Ni Alfonso T. Ruda
DIPOLOG CITY, OCT.
29(PIA)---Uban sa
damgo sa Pantawid Pamilyang Pilipino Program nga mapadasig ang katungod sa kabataan,
nakatakdang ipahigayon karong Oktubre 29 ug 30, 2012 ang National Children’s
Congress (NCC) sa Bayview Hotel,Majila.
Ang
duha-ka adlawng kongreso nga unang gipahigayon sukad nga gipatuman ang programa
niadtong 2008, gilaumang pagatambungan sa 500 ka mga benepisyaryo sa Pantawid
Pamilya.
Ang
NCC mao ang dalan aron isilsil sa alimpatakan sa mga kabataan ang diwa sa nasyonalismo,
pagpakatap sa pagpakabana, ug aron mapabati ang ilang tingog kabahin sa mga
isyo nga direktang maka-apektar kanila. Magsilbi usab kining katapusang
kalihokan sa pagsaulog sa National Children’s Month nga dunay temang “Bright
Child ay Siguraduhin, Responsableng Pamamahayag ay Palaganapin.”
Isip
usa ka kongreso nga gipadagan sa mga kabataan, ang NCC pagadumalaon sa sa mga
children ambassadors gikan sa Non-Government Organizations ug mga partner-organizations
sama sa Council for the Welfare of Children (CWC) ug United Nations Children’s
Fund (UNICEF).
Uban
sa tema sa Children’s Month, dunay ipahigayong question-and-answer session uban
sa mga membro sa media, workshops, dula, presentasyon, ug diskusyon kabahin sa
katungod ug papel sa mga kabataan sa Pantawid Pamilya nga pagadumalaon usab aron
madasig ang kinatibuk-ang partisipasyon sa mga delegasyon.
Maoy
magtapos sa kalihokan ang paghatag ug pasidungog sa mga mananaog sa
gipahigayong Search for Exemplary Pantawid Pamilya Children. Ang pasidungog ihatag
isip pag-ila sa dalaygong binuhatan sa mga benepisyaryo sa programa. Ang mga
mananaog mao kadtong mga kabataang nagpangidaron ug gikan 10 ngadto sa 14 anyos
nga nagpakitag maayong panag-ingnan sa ilang panimalay, tunghaan, ug komunidad.
Ang
Pantawid Pamilya maoy usa ka programang tawhanong pangkalambuan ug estratehiya
sa katilingbanong pagpanalipod sa nasudnong pangagamhanan nga mibubo ug puhonan
alang sa panglawas ug edukasyon sa kabus nga mga kabataan hangtud sa pangidaron
nga 14 anyos. Kining maong programa naila usab isip Philippine Conditional Cash
Transfer Program.
Hangtud
niadtong Oktubre 10, 2012, ang program aduna nay 3,086,427 ka mga benepisyaryo
sa tibuok nasod.(ATR/PCOO/PIA9-Zambo
Norte)
