assistance sa mga biktima sa baha

Ni  Gideon C. Corgue

PAGADIAN CITY, August 15 (PIA) – Ang Department of Social Welfare and Development (DSWD) mitanyag sa P41.66-miyones nga bili sa relief assistance sa mga pamilya nga nabiktima sa baha ug makusog nga ulan sa nasud, ang opisyal sa Palasyo nagkanayon.

"Ang DSWD mitanyag sa kinatibuk-an nga P41,662,152.48 milyones nga bili sa relief assistance ngadto sa National Capital Region (NCR), Region I, Region 3, Region 4-A, Region 4-B, ug Region 6," si Deputy Presidential Spokesperson Abigail Valte nagkanayon atol sa regular press briefing sa Malacanang ning Martes. 

Ang  DSWD mitnayag sa P16,951,252.00 nga bili sa assistance nga naglangkub sa pagkaon ug mga dili pagkaon sa mga apektadong pamilya sa NCR; P1,063,593.46 sa Region 1; P10,670,733.22 sa Region 3; P12,847,845.80 sa Region 4-A, P100,000.00 sa Region 4-B ug P28,728.00 sa Region 6. 

Ang pagputos sa relief goods sa DSWD staff ug volunteers ang nagpadayon sa National Resource Operations Center (NROC) sa nasangpit sa dabkayan sa Pasay samtang ang relief distribution nagpadayon sa mga dapit nga apektado sa mga baha.

Ang NROC mao ang command center ug national warehouse sa DSWD diin ang disaster operations gi-monitor, ug ang relief goods gipahiluna ug giputos.

Si Presidente Benigno S. Aquino III nagpadayag ning Domingo sa iyang dako nga pahalipay ngadto sa gatosan sa mga tinun-an ug professionals kinsa ang boluntaryo nga mihatag sa ilang panahon ug kahago pinaagi pagputos sa mga pakete sa pagkaon aron pagtabang sa mga nawad-an ug panimalay nga mga pamilya sa bag-o nga mga pagbaha.(GCC/PIA9-Zambosur)

PhP2.7 bilyones nga pahat sa OP para sa tuig2013, gipresentar ni Ochoa

Ni Alfonso T. Ruda

DIPOLOG CITY, AUG. 14(PIA)--- Giduso karon ni Executive Secreatry. Paquito Ochoa sa Senate Finance Committee ang pahat para sa Office of the President para sa tuig 2013 nga 2.7-bilyones ka pesos, diin ang dakong bahin niini gitagana para sa usbaw sa suweldo sa mga empleyado sa gobyerno ilalom sa Salary Standardization  Law (SSL) ug infrastructure improvement sa Malakanyang.

Sa gipahigayong pagdungog sa komiti, si Ochoa nagkanayon nga gipatas-an ang pahat sa OP ug 552.9 milyones ka pesos para sa personal services gikan sa kanhing 513.9 milyones ka pesos aron matubag ang gikinahanglang pondo para sa usbaw sa suweldo ilalom sa ika-upat nga hugna sa SSL nga gipatuman sukad niadtong Hunyo niining tuiga.

Hinuon gipahayag sa Kalihim-Ehikutibo nga ang gigahin alang sa Maintenance and Other Operating Expenses (MOOE) kuhaan ug 4.1 porsiento kon 1.88 bilyones ka pesos gikan sa kanhing 1.96 bilyones ka pesos, resulta sa maayong sistema sa alokasyon sa pondo ug enhanced expenditure assessment.

“Lakip niining maong kalihokan mao ang higpit nga implementasyon sa Procurement Reform Law, instalasyon sa energy saving devices ug pagpadali sa proseso sulod sa OP,” matod pa ni Ochoa.

Ang capital outlay para sa 2013, sa laing bahin, gipatas-an ngadto sa 300.4  milyones ka pesos gikan sa 150.6 milyones ka pesos aron pondohan ang pagpaayo, rehabilitasyon ug pagpaanindot sa nagkalain-laing edipisyo ug pasilidad, diin pipila niini, natukod gatusan na ka tuig ang nakalabay, sulod sa Malakanyang complex.(ATR/PCOO/PIA9-Zambo Norte)