By Gideon C. Corgue
Adunay pipila ka mga taho nagkanayon nga adunay mga pamilya nga wala nakadawat ug mga pagkaon human nga ilang gibiyaan ang ilang mga panimalay dihang ang mga ginsakapan sa Moro National Liberation Front (MNLF) misulod sa ilang mga komunidad.
“Atong gitubag ug giatiman ang daghan nga mga pamilya sa dakbayan sa Zamboanga ug atong giawhag ang patas nga pagtaho ug dili hatagan gibug-aton ang wala nahatagan nga 100 ka mga tawo ug pagkaon,” si Presidential spokesman Edwin Lacierda nagkanayon sa press briefing sa Malakanyang ning Huwebes.
Ang katawhan gikinahanglan motan-aw sa liboan ka mga tawo diin kini nga kagamhanan pinaagi sa Department of Social Welfare and Development (DSWD) ang nag-atiman, matud pa niya.
Sa pinakabag-o nga situational report gikan sa DSWD, si Lacierda nagkanayon nga adunay kinatibuk-an nga 23,794 nga mga pamilya nga adunay 118,819 nga mga indibidwal naapektuhan. 89% sa mga naapektuhan nga mga pamilya nawad-an sa panimalay ug nagpuyo sulod sa evacuation centers, samtang 1,790 nga naapektuhan nagpuyo sa ilang mga paryente o mga higala sa luwas nga mga dapit, gitaho ni Lacierda.
Adunay 57 nga evacuation centers sa dakbayan sa Zamboanga nga adunay kinatibuk-an nga gidaghanon sa pamilya nga 21,261 kon 112,961 nga mga indibidwal. Ang pinakadako nga evacuation center mao ang Joaquin F. Enriquez Sports complex nga gitawag ug Grandstand nga naghupot sa 63 porsiyento sa kinatibuk-an nga gidaghanon sa mga pamilya, matud pa niya.
Ang DSWD, pinaagi sa daghan nga nagtanyag ug mga pagkaon, naghatag ug 70,000 ready-to-eat packed foods sa panahon sa pagkaon: pamahaw, paniudto ug panihapon, dugtong pa ni Lacierda. (GCC/PCOO/PIA,Pagadian City)