Aquino miila sa DA ug PhilRice pagpanguna sa tinguha sa gobyerno nga mapalambo ang paggamit ug pag-apod-apod sa humay

Ni Alfonso T. Ruda

DIPOLOG CITY, NOV. 14(PIA)--- Si Presidente Benigno Aquino III mipabati sa iyang pagdayeg sa Department of Agriculture (DA) ug Philippine Rice Research Institute (PhilRice) sa pagpanguna nga makab-ot ang gidamgo sa gobyerno nga supisyenteng supply sa bugas sa nasod.

Sa iyang mensahe sa ika-27 nga anibersaryo sa PhilRice nga gibasa ni Agriculture Sec. Proceso Alcala, gipasalamatan sa Presidente ang DA ug PhilRice sa pagsanong sa panawagan sa administrasyong Aquino alang sa “Matuwid na Daan” (straight path), ilabi na sa pagpaningkamot nga mapalambo ang episyenteng paggamit sa supply ug pag-apod-apod sa nagakalain-laing matang sa humay nga makasugakod batok sa nagkalain-laing matang sa dangan ug kusog sa kinaiyahan.

“Kung kaniadto, tone-toneladang bugas ang nalata lamang sa mga bodega gumikan sa dili maayong pagdumala, karon gumikan sa ensakto ug maayong pagdumala, dili lamang supisyenteng supply sa bugas ang atong giapas kundili, kun duyogan kita sa panahon, moabot pa gyud ang panahon nga kita na pud ang mag-export ug bugas “ matod pa ni Presidente Aquino ngadto sa mga mitambong sa ika-27 nga anibersaryo sa PhilRice nga nadungan usab sa pormal nga paglusad sa 2013 isip “National Year of the Rice.”

“Nahimo nato kini tungod kay duna kitay katambayayong nga walay laing tinguha kundili ang paghatag ug kausaban sa sayop nga pagdumala. Nahimo kini nato tungod kay sulod sa 27 ka tuig, wala mobiya kanato ang PhilRice sa tinguhang mahatagan ug maayong klase ug supisyenteng binhi sa humay ang mga Filipino,” matod pa ni Presidente Aquino.

“Nahimo nato kini gumikan sa matinud-anon ug kinasing-kasing nga dedikasyon sa DA nga makakita ug nagakalain-laing solusyon nga mapataas ang produksyon ug kita sa atong mga mag-uuma ug mangingisda. Nahimo nato kini gumikan sa talagsaong kakugi sa atong kaliwat,” panapos pa sa Presidente.(ATR/PCOO/PIA9-Zambo norte) 

Presidente Aquino mopili sa sunod nga Supreme Court Associate Justice base sa katarong, pagkinaugalingon ug ug kabuotan

Ni Gideon C. Corgue

PAGADIAN CITY, November 13 (PIA) – Si Presidente Benigno S. Aquino III ang mopili sa sunod nga Supreme Court Associate Justice tubay sa constitutional standards sa pagkamatinud-anon, pagkinaugalingnon, ug kabuotan, matud pa sa opsiyal sa Palasyo ning Lunes.

Si Presidential Spokesperson Edwin Lacierda nagkanayon atol sa gipahigayon nga regular press briefing sa Malakanyang ang  Hepe Ehekutibo adunay hangtud lamang sa  Nobyembre 22 kon 90 ka mga adlaw human ang maong katungdanan gibiyaan aron mopili kung kinsa sa pito sa mga nominees ang mamahimo nga bag-o nga associate justice.

Ang Judicial and Bar Council (JBC) miduso ngadto kang Presidente Aquino sa pito ka mga kandidato alang sa bakante nga katungdanan pagka-Supreme Court associate justice. 

Si JBC ex-officio member ug Senador Francis Escudero nagkanayon nga ang pito ka mga napili mao sila si Court of Appeals (CA) Associate Justice Rosemari D. Carandang, kanhi University of the Philippines Law Dean Marvic M. Leonen, kanhi Department of Energy Secretary Raphael Perpetuo M. Lotilla, CA Presiding Justice Andres B. Reyes, Jr., CA Associate Justice Jose C. Reyes, Jr., CA Associate Justice Noel G. Tijam, ug founding dean sa De La Salle University College of Law nga si Jose Manuel Diokno. 

Si Lacierda ang mipatin-aw nga si Presidente Aquino ang modesisyon kung kinsa sa pito ka mga nominees mamahimo nga sunod nga SC associate justice sukwahi sa mga taho nga siya ang gusto nga mopili sa government chief negotiator nga si Leonen.

"Ang tagal mao ang Nobyembre 22. Busa kita ang magtagad hangtud sa ika-22 sa Nobyembre. Hinumdumi nga siya ang misaad sa Laos nga siya ang makigtagbo sa mga napili. Ang matag kandidato ang hatagan ug kahigayonan nga mabati sa Presidente," matud pa ni Lacierda.

"Ang kamatuoran siya ang mitrabaho uban sa Presidente ug siya ang adunay pagtuo kang Dean Marvic Leonen isip peace negotiator ug kana dili ikalimod. Apan ang Presidente maangayon sa tanang mga napili. Siya ang wala nag-una ni nagpahibalo kanamo sa iyang mapili. Ug niana nga aspeto, siya ang motantiya sa matag-nominee tubay sa constitutional standards sa katarong, pagkainugalingon, ug kabuotan; ug niana, siya ang makigsultihanay sa tanang mga nominees," matud pa ni Lacieda. (GCC/PCOO/PIA9-ZamboSur)