Gobyerno, MILF nagkauyon pagmugna ug transition govt. para mopanday ug Bangsamoro Basic Law

Ni Alfonso T. Ruda

DIPOLOG CITY, OCT. 9(PIA)—Ang Kagamhanan sa Pilipinas ug Moro Islamic Liberation Front (MILF) nagkauyon sa pagmugna ug transition government aron mopanday sa gisugyot nga Bangsamoro Basic Law.

Kini ang gipahibalo sa Hepe sa mga negosyador sa gobyerno nga si Marvic Leonen human gipirmahan sa gobyerno ug MILF ang makasaysayanong Framework Agreement on the Bangsamoro nga nagtinguhang hatagan ug kinutuban ang kagubot nga milungtad na ug duha ka henerasyon.

Malipayon nakong itaho, nga base sa gipahibalo na ni Presidente Benigno Aquino III, nagkauyon na ang mga negosyador sa gobyerno ug MILF sa mahimong katapusang teksto sa among gitawag nga Framework Agreement.

“Ang Framework Agreement mao ang inahang kasabutan nga magpakita sa “roadmap” nga magdala ug hugpong sa prinsipyo ug kaligdong para sa politikanhong kasulbaran uban sa MILF,” matod pa niya.

Ilalom sa kasabutan, ang Bangsamoro pagadumalaon sa usa ka Basic Law ug ang tanang probisyon niini kinahanglang mahasubay sa tanang kasabutan nga napalig-on tali sa gobyerno ug MILF.

Ang Basic Law maoy magpakita sa sistema sa kinabuhi sa Bangsamoro ug makatubag sa kalibutanong talamdan sa pang-gobyerno.   

“Ang kasabutan duna usay probisyon  kabahin sa sa paagi sa pagbahin sa gahum. Ang ikaduha mao ang pagbahin sa bahandi ug kita o abot. Aduna usab kiniy probisyon para sa normalisasyon kon ang proseso sa pagpabalik sa mas normal nga kinabuhi sa nasod,” matod pa ni Leonen.

Sa Decision Points niadtong Abril 2012, ang duha ka partido mipahibalo sa panag-uyon aron trabahoon ang pagmugna ug usa ka politikanhong entity nga ipuli sa kasamtangang Autonomous Region in Muslim Mindanao (ARMM) ilalom sa Akta Republika 6734 nga nabag-o sa Akta Republika 9054.

Sayo niini, gipahayag ni Leonen nga ang kasabutan magsiguro sa gitugyang katungod sa mga kabtangan ug miila sa tawhanong katungod sa matag tawo ug hiniusang katungod sa minoriad ug sa mga lumad ingon man  ang makahuluganong partisipasyon sa mga kababayin-an.

“Niining maong kasabutan, ang batakang prinsipyo sa normalisasyon napahimutang na usab lakip na ang saad sa MILF sa inanayng dili paggamit, ingon man hinay-hinay nga pagbalhin sa katungdanan sa pagpatuman sa balaod sa usa ka lugar gikan sa Armadong Kusog sa Pilipinas ngadto sa reformed police,” matod pa ni Leonen sa iyang panapos nga pahayag atol sa gipahigayong 32^nd Exploratory Talks didto sa Kuala lumpur, Malaysia. (ATR/PCOO/PIA9-Zambo Norte)  

Presidente Aquino mitumbok sa papel sa mga abogado isip tiglaban sa mga kabus ug dinaugdaug

Ni Gideon C. Corgue

PAGADIAN CITY, October 9 (PIA) – Si Presidente Benigno S. Aquino III mitumbok sa papel sa mga abogado isip mga tiglaban sa mga kabus ug dinaugdaug samtang kini ang mihagit kanila sa pagpabalik sa pagsalig sa mga tawo sa mga balaod ug gambalay sa nasud..

"Ang balaod mao ang dangpanan sa mga kabus ug dinaugdaug ug ang taming sa mga tawo batok sa inhustisya. Ang atong mga abogado mao ang ilang mga tigbantay aron pagseguro nga ang atong mga balaod nagsilbi ug nagpanalipod sa mga nanginhanglan niini," ang hepe ehekutino nagkanayon sa iyang mensahe sa Integrated Bar of the Philippines Zamboanga-Basilan-Sulu-Tawi-Tawi Chapter sa iyang ika-upat ka tuig nga Integrated Bar of the Philippines (IBP) Mindanao Convention of Lawyers ning Lunes.

Presidente Aquino mipahalipay sa IBP Zamboanga-Basilan-Sulu-Tawi-Tawi Chapter pagdumala sa nasangpit nga kalihokan nga nagtinguha pagpalambo sa panaghigalaay, physical fitness, ug nagpadayon nga legal education sa mga abogado sa Mindanao. 

"Sa dugay na nga panahon, ang judicial system ang gigamit ug giabusahan sa benepesyo sa pipila lamang ka mga tawo. Ang atong mga katawhan ang negatibo ang panglantaw sa atong legal system, ang mga mga bag-o nga mga panghitabo nakahatag kanato sa presko nga mga kahigayonan sa dugay na nga gipaabot nga pagpalig-on sa legal profession," matud pa niya. 

"Nag-agad lamang kaninyo ang pagpabalik pagsalig sa mga tawo sa atong mga balaod ug gambalay, ug magsugod sa proseso sa pag-ayo ug pag-usab sa nasud," matud pa sa Presidente.

Siya ang nagtuo nga ang maong okasyon magdala sa bag-o nga panahon sa legal community diin ang integridad, propesyonalismo ug excellence nahimo nga bag-o nga mga pulong sa atong mga abogado sa nasud. 

"Nanghinaut ako nga kamo ang moduyog ning panahona isip mga katawhang Pilipino nga nagsugod pagpupo sa mga prutas sa kausaban, ug magsugod paghunahuna sa ilang mga damgo ug tinguha. Kita ang gipahnumduman sa atong mga trabaho pagtabang sa pagtukod sa nasud, ug magmasaligon nga sanglit kita ang nagsubay sa tul-id nga dalan, kita ang mangulo sa nasud ngadto sa lig-on ug mauswagon nga kaugmaon," matud pa niya.  (GCC/PCOO/PIA9-ZamboSur)

Pagpanday sa IRR sa Cybercrime Prevention Act of 2012, ipadayon sa Kagamhanang-Aquino

Ni Alfonso T. Ruda

DIPOLOG CITY, OCT. 8(PIA)---Ang pagpanday sa Implementing Rules and Regulations sa Cybercrime Prevention Act of 2012 mao na ang sunod nga lakang sa Kagamhanang-Aquino, sanglit katungdanan man niining ipatuman ang balaod, sujmala pa sa usa ka opisyal sa Malakanyang.

Sa regular nga press briefing sa Malakanyang, si Presidential spokesperson Edwin Lacierda, nagkanayon nga dili mahimong suspendihon sa Sangang-Ehikutibo sa gobyerno ang implementasyon sa Cybercrime Prevention Act of 2012 nga mi-pekto niadtong Oktubre 3.

“Dunay plano ang Kongreso ug Senado nga mo-isyo ug hiniusang resolusyon apan wala mag paglihok padulong niini. Busa, gumikan sa kawalay paglihok o unsa mang pagpaningkamot nga suspendihon ang implementasyon, katungdanan namo sa Sangang-Ehikutibo nga i-implementar gyud ang balaod,” matod pa ni Lacierda.

Alayon, nagpatawag dayon ug miting ang Department of Justice niadtong Martes alang sa pagpahigayon ug konsultasyon alang sa pagpanday sa IRR  sa Cybercrime Prevent Act of 2012.

“Sa akong nasabtan, bukas kini sa publiko. Siyempre, dunay imbitasyon para sa media, sa Katilingbang-IT, tungod kay gitutukan man niini kon ang pagpakgang sa cybercrime, ug kon unsaon pag-implementar ang maong balaod,”matod pa ni Lacierda.

Subling gipahayag ni Lacierda nga dili tinguha sa gobyerno ang pagpaundang sa kagawasan sa prensa kon kagawasan sa pagpahayag ug nagpabiling misaad ang gobyerno nga agakon ang kagawasang-sibil nga gigarantiya sa atong Batakang-Balaod.

Ang Cybercrime Prevention Act of 2012 gimugna sa Kongreso aron matubag ang mga lehitimong problema kabahin sa mga kalihokang-kriminal sa Internet u gang epekto sa abusadong kinaiya, sumala pa ni Lacierda.

Ang balaod ngatumong nga panalipdan ang publiko batok sa mga hackers nga mihikaw sa uban nga makasulod sa Internet ug mopugong sa ilang kagawasang-sibil.

Matod pa usab niya nga mihimo nag lakang ang gobyerno batok sa mga hackers nga nagguba sa on line, naghikaw sa kinabag-ang publiko nga makakuha sa gikinahanglang impormasyon ug serbisyo gikan sa gobyerno pinaagi sa on line.

Dugang pa ni Lacierda, giila usab sa gobyerno ang katungod sa us aka tawo nga gipanamas-tamasan sa on line.

Gihatagan ug punto ni Lacierda nga ang kabahin sa libelo makita na sa Revised Penal Code ug wala sukad ma-sukad nga nagdisisyon ang Korte Suprema nga supak sa atong Konstitusyon ang libelo.

“Ang lintunganay niini. Mahimo bang ikiha ang usa ka tawo  ug libel sa pagsulat, radyo, telebisyon, dayon dili paglakip kaniya sa cybercrime kon nagsulat siya ug usa kabutang nga libelous?” Kana ra man gyud ang giingon sa Presidente.” pahayag ni Lacierda.(ATR/PCOO/PIA9-Zambo Norte)