93 porsiento sa mga hamtong Pinoy miingon, ang feeding program sa DSWD nakatabang gayud

Ni Claro A. Lanipa

PAGADIAN CITY, 04 Feb (PIA) – Base sa survey nga gipahigayon sa Pulse Asia niadtong Nobyembre 23-29, 2012 nagpadayag nga 93 porsiento sa mga Pilipino miingon nga ang Supplementary Feeding Program (SFP) sa Department of Social Welfare and Development (DSWD) nakatabang sa mga kabataan sa ilang barangay. Kining makahuluganong kalamboan gisuportahan sa resulta sa survey  nga duol sa pito sa napulo ka mga hamtong nasayod sa maong programa.

Matod pa ni Social Welfare and Development Secretary Corazon Juliano-Soliman “ang taas nga rating sa pagkasayod ug sa pag-ila nga ang programa nakatabang gayud nagtimaan nga anaa kita sa tukmang dalan sa pagtubag sa problema sa malnutrition tali sa mga kabataan. Timailhan usab kini nga ang kuwarta sa kagamhanan gigamit sa ensakto.”

Ang maong survey nagpakita usab nga kadaghanan sa mga hamtong (54 porsiento) nagtudlo sa DSWD isip ang ahensiya nga nagpahigayon sa SFP sa ilang barangay sa milabay’ng tulo ka bulan sa wala pa gihimo ang survey.

Dugtong pa, katunga sa 69%  nakamatngon sa supplemental feeding program mao ang mga benepisyaryo sa maong programa. Giila ug gipasalamatan ni Secretary Soliman ang ilang mga kaabag sa programa sama sa kagamhanang lokal (LGUs), pribadong sekta, ug non-government organizations (NGOs) sa ilang makanunayong paglambigit sa implementasyon ug pagmonitor sa programa.

Gipasabot ni Soliman nga ang DSWD mopalapnag pa gayud sa implementasyon sa SFP sa mga dapit nga adunay mobu’g kasinatian, ilabi na sa National Capital Region (NCR) ug sa mga urban areas.

SFP nagtanyag sa hot meals ngadto sa mga kabataan nga nagtungha sa mga day care centers ug sa mga gitawag supervised neighborhood play (SNP). Ubos niining programa, ang mga ginikanan sa mga day care children maoy moandam sa mga pagkaon subay sa menu sa mga pagkaon nga anaa sa ilang lugar. Sa tuig 2012, ang kagamhanan, pinaagi sa DSWD migahin ug P2.8 bilyon alang sa kapin sa 1.7 milyon ka mga kabataan. (DSWD/CAL/PIA9)

Malakanyang mipahayag nga ang land distribution program nagpabilin nga andam

By Gideon C. Corgue

PAGADIAN CITY, February 3 (PIA) –- Ang programa sa kagamhanan pag-apod-apod sa yuta sa mga farmer beneficiaries ilawom sa Comprehensive Agrarian Reform Program Extension with Reforms (CARPER) nga nagpabilin nga andam uban sa Department of Agrarian Reform nga karon nag-usab sa ilang paningkamot pagbaton ug pag-apod-apod sa pribadong gipanag-iya nga mga yuta,” ang opisyal sa  Malakanyang nagpahayag ning Domingo.

Sa usa ka press briefing nga gipalanog sa dzRB Radyo ng Bayan, si Deputy Presidential Spokesperson Abigail Valte nagkanayon nga adunay proseso nga nahilangkub sa tukma nga pag-ila sa mga pribadong yuta nga gipanag-iya ilawom sa CARPER ug kini nga proseso gipanguluhan sa Department of Agrarian Reform.

“Daghan ang mga hagit sa proseso pagbaton ug pag-apod-apod sa mga pribado nga yuta tungod kay bag-o kini. Unsa ang giapod-apod sa kagamhanan mao ang gipanag-iya sa kagamhanan nga yuta. Karon, anaa kita sa proseso pagbaton ug pag-apod-apod sa pribadong gipanag-iyahan nga mga yuta,” matud pa ni Valte.

“Alang sa kasayuran sa tanan, ang pagkaangkon sa gipanag-iya nga pribadong yuta adunay proseso ug sigun sa pahayag ni Secretary Delos Reyes, ang 2014 dili katapusan sa kalibutan samtang ang notice of coverage ang ihatag sa dili pa ang Hunyo 2014 ug ang pag-apod-apod pagahimoon na,” dugtong pa niya.

Matud pa ni Valte, ang kagamhanan naka-apod-apod na sa 300,000 ektarya sa agricultural land ngadto sa 169,000 nga mga agrarian reform beneficiaries.” (GCC/PCOO/PIA9-Pagadian City)