Zambosur PRC magsaulog sa “World Blood Donors' Day” karong adlawa

By Gideon C. Corgue 

PAGADIAN CITY, June 14 (PIA) –-Pagasaulugon karong adlawa, Biyernes ang World Blood Donors Day sa Philippine Red Cross (PRC).

Matud pa ni PRC Zamboanga del Sur Chapter administrator Hildaliza Muñoz nga ang nasangpit nga buhatan magpahigayon ug usa ka adlaw nga blood letting activity sa City Commercial Center ning bakbayan nga nagdala sa tema “ Every Blood Donation is a Gift of Life” ug slogan nga “Give the gift of Life. . .  Donate Blood.”

Matud pa ni Muñoz nga ang nasangpit nga kalihokan pagasalmutan sa mga ahensya sa kagamhanan ug civic organizations nga naglakip na niini ang mga miyembro sa Zamboanga del Sur Police Provincial Office ug uban pa, aron nga makatigum ug dugo gikan sa mga blood donors.

Dugtong pa ni Muñoz nga nakapadala na sila ug mga sulat-hangyo sa mga nasangpit nga buhatan ug iyang gilauman nga kini ang maka-ani ug suporta pinaagi pagpadala sa ilang himsog nga mga kawani sa C3 karong buntag.  

Giawhag usab ni Muñoz ang mga nagpakabanang katawhan nga kinasingkasing nga mohatag sa ilang dugo aron nga makatabang sa mga kabus nga mga tawo nga nagkinahanglan usab ug dugo.


Dugtong pa niya nga ang mga interesado nga mamahimo nga blood donors  modiretso lamang pag-adto sa C3 karong buntag ug makigkita sa PRC staff.  (GCC/PCOO/PIA,Pagadian City)