Ni Alfonso T. Ruda
DIPOLOG CITY, SEPT.
6(PIA)---Ang
Palasyo subling mipahayag nga nagpabiling bukas ang Administrasyong Aquino
alang sa pagpadayon sa negosasyon sa kalinaw uban sa mga walhong rebelde apan
kinahanglan una silang magpakita ug timailhan sa kamatinud-anon ug sinseridad sa maong kaktuyoan.
“Adunay National Peace Consciousness
karong bulana. Ang posisyon sa gobyerno, bukas kita para sa proseso sa kalinaw.
Ang ato lang gikinahanglan sinseridad,” matod pa ni Presidential spokesperson
Edwin Lacierda sa gipahigayong press briefing sa Malakanyang niadtong Huwebes.
Ang diskusyon sa kalinaw uban sa mga
rebelding komunista wala modas-og gumikan sa di-pagsinabtanay sa duha ka habig.
Giakusahan sa mga rebele ang
gobyerno nga napakyas pagpatuman sa naunang nakasabutan ay kalabutan sa tawhanong
katungod, dugang pa sa ubang mga kalapasan.
Ang mga negosyador sa kalinaw sa
gobyerno nga nakigsabot sa NPA nagkanayon nga posibling mapadayon ang
negosasyon uban sa mga rebelde kon mouyon sila sa bag-ong negotiating framework.
Midugang pa ang mga negosyador sa gobyerno nga kinahanglang dunay klarong adyenda
ang NPA kon unsaon pagtapos ang kagubot ug pagpatunhay sa kalinaw sa nasod.
Gikondenar usab sa Malakanyang ang
paggamit sa mga rebelde ug landmines, partikularmente, sa ilang pag-atake sa
Compostela Valley niadtong Martes nga nagresulta sa pagkasamad sa pito(7) ka
mga sundalo.
Sumala pa sa militar, gibutangan ug
hilo sa mra rebelde ang mga eksplosibong gigamit sa maong pag-atake.
Dihang gipangutana, kon gikonsidera ba
sa gobyerno ang pagdeklarar sa NPA nga hulga sa terorismo, si Lacierda miingon nga iyang gitugyan ngadto
sa Armadong Kusog sa Pilipinas ug sa National Security ang pagdisisyon kabahin
niini.
Ang paggamit ug non-command-detonated
explosives higpit nga gidili sa kalibutanong balaod sama sa Tratado sa Ottawa.
Ang military mi-akusar sa NPA nga
migamit ug ekplosibo nga gibutangan ug hilo, base sa ebidensiya nga nadiskubre sa
mga doktor sa militar gikan sa samad sa mga sundalo.
Sumala pa sa taho, nakakita ang mga doktor
ug lama sa hugaw sa tawo ug kamandag sa halas gikan sa samad sa 7 ka mga
sundalo nga nasamdan sa pag-atake niadtong Martes.(ATR/PCOO/PIA9-Zambo Norte)