K to 12 Program nagtumong nga manguna ang katakos sa mga gradwadong Filipino

Ni Alfonso T. Ruda

DIPOLOG CITY,NOV. 29(PIA)---Ang programang K to 12 nagtumong nga manguna ang katakos sa mga gradwadong Filipino aron makabarog sa kalibutanong kahanas ug masangkapan ang ilang kaugalingon sa gikinahanglang katakos ug kahibalo sa ilang napiling propisyon, matod pa ni Presidente Benigno Aquino III.

“Usa kita ka gobyerno nga nagtinguhang ipatigababw ang kaayuhan ug interes sa atong kababayan ug sentro sa nasudnong katuyoan pinaagi sa pagpalig-on sa sistema sa edukasyon,” matod pa sa Hepe Ehekutibo sa iyang mensahe  ngadto sa Pambansang Samahan para sa Edukasyon sa Pagpapahalaga (PSEP) atol sa ilang ika-22 nga Annual Convention and Seminar Workshop on Edukasyon sa Pagpapakatao karong adlawa(Huwebes).

Ang PSEP Inc., nagpahigayon sa ilang 22^nd Annual Convention and Seminar Workshop on Edukasyon para sa Pagpapakatao uban ang temang “Pagpapahusay ng Kaalaman at Kasanayan sa Pagtuturo ng EsP sa K to 12 Curriculum” didto Bohol Tropics Resort sa Dakbayan sa Tagbilaran sa lalawigan sa Bohol.

“Kining K to 12 naghatag sa atong mga batan-on ug kalig-on ug kompiyansang baruganan sa pagpadayon sa ilang kurso ug maghatag kanila’g gahum, nga mahimong malig-ong katambayayong sa atong hiniusang tinguha nga mapabarog ang usa ka nasod,” nagkanayon ang Presidente.

”Ang kalampusan niining maong gimbuhaton nagkinahanglan ug suporta ug  dedikasyon gikan sa atong mga magtutudlo. Unta kining atong panagtigom magdala ug kahayag sa mga isyo nga gusto ninyong matubag ug unta mogawas kamong nagkahiusa ug nagkahugpong uban ang bag-ong pagbati ug gugma sa inyong trabaho isip tig-umol sa atong mga lider sa umaabot nga adlaw,” matod pa niya.(ATR/PCOO/PIA9-Zambo Norte)   

Presidente Aquino mideklarar sa Desyembre 9 isip National Anti-Corruption Day

By Gideon C. Corgue

PAGADIAN CITY, November 29 (PIA) –- Si Presidente Benigno S. Aquino III mideklarar sa matag Desyembre 9 isip National Anti-Corruption Day aron pagpalapnag sa kasayuran sa mga isyu sa corruption.

Ang Hepe Ehekutibo mipakanaog sa deklarasyon tubay sa Proclamation No. 506 nga gitiman-an ni Executive Secretary Paquito N. Ochoa Jr. ning Nobyembre 16. 

Si Presidente Aquino nagkanayon nga ang General Assembly sa United Nations Convention Against Corruption (UNCAC) mipili sa Desyembre 9 isip International Anti-Corruption Day.

Ang Republika sa Pilipinas usa ka signatory sa United Nations Convention Against Corruption, naalingatan sa Presidente.

"Kini ang nag-ila nga ang korupsyon naghatag ug seryoso nga problema ug mga hulga sa kalig-on ug seguridad sa mga katilingban, nagusbat sa mga gambalay ug demokrasya ug mga mithi sa demokrasya, ethical values ug hustisya, ug naghatag peligro sa malahutayon kalamboan ug balaod," matud pa sa Presidente.  (GCC/PCOO/PIA,Pagadian City) 

Walay sagradong baka para sa mga responsable sa extra-judicial killings, matod pa sa Palasyo

Ni Alfonso T. Ruda

DIPOLOG CITY, NOV. 28(PIA)--- Walay sagradong baka sa paggukod niadtong nalambigit sa mga extra-judicial killings ug ang mga responsable, pagataralon gayud sa hukmanan, nagkanayon ang Malakanyang.

Sa gipahigayong press conference sa malakanyang niadtong Martes, si Deputy Presidential Spokesperson Abigail Valte mipasalig sa mga pamilya sa biktima nga ang bag-ong gimugnang superbody nga mag-imbestigar sa maong mga kaso mogukod usab niadtong mga sundalo ug pulis nga malambigit sa pagpatay.

“Kinsa man ang responsable. Makita man usab nato sa komposisyon niining inter-agency committee nga kini gilangkuban gyud sa mga tawong anaa sa taas nga hut-ong sa gobyerno. Amo kining gihimo dili lamang uban ang pagpakigtinabangay sa Ehikutibo kundili hangtud na uban sa independenting constitutional bodies sama sa Commission on Human Rights ug Office of the Ombudsman  isip mga observers,” matod pa ni  Valte dihang gipangutana kini sa gilapdon sa trabaho.

“Makita usab nila ang atong focus ug commitment nga matabangan sila pagpangita ug hustisya alang niadtong nawad-an ug mga mahal sa kinabuhi.”

Sayo niini, gimugna ni Presidente Benigno Aquino III ang superbody aron mag-imbestigar sa mga daan ug bag-ong kaso sa mga extra-judicial killings, kalit nga pagkawala, ug uban pang paglapas sa tawhanong katungod, ilabi na kadtong nahitabo panahon sa administrasyong Aquino.

Si Presidente Aquino mipirma sa Administrative Order No.  35 niadtong Nobyembre 22 nga nagmugna sa maong lawas. Ang Presidente miisyo sa AO sa bisperas sa ikatulo ka tuig nga anibersaryo sa 2009 Maguindanao massacre diin 58 ka mga tawo ang giingong gipamatay sa pamilyang-Ampatuan ug sa ilang sumusunod.

Ilalom sa bag-ong kamanduan, ang Pamuno Nasod mimugna ug 9-ka membrong Inter-Agency Committee nga motutok sa mga extra-judicial killings, kalit nga pagkawala, pagpa-antus ug uban pang mabug-at nga paglapas sa katungod sa kinabuhi, kagawasan, ug seguridad sa usa ka tawo.(ATR/PCOO/PIA9-Zambo Norte)

Presidente Aquino midayeg sa mga natampo sa medical technologists paghimo sa clinical laboratory sciences nga maarang ug malamboon

By Gideon C. Corgue

PAGADIAN CITY, November 27 (PIA) –- Si Presidente Benigno S. Aquino III midayeg sa mga natampo sa medical technologists sa nasud paghimo sa clinical laboratory sciences nga mas maarang ug malamboon. 

"Ang natad sa syensya ug teknolohiya nagpabilin nga mahinungdanon sa paglambo sa tawo samtang ang mga kabag-ohan nagdala sa atong mga katilingban ngadto sa malig-on ug maarang nga pamaagi aron paghimo sa atong mga tahas," ang Hepe Ehekutibo nagkanayon sa iyang mensahe sa Philippine Association of Medical Technologists (PAMET) sa okasyon sa ika 48th nga Annual Convention ning Martes. 

Ang PAMET nagpahigayon sa ilang ika-14 ka tuig nga ASEAN Conference of Clinical Laboratory Sciences tubay sa 48th Annual Convention. 

Ang kalihokan kinsa adunay tema nga "Strengthening ASEAN Cooperation for a Greener Laboratory Environment” gibuksan ning Martes sa Manila Hotel, One Rizal Park, Manila. Ang konperensya maapos sa Nobyembre 30, 2012. 

"Kini nga konperensya usa ka mahinungdanon nga kahigayonan alang sa atong mga mulupyo aron pagpaambit sa kaalam ngadto sa inyong specialization ug pagpauswag sa kapasidad sa inyong propesyon alang sa kaayuhan sa katawhan dinhi sa nasud ug sa Southeast Asia," matud pa sa Presidente.

"Samtang kamo ang mopalahutay sa inyong panaghiusa isip scientific community, inyong gipalambo ang inyong mga natampo sa atong pangandoy sa environmental efficiency. Nanghinaut ako nga kini nga kalihokan naghatag gahum kaninyo sa inyong tinguha sa mga kabag-ohan uban sa inyong mga kauban, ug mohimo sa clinical laboratory sciences nga mas maarang ug mas malamboon," matud pa niya. (GCC/PIA,Pagadian City) 

Pres. Aquino nagmugna’g special teams nga mag-imbestigar sa pagpang-abuso sa tawhanong katungod

Ni Alfonso T. Ruda

DIPOLOG CITY,NOV. 27(PIA)--- Si Presidente Benigno Aquino III mimando di pa lang dugay sa pagmuna ug special teams aron imbestigahan ang pagpang-abuso sa tawhanong katungod nga binuhatan sa puwersa sa gobyerno ug mga puwersang dili iya sa estado.

Matod pa ni Executive Sec. Paquito Ochoa Jr., ang special teams mahimong tipik sa Inter-Agency Committee (IAC) nga gi-establisar sa Presidente ilalom sa Administrative Order No. 35 nga iyang gipirmahan niadtong Nobyembre 22 aron tahasan nga eksklusibong mogunit sa mga kaso sa extra-judicial killings,  kalit nga pagpangawala, pagpa-antus ug uban pang matang sa pag-abuso sa tawhanong katungod.

“Ang kamanduan sa Presidente nagpamatuod sa kamatinud-anon sa administrasyong Aquino nga labanan ug panalipdan ang tawhanong katungod,” matod pa ni Ochoa. Nagtoo kami nga ang pagmugna sa high-level committee mahimong epektibong mekanismo sa paggunit ug pagmonitor sa mga kaso sa paglapas sa tawhanong katungod,” patin-aw pa ni Ochoa.

Sumala pa ni Ochoa, ang AO 35 mo-epekto dayon ug mopuli sa AO 211 nga giisyo niadtong 2007 nga nagpabarog sa Task Force Against Political Violence. Ang direktiba sa Presidente nagmando sa task force nga iturn-over ang tanang dokumento, data, reports, supplies, resources ug nahibiling budget ngadto sa IAC.

“Ang panglantaw sa Presidente nga ang direktiba maoy magpahapsay ug magparehas sa mga polisiya ug action plan sa gobyerno para sa pagsulbad sa pag-abuso sa tawhanong katungod. Pinaagi niini, duna na silay focused nga imbestigasyon ug daling reolusyon sa tanang mga kaso,” matod pa ni Lacierda.

Usa sa unang tahas sa IAC mao ang pagmugna ug special teams ug technical working group nga magpahigayon ug hinanaling pag-imbentaryo sa mga kaso sa  paglapas sa tawhanong katungod nga binuhatan sa puwersa sa estado ug mga puwersa nga dili sa estado; pagmonitor sa dagan sa mga kaso nga nakapending sa hukmanan ug kasamtangang gi-imbestigahan ug magpahigayon ug imbestigasyon sa wa-masulbad nga mga kaso ingon man pagtaral sa hukmananj sa mga makasasala.  

Ilalom sa AO 35, ang Kalihim sa Department of Justice (DoJ) maoy magsilbing chairperson sa  IAC, kang kansang mga membro pagalangkuban sa Pangulo sa Presidential Human Rights Committee (PHRC), ang mga Kalihim sa Department of the Interior and Local Government (DILG) ug Department of National Defense (DND), ang Presidential Advisers of the Peace Process (OPAPP) ug Political Affairs (OPAPA), chief-of-staff sa Armadong Kusog sa PIlipinas, (AFP), ug Hepe sa  Philippine National police ug Director sa  National Bureau of Investigation (NBI).

Ang Chairperson sa Commission on Human Rights ug  Ombudsman molingkod isip observers ug resource persons sa IAC .

Ang IAC gimanduang magsumiti ug report sa Presidente matag unom ka bulan may kalabutan sa kalambuan sa mga kaso ug detalyadong imbentaryo sa mga kaso sa pagpang-abuso sa tawhanong katungod  nga nakapending sa mga hukmanan.

Gipangayo usab sa Presidente sa ubang mga ahensiya sa gobyerno ug mga Kagamhanang-lokal sa paghtag sa ilang kinatibuk-ang suporta ug kooperasyon ngadto sa IAC aron masiguro ang pagkab-ot sa tumong ug katuyoan sa AO 35 ug mandatu sa komiti..

Ang pasiunang gikin ahanglang pahat sa IAC pagakuihaon sa kasamtangang alokasyon sa mga ahensiyang maglangkob sa IAC ug sa mosunod pang alokasyon nga ihugpong na sa ilang tagsa-tagsa ka regular nga pahat. (ATR/PCOO/PIA9-Zambo Norte)

Malakanyang: DFA padayong manguna sa interes sa nasod sa kalibutanong fora

Ni Alfonso T.Ruda

DIPOLOG CITY, NOV. 26(PIA)--- Gipasalig sa Malakanyang nga padayong panalipdan sa gobyerno ang interes ug teritoryo sa nasod, ilabi na ang panag-ilog sa West Philippine Sea.

Sa gipahigayong interview sa sibyaanang Radyo ng Bayan-DZRB, gipahayag ni Presidential Spokesperson Edwin Lacierda nga nagpagawas na ang Departamento sa Kalihokang Langyaw ug note verbale iprotesta ang bag-ong pasaporte sa Tsina nga gibutangan ug mapa sa  gi-ilogang teritoryo.

“Ang DFA padayong magbantay sa sitwasyon aron siguradong maprotektahan ang atong interes sa kalibutanong forum ug padayon natonghimo sa gikinahanglang representasyon aron mapanalipdan ang atong teritoryo,” matod pa ni Lacierda.

Ang Tsina nagpasuko sa mga nanangkong nasod human migawas ang bag-ong pasaporte sa Tsina nga gibutangan sa mapa nga nagpakita sa ilang pag-angkon sa West Philippine Sea.

Ang Tsina miangkon sa tibuok West Philippine Sea nga tipik sa ilang teritoryo, bisan ug ang tipik sa  kadagatan niini, giangkon usab sa Taiwan, Vietnam, Brunie, Malaysia,  ug Pilipinas.

Ang gihimo sa Tsina nga paglakip sa mapa sa giilongang teritoryo sa bag-o nilang pasaporte makonsidera nga usa ka pagpanghagit sanglit magkinahanglan man nga i-indorso kini sa ubang mga nasod pinaagi sa pagbutang sa ilang opisyal nga seal sa maong dokumento.  

Matod pa ni Foreign Affairs Sec. Alberto del Rosario, iya nang gipadala sa Embahada sa Tsina ang note verbale aron hugtanong iprotesta ang imahe.

Dugang pa ni del Rosario, ang Tsina miangkon sa lugar ug kdagatan nga klaro kaayong tipik sa teritoryo Pilipinas .(ATR/PCOO/PIA9-Zambo Norte)

DPWH mopadayon sa pagtangtang sa mga butang nga makabalda sa kalsada sa 2013

ni Claro A. Lanipa

Pagadian City, 26 Nov (PIA) – Kusganong mopatuman sa  Department of Public Works and Highways (DPWH) ang kampanya aron pagtangtang sa mga butang nga makabalda ug ginadili paggamit sa mga dapit sulod sa gitawag road right-of-way sa sunod tuig kon 2013.

Si DPWH Secretary Rogelio Singson mipadayag sa iyang plano aron magsugod sa pag-implemntar sa sunod tuig sa pagbawi sa mga road right of way isip usa sa mga lakang aron ayohon ang kahilwasan sa sistema sa nasudnong kalsada sa tibuok Pilipinas.

“Kinahanglan atong bawi-on ang road right of way ug tangtagon ang mga kalihukan patigayon sa daplin sa kalsada”, miingon si Singson atubangan sa iyang mga ginsakpan gikan sa nagkalain-laing rehiyon ug distrito nga mitambong sa duha ka adlaw Seminar on Safer Roads by Design nga gipahigayon didto sa DPWH Central Office sa kaulohan ning bag-o lang.

Ang maong kalihukan gimugna sa International Road Federation (IRF), usa ka non-governmental, non-for-profit organization uban sa misyon aron sa pagpadasig ug pagtuboy sa kalamboan ug pagmentenar alang sa mas maayong, luwas ug mas  malahutayong kalsada kon road networks.

Kining lakang usa ka cost efficient approach ug paghatag ug pagtagad sa tag-as nga natalang ihap sa aksidente tali sa mga naglakaw sa kalsada kay sa mga pasahero sa mga sakyanan.

Ang aksidente sa kalsada mao ang usa sa mga nag-una nga hinugdan sa kamatayon dinhi sa Pilipinas matod pa sa pagtuon. “Tungod ang mga kalihukan sa patigayon ug mga butang nga nakabalda sa agianan anaa gibutang sa daplin sa kalsada,” miingon si Songson.

Dugang pa ni  Singson, ang implementasyon niining anti-obstruction campaign nga nagsubay sa giduso sa departamento aron ipauswag ang road safety ug nagkinahanglan sa politikanhong kabubut-on ug mas halapad komunikasyon aron sa pagmugna ug  pampublikong kooperasyon  labaw kaysa kuwarta.

Niadtong Mayo 2012, si Secretary Singson pinaagi sa Department Order 29 nagmando sa tanang Regional ug District Engineering Offices aron sa hingpit pagpatuman sa Department Order No. 52, series of 2003 nga gititulohan “Removal of Obstructions and Prohibited Uses Within the Right-Of-Way of National Roads.” (DPWH/CAL/PIA9)

Pres. Aquino miila sa kontribusyon sa media pagpabarog sa nasod, nanawagan alang sa diyalogo uban kanila

Ni Alfonso T. Ruda

DIPOLOG CITY, NOV. 24(PIA)--- Gipahayag ni Presidente Benigno Aquino III nga andam siyang magtrabaho uban sa media aron pagsumpo sa korupsyon ug mousad ang nasod ug maghatag ug benepisyo sa katawhang Filipinhon.

Sa iyang pagpakigpulong sa gipahigayong 9^th Media Summit didto sa Tagaytay City niadtong Biyernes, ang Presidente nagkanayon nga sama sa bureaukrasya, nag-antus usab sa korupsyon ang industriya sa media busa kinahanglan kining mahatagan ug kasulbaran.

Hinuon, giila sa Presidente ang pagpaningkamot sa industriya sa media nga masumpo ang korupsyon. Sama sa reporma sa gobyerno, nalipay siya nga nakita ang susamang lakang sa industriya sa media.

Iya usab nga gidayeg ang tema sa Summit nga nagkanayan,”Corruption in Media” nga usa ka pag-angkon sa pagpatigbabaw sa maong problema sulod sa industriya.

“Samtang kulang kita sa talamdan nga gamiton, ang inyong industriya dili maoy nangulo sa korupsyon, hinuon, naghimo kining sayon aron mahitabo ang korupsyon,” matod pa ni Presidente Aquino.

Aron masulbad kining korupsyon sa media, matod pa sa Presidente, gipatuman karon sa iyang administrasyon sa sektor sa gobyerno nga sigurohong dunay desenteng suweldo ang mga trabahante sa gobyerno pinaagi sa rasyonalisasyon ug reporma sa sistema sa suweldo sa gobyerno, benepisyo, ug mga bonuses.

Sumala pa sa Presidente, nagtoo siya nga ang media mao ang balwarte sa kagawasan, ug instrumento nga naghatag ug gahum sa katawhan nga mahimong responsable sa ilang himoon ug makab-ot ang kausaban.

Gihatagan usab ug punto sa Pamuno Nasod nga gusto usab sa gobyerno nga makigtrabaho uban sa media alang sa pag-uswag ug proteksyon sa mga nagtrabahong media, uban ang pag-ingon nga gipatuman na niya ang reporma sa sistema sa hudikatura  alang niini.

Alayon niini, nanawagan ang Presidente sa mga membro sa media alang sa usa ka diyalogo uban sa gobyerno aron pagtubag ang nagkalain-laing problema sama sa libelo, kagawasan sa media.

Sa samang higayon, iya usab nga gi-awhag ang mga membro sa media nga makigtabaho uban sa iyang administrasyon aron matubag ang ilang problema. Bukas ang akong ganghaan alang kaninyo, ug ania ako aron maminaw kaniya ug magtabaho uban kaninyo. Wala na akoy ikasulti pa kaninyo, tungod kini nabungat na mismo sa inyong bumabasa, sa inyong manan-away ug tigpaminaw,” panapos pa ni Presidente Aquino. (ATR/PCOO/PIA9-Zamnbo Norte) 

Aquino midayeg sa nursing society sa iyang mga natampo pagpaabante sa nursing education

By Gideon C. Corgue

PAGADIAN CITY, November 24 (PIA) –- Si Presidente Benigno S. Aquino III midayeg sa tulunghaan ug ang nursing society sa ilang mga natampo alang pagpa-abante sa standards sa nursing education sa nasud ug sa tibuok kalibutan.

"Ang kolehiyo mao ang dalan pagpalagsik sa kaalam sa mga kabatan-onan kinsa mao ang nag-agak pagpaabante sa ilang mga hingtungdang propesyon ug sa dugang paghatag gahum sa mga umaabot nga lideres sa atong nasud, ang Hepe Ehekutibo nagkanayon sa iyang mensahe sa mga organizers ug delegates sa 2nd International Conference of Student Nurses ning Biyernes.

Ang Cebu Normal University inabagan sa Nightingale Student Council ug Philippine Nursing Research Society, Incorporated-Cebu Chapter, nagpahigayon kagahapon sa 2nd International Conference of Student Nurses (2nd ICONS) sa Grand Convention Center, Cebu City uban sa tema nga "Merging Ideas: Promoting Patient Safety through Research."

"Kami sa kagamhanan naglaum nga makigtrabaho ninyo isip among mga kaabag pagseguro sa kaayuhan sa atong mga katawhan," matud pa ni Presidente Aquino.

"Mahinungdanon kaayo kanato nga madaliong  motubag sa mga panginahanglan sa atong mga katawhan," matud pa niya.

Ang Presidente nagpadayag sa iyang paglaum nga ang maong katiguman mopadasig sa prinsipyo sa excellence ug integridad sa matag delegado.

"Magkahiusa kita pagtuman sa highest professional ug ethical standards samtang kita ang magseuro sa kaayuhan sa katawhang Pilipino. Naglaum ako sa mapadayonong kalampusan sa inyong kalihokan," matud pa niya. (GCC/PCOO/PIA9-ZamboSur)

Aquino nanawagan sa mga NGOs nga motabang pagpili sa sunod nga lider

Ni Alfonso T. Ruda

DIPOLOG CITY, NOV.23(PIA)---Uban ang pag-ila sa ilang mahinungdanong papel sa pagpabarog ug pagpalambo sa nasod, si Presidente Benigno Aquino III nanawagan sa mga non-government organizations, ilabi na kadtong membro sa Caucus of Development NGO (CODE-NGO) Networks nga motabang paggiya sa mga Filipino pagpili sa sunod nga mga lider sa nasod karong umaabot nga piniliay.

Ang Presidente , sa iyang pakigpulong atol sa ika-20 ka tuig nga anibersaryo sa CODE-NGO didto sa Skydome, SM North EDSA, Quezon City niadtong Martes, nagkanayon nga makatabang ug dako ang mga NGOs sa publiko pagpili ug tawo nga angayang iboto karong umaabot nga eleksyon.

“Karong Mayo, moatubang na usab kita sa laing yugto nga maoy mag-umol sa atong kaugmaon ug kasaysayan. Gawas sa pagbantay sa ballot, mahimo unta kining giya sa katawhan pagpili sa tawo nga himoong pangulo,” matod pa sa Presidente.

“Sa dugay nanang panahon, nalubong sa pagtoo nga managsama lang ang tanang gustong magsilbi sa gobyerno. Pero inyong nakita ang kalainan sa paagi sa among pagdumala, nga naabtang namong status quo. Itugot ba natong dumalaon kita pag-usab ug mga kawatan ug mga bentahoso? Dili pud unta,” ugdang pang pahayag sa Presidente.

Matod pa ni Presidente Aquino, ang kapabilidad sa administrasyon pagpatuman sa mga reporma sa gobyerno sulod lang sa duha ka tuig nahimong posibli tungod sa pagpaningkamot ug suporta sa katawhan nga nagtoo sa pagsubay sa tul-id nga dalan ug dunay pagpakabana sa maayong  pang-gobyerno.

“Sa umaabot pang mga tuig,  siguradong duna na usab kitay bungang pagapupuon,. Usa pa gihapon ka direksyon ang atong subayon. Sa tabang sa atong mga NGOs, kompiyansa ako nga padayong kitang magpugas ug  maayong kaugmaon para sa Pilipinas ug sa mga Filipino,” Matod pa ni Presidente Aquino.(ATR/PCOO/PIA9-Zambo Norte)

Presidente Aquino midayeg sa non-government organizations isip mga kaabag sa kagamhanan pagtukod sa nasud ug kalamboan

By Gideon C. Corgue

PAGADIAN CITY, November 23 (PIA) –- Si Presidente Benigno S. Aquino III midayeg sa non-government organizations isip mga kaabag sa kagamhanan pagtukod sa nasud ug kalamboan atol sa kasaulugan sa 20th anniversary sa Caucus of Development Non-Governmental Organization (CODE-NGO) Networks nga gipahigayon sa Skydome sa SM North Edsa dakbayan sa Quezon ning Huwebes.

Sa iyang pakigpulong, ang Presidente nanawagan sa civil society organization-members sa CODE-NGO isip mao ang haligi sa maayong pagdumala kinsa nagsilbi nga tulay nga nagkutay sa mga tawo ug kagamhanan pinaagi sa ilang aktibo nga pagsalmot sa pangreporma nga programa sa iyang administrasyon.

Siya nagkanayon nga ang NGOs nagsilbi nga mata ug dalunggan sa kagamhanan pagkuha sa pulso sa nasud ug kung unsaon sa epektibo nga pagsulbad sa iyang mga panginhanglan.

Ang kasaulugan ning tuiga mihaum sa pagpahigayon sa CODE-NGO’s 5th Congress nga ilawom sa tema “Breaking Barriers in Civil Society’s Constructive Engagement for Development.”

Kini ang nagsilbi nga pinakadako nga katiguman sa mga pangulo sa civil society sa nasud kinsa naglangkub sa unom ka  national networks ug unom ka regional networks nga nagrepresentar sa sobra sa  1,600 nga development NGOs, peoples’ organizations ug mga kapunungan ug nagsilbi nga pagtapos sa CODE-NGO’s nga 20 ka tuig nga pag-impluwensya sa public policy ug pagtampo sa nag-uswag nga pagka-epektibo sa social development work sa civil society sa nasud.

Ang CODE-NGO nagpahigayon sa iyang katiguman matag-lima ka tuig aron pagtantiya sa iyang trabaho sulod sa nakalabay nga mga tuig ug nagpahimutang sa iyang direksyon alang sa iyang kaugmaon. Ang katiguman ning tuiga nag-aprobar sa Strategic Plan sa sunod nga lima ka mga tuig.

Nakig-uban sa Presidente mao sila si Budget and Management Secretary Florencio Abad, Social Welfare and Development Secretary Corazon Soliman, CODE-NGO chair Andrea Patricia Sarenas ug Peace Process Secretary Teresita Deles. (GCC/PCOO/PIA9-ZamboSur)

Malakanyang mipahayag nga ang pagpasa sa Sin Tax Bill usa ka mahinungdanon nga lakang pagpalambo ug pagpalapnag sa health safety nets sa mga Pilipino

By Gideon C. Corgue

PAGADIAN CITY, November 22 (PIA) –- Ang lakang sa Senado pagpasa sa Sin Tax Bill usa ka mahinungdanon nga lakang pagpalambo ug pagpalapnag sa maayong panglawas sa tanang Pilipino, ang opisyal sa Palasyo nagkanayon ning Miyerkoles. 

Si Presidential Spokesperson Edwin Lacierda mipakanaog sa maong pamahayag atol sa regular press briefing sa Malakanyang ning Miyerkoles human ang Senado mipasa sa Sin Tax Bill nga gipamatud-an nga dinalian sa Presidente ning Martes sa gabii.

"Kini ang nakatabang sa administrasyong Aquino sa iyang walay hunong nga tinguha pagkab-ot sa universal health care nga naghatag gibug-aton sa pagtuo nga ang healthcare usa ka katungod ug dili pribilihiyo sa atong nasud," matud pa ni Lacierda.

"Atong gidayeg ang malig-on nga commitment ni Senador Franklin Drilon kinsa mao ang nagpasiugda ning maong mahinungdanon nga balaodnon dinha sa hataas nga proseso ug ang tanang mga senador miboto sa among balaodnon," dugtong pa niya.

Ang kagamhanang Aquino nagpasalamat sa daghan nga mga nagsuporta sa kagamhanan ug civil society sa pagpadayon sa maong dinalian nga reporma.

"Ang pag-ila ug pagpa-abante sa pagpanalipod sa maayong panglawas sa katawhan usa ka commitment nga anaa sa administrasyon ni Aquino sa iyang  social contract uban ang katawhang Pilipino. Kini ang nahimo sa atong kagamhanan, hinoon kini ang nagkinahanglan sa responbilidad sa tanang katawhan nga iyang matampo ning maong kausa," matud pa ni Lacierda.

Ang Sin Tax Bill nagtumong pagpauswag sa abot sa kagamhanan sa tinguha nga mapalig-on ang health care system sa nasud. (GCC/PCOO/PIA9-ZamboSur)

Mga nasod nga nangangkon sa West Phil. Sea kinahanglan morespeto sa soberinya sa ubang nasod, matod pa ni Pres. Aquino

Ni Alfonso T. Ruda

DIPOLOG CITY, NOV. 21(PIA)--- Ang tanang mga nasod nga nangangkon sa West Philippine Sea kinahanglang morespeto sa kabaybayonan sa teritoryo sa ubang mga estado, bisan pa man ug unsa kadako ang ilang teritoryo ug kagamhanan ang ilang naval forces, pahayag pa ni Presidente Benigno Aquino III sa gipahigayong 7^th East Asia Summit didto sa East Palace sa Phnom Penh, Cambodia niadtong Martes.

Gipahayag kini sa Presidente pinasikad sa na-establisar nga talamdan sa United Nations Convention on the Law of the Sea.

Sa samang higayon, gihatagan ug punto ni Presidente Aquino, nga pagsunod usab kini sa ASEAN-China Declaration on the Conduct of the Parties in the South China Sea.

Kinutlo ang ikalimang parapo sa DOC, ang Hepe Ehikutibo nagkanayon nga ang mga nasod nga nangangkon sa West Philippine Sea kinahanglang magpakita ug pagpugong sa ilang kaugalingon sa pagpahigayon ug mga kalihokan nga maka-apektar sa panag-ilog ug sa istabilidad sa kahusay, lakip na ang pagpuyo sa mga isla nga wala sukad puy-i,  mga corals, reefs, ug uban pang panagway ug tukmang paggunit sa diperensiya.

Nanawagan usab siya sa mga nangangkong mga nasod nga nagtagbo ug ipatin-aw abg ilang pag-angkon sa teritoryo ug pagsulbad sa maritime dispute subay sa kalibutanong balaod, ilabi na ang UNCLOS.

Ang tanang partido nga nangangkon sa giilongang teritoryo kinahanglan mosugyot ug maayong paglihok sa South China Sea ug paghatag sa ilang kinatibuk-ang commitment sa higayong mapinalisar na kini.

“Samtang ang ASEAN molusad sa pagnegotiate sa Code of Conduct, kinahanglan usab nga atong siguroon nga ang probisyon dili lamang malig-on, bug-os ug katuhoan, apan kinahanglan ang tanang partido sa Code of Conduct kinahanglan usab nga hingpit kining matinud-anon pagpatuman niini,” matod pa sa Presidente.(ATR/PCOO/PIA98-Zambo Norte)  

Pres. Aquino mihatag gibug-aton sa pagtinabangay sa mga nasod nga membro sa ASEAN ug Tsina, pagkab-ot sa ilang damgo

Ni Alfonso T. Ruda

DIP[OLOG CITY, NOV. 20(PIA)--- Si Presidente Benigno Aquino III nagkanayon nga kinahanglang ipadayon sa Association of Southeast Asian Nations ug Tsina ang pagkaplag ug mga oportunidad sa kooperasyon ug panagbug-os sa pagkab-ot sa ilang hiniusang damgo.

Sa gipahigayong ASEAN-China Summit niadtong Lunes, giila ni Presidente Aquino ang hinsog ug kusog nga paglambo sa eknomiya sa Tsina nga nakapahimo niining dominanting economic ug military power sa rehiyon ug nakaangkon ug pagdayeg gikan sa daghanang mga nasod.

Isip usa ka nasod nga di pa lang dugay mihimo ug unang lakang padulong sa kalambuan, naglantaw ang Pilipinas sa Tsina nga usa ka utokang nasod ug lideratong nangita sa kalinaw, matod pa sa Hepe Ehikutibo sa iyang intervention atol sa ASEAN-China Summit.

Iya usab nga gihisgutan ang Tsina isip usa ka ekonomikanhong lider sa rehiyon, ug nga ang kaayong ikalugway niini sa gagmayng mga nasod makapalig-on sa istabilidad sa rehiyon ug magtugot sa mga nasod sa ASEAN nga mapadayon ang paglambo taliwala sa kalibutanong walay kasiguroan.

Gihatagan ug punto sa Presidente nga kinahanglan ipadayon sa ASEAN  ug Tsina ang diyalogo ilabi na sa natad sa kooperasyon, nga naglakip sa marine environment protection; sea piracy; seafarer’s training; promosyon sa eco-tourism ug fishery;  ug ang pag-upgrade sa mga inprastaktura ug mga ekipos.

Ang Pilipinas mao ang nagsilbing host sa unang gipalapdang  ASEAN Maritime forum niadtong miaging  bulan nga gisalmotan sa daghanang mga nasod.

“Ang forum nakakita ug tanyag sa Estados Unidos nga molusad ug expanded ASEAN seafarers training kon EAST Program nga maglig-on sa seguridad sa mga barko ug mopabarog sa kapabilidad sa mga seafarers batok sa pagpamirata. Mahinungdanong kini sa Pilipinas sanglit kini man ang naglangkob sa ika-upat ka bahin sa kinatibuk-ang populasyon sa sa mga seafarers sa tibuok kalibutan,” matod pa sa Presidente.

Ang Presidente giubanan sa iyang mga kaubang membro sa ASEAN pagpakigtagbo kang Chinese Premier Wen Jiabao didto sa Palasyo sa Cambodia niadtong adlawng Lunes. (ATR/PCOO/PIA9-Zambo Norte)  

Presidente Aquino mipahayag nga ang Malaysia motabang sa Pilipinas pagdakop sa utok sa Aman Futures scam

By Gideon C. Corgue

PAGADIAN CITY, November 20 (PIA) –-Ang otoridad sa Malaysia misaad nga motabang sa mga otoridad sa Pilipinas pagdakop sa mga ginsakpan sa sindikato nga nagpaluyo sa Aman Futures scam nga nakabiktima sa liboan ka mga tawo lakip na ang local government officials sa Visayas ug Mindanao, si Presidente Benigno S. Aquino III nagkanayon ning Lunes.

“Aduna nay pasalig kung wala ko masayop, ang Ambassador sa Malaysia ngadto sa Pilipinas nagkanayon nga sila ang motabang kanato. Wala kitay mga isyu sa Malaysia kung ang pagdakop sa mga kriminal,” ang Presidente mipahayag atol sa interview uban ang Philippine media sa Sofitel Hotel, Phnom Penh, Cambodia.

Kalabot sa mga taho nga daghang mga LGUs ang nabiktima sa maong scam, ang Presidente nagkanayon nga siya ang nagpaabot sa resulta sa imbistigasyon sa Department of Justice.

Matud pa sa Presidente nga ang kagamhanan ang mipakanaog sa tukma nga mga pahimatngon sa publiko sa wala pa ang pagkabutyag sa scam ning bago pa lang samtang iyang gitumbok nga ang Securities and Exchange Commission (SEC) mipakanaog usab ug pahimatngon sa iyang website ning Hulyo ug  Department of Trade and Industry nga mihimo sa susama nga buhat ning Agusto.

Ang justice department, kinsa ang nagpahigayon na ug imbistigayon ang adunay kalisod sa pagdemanda tungod sa iyang pagkawala dinha sa mga nagreklamo ug ebidensya.

Gipangutana kung giunsa sa kagamhanan pagpanalipod sa publiko sa maong scams, ang Presidente nagkanayon nga ang iyang administrasyon magpadayon sa pagtudlo ug pagpahimangno sa katawhan mahitungod sa peligro sa pagpamuhunan nga nagtanyag sa dako ug dali nga pagbalik sa salapi.

Ang National Bureau of Investigation nagkanayon nga ang Malaysian police nangita kang Manuel Amalilio, ang gituhuan nga mao ang utok nga nagpaluyo sa Aman Futures investment kinsa ang gikataho nga nagtago sa Kota Kinabalu sa Malaysia.

Ang embahada sa Pilipinas sa Malaysia nagkanayon nga kini ang nakigtrabaho uban ang mga otoridad sa Malaysia aron pagdala balik sa Pilipinas pinaagi sa international cooperation.

Ang multibillion-peso scam nakailad sa 15,000 nga mga tigpamuhunan sa P12 bilyones sa Visayas ug Mindanao. (GCC/PCOO/PIA9-ZamboSur)

Kagamhanang Aquino mipalig-on sa kampanya batok sa investment scam sa Mindanao

By Gideon C. Corgue

PAGADIAN CITY, November 20 (PIA) –- Ang kagamhanang Aquino mipalig-on sa iyang kampanya batok sa investment scams taliwala nga ang Aman Futures investment scheme nga mibiktima sa liboan sa Mindanao, ang opisyal sa palasyo nagkanayon ning Lunes.

Si Presidential Spokesperson Edwin Lacierda nagkanayon atol sa regular press briefing sa Malakanyang nga ang Department of Trade and Industry (DTI) ug Securities and Exchange Commission (SEC) ang mihimo na sa iyang pag-awhag sa publiko nga motaho sa tanang mga scams sa ilang mga hingtungdang buhatan.

Gawas sa Aman Futures investment scam, ang mga balita nagkanayon nga adunay uban nga mga kompanya ang mihimo sa pyramid scams nga mibiktima sa ubay-ubay ka mga tawo sa pipila nga parte sa Mindanao.

"Ang mga lokal nga buhatan sa DTI  gikinahanglan nga mas

proactive tungod kay ang mga scams nahitabo sa south," matud pa ni Lacierda. 

Ang kagamhanang Aquino nag-awhag sa publiko nga magmaigmat batok sa investment companies  nga nagtanyag sa hataas nga interes, matud pa ni Lacierda.

Si Lacierda mihatag ug kaseguruhan nga ang Aman Futures ug uban nga mga kompanya ang nahilambigit sa investment fraud ang karon gi-imbistigahan na sa otoridad.

Sa nakalabay nga semana , si Interior and Local Government Secretary Manuel Roxas II mitangtang ni Zamboanga del Sur Provincial PNP Director Senior Superintendent William T. Manzan ug ni Pagadian City Chief of Police Superintendent Kenneth H. Mission kalabot sa Aman Futures investment scam.

Si Roxas mimando pagtangtang sa mga nasangpit nga opisyal sa pulis aron paglikay sa mga kahigayonan sa whitewash sa nagpadayon nga imbistigasyon sa kapulisan sa gitawag nga “get-rich-quick” scheme.

Ang hepe sa DILG nagkanayon nga si Manzan ug Mission gisuspenso tungod sa ilang walay pagpakabana pagpahunong sa Aman Futures sa ilang operations. (GCC/PCOO/PIA9-ZamboSur)

Mga lider sa ASEAN midayeg sa pagpaningkamot sa Pilipinas alang sa kalinaw

Ni Alfonso T. Ruda

DIPOLOG  CITY,NOV. 19(PIA)--- Ang mga lider sa Association of Southeast Asian Nations (ASEAN) nagpahayag ug kalipay sa pagpirma sa Pilipinas ug Moro Islamic Liberation Front (MILF) sa Framework Agreement para sa proseso sa kalinaw sa Mindanao uban ang pag-ingon nga kinahanalan niining rehiyonal nga kahugpungan ang pagsulbad sa tanang di-pagsinabtanay sulod sa ASEAN aron makalihok kini isip usa ka komunidad hangtud sa 2015.

Sa gipahigayong press conference didto sa International Press Center, si ASEAN Secretary-General Dr. Surin Pitsuwan nagkanayon nga dunay high level nga diskusyon tali sa mga lider sa ASEAN sa plenaryo niadtong Dominggo sa buntag kabahin sa panginahanglan sa pagsanta sa di-pagsinabtanay ug kagubot sa rehiyon sa ASEAN samtang nag-umol kini ug usa ka komunidad.

“Utang kini nato sa usag-usa  nga masiguro ang pagkontrol sa kagubot ug di-pagsinabtanay sa rehiyon. Nagpahayag ug pagdayeg ang mga lider sa ASEAN sa Presidente sa Pilipinas… sa gihimo niining pagpakigsabot sa mga elemento sa habagatang-bahin sa Pilipinas nga mobalik sa kalinaw, molambo ug makigtinabangay,” matod pa ni Pitsuwan nga mipasabot sa Framework Agreement nga gipirmahan tali sa Kagamhanan sa Pilipinas ug MILF.

”Ang kinabituk-ang pulso ug hunahuna sulod sa maong lawak mao nga masiguro nga gitawag nga internal conflict, internal violence, kinahanglang masulbad samtang naglihok kita padulong sa komunidad sa ASEAN,’ dugang pa ni Pitsuwan.

Ang gubat tali sa mga Muslim ug Buddhists sa sa Rakhine State sa Myanmar niadtong Oktubre naghimo sa internal conflict nga usa ka problema sa mga nasod nga membro sa ASEAN. Ang kagubot sa Myanmar nagresulta sa pagkakalas sa kinabuhi sa 89 ka tawo. Si Mynmar President Thein Sein mipakasala sa nasyonalista ug relihiyosong extremists nga mao ang hinungdan sa krisis.(ATR/PCOO/PIA9-Zambo Norte) 

Leonen malaumon ang komprehensibong kasabotan sa kalinaw uban sa MILF matapos karong Disyembre

ni Claro A. Lanipa

PAGADIAN CITY, 19 Nov. (PIA) – Ang hepe negosyador sa kagamhanan Marvic Leonen mipadayag kagahapon nga nagpabilin siya malaumon nga ang Government of the Philippines (GPH) ug ang Moro Islamic Liberation Front (MILF) mahimong taposon ang tulo ka mga annexes sa Framework Agreement on the Bangsamoro (FAB) sa dili pa matapos ang tuig bisan ang 33^rd GPH-MILF Formal Exploratory Talks natak’up na sa Kuala Lumpur, Malaysia.

Sa usa ka hiniusang panapos nga pamahayag, si Leonen ug ang iyang katumbas, nga si MILF chief negotiator Mohagher Iqbal, miingon ang pinaka ulahing sultihanay sa Malaysia “natapos sa usa ka positibong resulta.”

“Ang 33^rd round  sa Formal Exploratory Talks tali sa kagamhanan sa Pilipinas

(GPH) ug ang Moro Islamic Liberation Front (MILF) nga gipahigayon sa Kuala Lumpur niadtong Nobyembre 12-17, 2012 natapos sa usa ka positibong resulta,” ang hiniusang pamahayag nagkanayon.

”Ang Panels ug ilang Technical Working Groups (TWGs) mihimo sa ubay-ubay nga kauswagan sa paghan-ay sa annexes mahitungod sa Power-sharing ug Wealth-sharing. Ang TWG on Normalization nagtigom sa unang higayon. Ang mga miyembro niini miuyon sa gilatid nga mga isyus ug nakabaton ug positibong pagbayloay sa maong mga butang,” dugtong pa sa pamahayag.

Matod pa, “ang mga Panels ug ang ilang TWGs magtigum pag-usab sa bulan sa Disyembre aron mopadayon pagtrabaho sa tulo ka mga annexes sa Framework Agreement on the Bangsamoro. Nagpabilin sila nga masaligon aron taposon ang mga annexes sa dili pa matapos ang tuig.”

Sa iyang panak’up nga pamahayag, si Leonen mipadayag sa iyang pagkamalaumon mahitungod sa mga kauswagan sa proseso, bisan ubay-ubay pa ka mga puntos nga gibiyaan sa draft annexes nga gihimo sa atong TWGs.”

“Apan aduna ko’y pagsalig nga masulbat gayod kini,” dugtong pa niya.

Sa pikas nga bahin, si Iqbal sa iyang panak’up nga pamahayag, miuyon sa positibong panan-aw ni Leonen: Nasayod ako ang tanan naglimbasog gayod

sa dakong tinguha aron sulbaron ang daghan mga butang. Apan,  ang nagpabilin nga mga isyus ubay-ubay pa kaayo ug lisod apan uban sa hugut nga tinguha ug pagsalig sa mga partido, sa akong pagtan-aw masulbat nato kining tanan mga isyus. (OPAPP/CAL/PIA9)

Kagamhanang-Aquino nangandam alang sa hapsay nga piniliay sa 2013

Ni Alfonso T. Ruda

DIPOLOG CITY,NOV. 19(PIA)—Gisugdan na karon sa Administrasyong Aquino ang paglig-on sa operational guidelines arong masiguro ang hapsay ug malinawong piniliay sa 2013.

Ang pahayag giluwatan ni Deputy Presidential spokesperson Abigail Valte sa usa ka pakighinabi didto sa Radyo ng Bayan, DXRB human giila sa DILG ang 15 ka mga lalawigan nga “high risk” sa umaabot nga eleksyon.

Matod pa ni DILG Sec. Mar Roxas, ang 15 ka mga “high risk” nga lalawigan karong piniliay sa 2013 mao ang Abra, Pangasinan, Ilocos Sur, La Union, Cagayan, Pampanga, Nueva Ecija, Batangas, Cavite, Masbate, Samar, Misamis Occidental, Maguindano, Lanao del Sur, ug Basilan.

Sumala pa ni Valte, gi-aktibo na sa gobyerno ang Task Force SAFE 2013 kon Safe and Fair Elections 2013 nga gitahasang magbantay aron masiguro ang malinawon ug hapsay nga piniliay sa 2013.

Dugang pa ni Valte, gilig-on na sa Philippine National Police (PNP) ang mga operational guidelines o Letter of Instruction nga mag-giya sa Task Force 2013 pagtuman sa ilang tahas nga sigurhong malinawon ug hapsay ang umaabot nga eleksyon

Tipik sa tahas sa Task Force 2013 mao ang hugtanong kampanya batok sa mga pribadong armadong grupo ng gibuhi sa mga politiko ug ang pagkatap sa mga ihalas nga armas.

Lain pang tahas sa Task Force 2013 ang pag-ila sa mga mainit nga lugar panahon sa eleksyon, panapos pang pahayag ni Valte.(ATR/PCOO/PIA9-Zambo Norte)

 

Mga pangulo sa ASEAN midayeg sa Pilipinas sa Mindanao peace efforts

By Gideon C. Corgue

PAGADIAN CITY, November 18 (PIA) –- Ang mga pangulo sa Southeast Asian Nations (ASEAN) nalipay sa pagtimaan sa Framework Agreement alang sa kalinaw sa Mindanao ug nakaalinggat nga ang regional grouping gikinahanglan nga modumala kon mosulbad sa tanang internal conflict sanglit ang ASEAN region modis-og paingon sa usa ka komunidad sa 2015.

Atol sa press conference sa International Press Center sa Phnom Penh, Cambodia, si ASEAN Secretary-General, Dr. Surin Pitsuwan nagkanayon nga ang hataas nga level sa panagsulltihanay tali sa mga pangulo sa ASEAN sa 21st ASEAN Summit Plenary Session ning Domingo sa buntag mahitungod sa panginahanglan paghunog sa internal conflicts ug violence sulod sa ASEAN region sanglit kini ang nagporma sa usa ka komunidad.

“Nagsalig kita sa matag-usa kanato aron pagseguro nga ang internal violence ug kagubot ang madumala. Ang mga pangulo sa ASEAN mipadayag sa ilang pagdayeg sa  Presidente sa Pilipinas nga ang kagamhanan sa atong nasud miuyon pagpabalik sa kalinaw, kalamboan ug kooperasyon,” Pitsuwan ang mitumbok sa Framework Agreement.

“Atong seguroon nga ang internal conflict ug internal violence ang madumala ug masulbad sanglit kita ang modis-og sa ASEAN community,” iyang pagpasabot.

Ang violence tali sa Muslims ug Buddhists sa Rakhine State sa Myanmar niadtong nakalabay nga Oktubre nakahimo sa internal conflict nga usa ka suliran sa mga miyembrong nasud sa ASEAN. Ang mapintas nga krimen sa Myanmar nakapatay sa  89 ka mga tawo. Si Presidente Thein Sein sa Myanmar mibasol sa mga natsyonalista ug relihiyoso nga extremists sa maong krisis. (GCC/PCOO/PIA9-ZamboSur)

Pagpasar sa RH Bill makatabang pagkab-ot sa target sa MIllenium Development Goals sa panglawas, matod pa sa Malakanyang

Ni Alfonso T. Ruda

DIPOLOG CITY, NOV. 17(PIA)---Ang pagpasar sa Reproductive Health Bill makatabang sa Pilipinas pagkab-ot sa  target sa Millenium Development Goals may kalabutan sa panglawas, matod pa sa usa ka Opisyal sa Malakanyang.

Si Deputy Presidential Spokesperson Abigail miluwat sa maong pahayag sa gipahigayong regular press conference sa Malakanyang human migawas ang taho nga mitawag sa Senado ug Kongreso ang lima ka dagkong grupo sa patigayon alang sa daling pagpasar sa Responsible Parenthood, Reproductive Health and Population Development Act of 2011 sumala sa gitakda sa House Bill 4424 ug Senate Bill 2865.

Sa hiniusang pahayag nga gipagawas sa The Employers Confederation of the Philippines, Financial Executives Institute of the Philippines, Makati Business Club, Management Association of the Philippines, Philippines Chamber of Commerce and Industry, ilang gipahayag ang ilang pagtoo nga kinahanglang hatagan ug kadasig sa gobyerno ang responsableng pagpkaginikanan ug pag-promote sa pagplano sa pamilya isip direktang paagi para makunhoran ang kapobrehon ug pag-atiman sa panglawas sa mga inahan ug mga kabataan.

Mag-agad kini kon unsaon pagkonsidera sa mga kongresista ang pagporsigi sa mga dagkong  kompaniya nga hiniusa nilang gihatag ngadto sa mga kongresista,” pahayag pa ni Valte dihang gipangayoan ug komento sa pahayag sa mga negosyante.

Samtang dunay pipila ka mga grupo nga naghatag ug dakong panginahanglan sa pagpasar sa RH Bill aron matibhangan sa gobyerno ang level sa kaponrehon ug pagtaas sa Gross Domestice Product sa nasod, gihatagan ug punto ni Valte nga kinahanglang makab-ot sa PIlipinas ang target sa Millenium Development may kalabutan sa panglawas sa pag-atiman sa mga inahan ug pagtutok sa pagkamatay sa mga kabataan.(PCOO/PIA9-Zambo Norte)

Pres. Aquino nanguna sa ceremonial switch-on sa 97 ka sitios sa ika-62 nga Founding Anniversary sa Occidental Mindoro

Ni Alfonso T. Ruda

DIPOLOG CITY,NOV. 16(PIA)----Subling gipamatud-an ni Presidente Benigno Aquino III ang iyang kinatibuk-ang suporta sa Rural Electrification Electrification Program sa nasod dihang iyang gipangunahan ang ceremonial switch-on kagahapon sa 97 ka mga sitios dungan sa pagsaulog sa ika-62 ka tuig nga anibersaryo sa Occidental Mindoro.

Ang Hepe Ehikutibo, kinsa mao ang pinasidunggang dinapit ug mamumulong sa maong selebrasyon, giabagan sa mga lokal nga opisyal sa Occidental Mindoro sa pagpanguna ni Governor Josephine Y. Ramirez-Sato sa gipahigayong ceremonial switch-on sa Provincial Capitol Compound sa Mamburao, Occidental Mindoro. Ang tema sa anibersaryo karong tuiga,”Matuwid na Daan Tungo sa Pagbabago.”  

Lakip sa mga misugat sa Presidente sila si Occidental Mindoro Gov. Josephine Ramirez-Sato; Vice Gov. Mano Gene Mendiola; ug Paluan, Occidental Mindoro  Mayor Abelardo S. Pangilinan.

Matod pa ni Gov. Sato, si Presidente Aquino mao ang ikaduhang Presidente sa Pilipinas nga mibisita sa Mamburao, human nga gibisita sa iyang inahan nga si anhing Presidente Corazon Aquino ang nasangpit nga lalawigan.

Ang 97 ka mga sitios nagrepresentar sa mga lugar nga nasakop sa Occidental Mindoro Electric Cooperative, Inc., ug Lubang Electric Cooperative, Inc.

Sa katapusan sa Diyembre 2012, tinguha sa OMECO ug LUBLECO nga mahatagan ug sugang dagitabnon ang 38 pa ka mga sitios sa Occidental Mindoro.

Ang Kagamhanang-Aquino nagbutang ug elektripikasyon sa unahan sa mga programang pangkalambuan sa nasod pinaagi sa Sitio Electrification Program nga gipatuman sa National Electrification Administration (NEA) ug sa mga kooperatiba sa eletrisidad sa nasod.

Ang programa naglambigit sa elektripikasyon sa of grid ug off-grid pinaagi sa kooperatiba sa elektrisidad.

Gawas sa ceremonial switch-on sa mga sitios, si Presidente Aquino nanguna usab sa ceremonial inauguration sa Mompong-Yapang Bridge nga nahimutang sa Barangay Sablayan, Occidental Mindoro. Gi-abagan siya ni DPWH Sec. Rogelio Singson ug mga opisyales sa Occidental Mindoro.

Human niini, gidumala usab ni Presidente Aquino ang pagpanumpa sa katungdanan sa bag-ong napiling mga opisyales ug membro sa Partido Liberal sa Occidental Mindoro.(ATR/PCOO/PIA9-Zambo Norte)

Aquino nanawagan sa mga electrical engineers nga tabangan ang gobyerno nga makab-ot ang hingpit mga elektripikasyon sa nasod

Ni Alfonso T. Ruda

DIPOLOG C ITY, NOV. 15(PIA)---Dako ang paglaum ni Presidente Benigno Aquino III nga tabangan sa mga electrical engineers ang gobyerno nga mapatuman ang hingpit nga elektripikasyon sa tanang mga barangay sa nasod.

“Lakip sa mga tumong sa gobyerno nga ma-establisar ang hingpit nga elektripikasyon sa atong mga sitios, ug uban sa inyong pagkamabinantayon ug suporta, ang atong damgong mahatagan ug gahum ang matag Filipino, makaangkon ra ug katumanan,” matod pa sa Hepe Ehikutibo sa iyang mensahe sa Institute of Integrated Electrical Engineers of the Philippines Inc., (IIEE) sa ilang unang Power Quality Asia Conference niadtong Miyerkules.

Ang Institute nagpahigayon sa ilang unang Power Quality Asia Conference uban ang temang “Power Quality and Energy Efficiency. A Solution to Climate Change,” sa SMX Convention Center, Pasay City.

“Ang hagit alang sa energy efficiency miabot usab sa panahon diin ang natural nga katalagman nagtukmod kanato nga huna-hunaon pag-usab ang atong estratehiya sa pagdumala ug paggahin sa atong mga resources,” matod pa sa Presidente uban ang pag-ingon nga ang kalihokan maghatag ug kahigayonan para sa mga electrical engineers nga ma-istoryahan ang epekto sa kausaban sa klima sa industriya sa enerhiya.

“Ang pagsulbong sa ekonomiya sa nasod giubanan sa pakigtinabangay, samtang inyong gidevelop ang inyong propisyon uban ang nagkahiusang mga abilidad  padulong sa nasudnong kalambuan. Pinaagi sa inyong inisyatibo nga ma-promote ang ethical standards, ma-facilitate ang pag-uswag sa teknolkohiya sa inyong dulaanan ug mapabilin ang kahibalo ug kaalam pinaagi sa padayong professional education program, ikaw nagpabiling usa ka malig-ong kusog sa inyong dulaanan,” matod pa ni Presidente Aquino. (ATR/PCOO/PIA9-Zambo Norte)   

Pilipinas moabiba sa suporta sa Estados Unidos pagsulbad sa isyu sa West Philippine Sea

By Gideon C. Corgue

PAGADIAN CITY, November 15 (PIA) –- Bisan unsa nga pagsuporta nga panawagan alang pagsunod sa balaod pagsulbad sa panagbangi sa West Philippine Sea usa ka dakong tabang alang sa adbokasya pagsulbad sa panagbangi sa malinawon nga paagi, ang opisyal sa foreign affairs nagkanayon ning Miyerkoles.

Sa media briefing sa Malakanyang sa pagtambong ni Presidente Benigno Aquino III’ sa 21st ASEAN Summit sa Cambodia, si Foreign Affairs Spokesman Raul Hernandez mipahayag nga ang tabang ni US President Barack Obama alang sa malinawon nga kasulbaran sa maong isyu usa ka mainiton nga pag-abiba alang sa ASEAN ug Pilipinas.

“Isip sa mga kaabag sa dayalogo, kini ang makapalambo sa relasyon tali sa Estados Unidos ug ASEAN ug natuo ako nga ang pagpunting mao ang ASEAN ug ang iyang relasyon uban sa Estados Unidos,” matud pa ni Hernandez.

“Kung unsa man ang matabang sa mga kaabag sa dayalogo lakip na ang Estados Unidos nga iyang matabang aron pagpadayon sa malinawon nga kasuilbaran sa isyu sa West Philippine Sea ang tubay sa international law ilabi na ang UN Convention on the Law of the Sea, ang makabatan sa atong adbokasya,” dugtong pa niya.

si Hernandez nagkanayon nga sila ang naglaum usab sa mga postibo nga kalamboan dili lamang sa  isyu sa West Philippines Sea apan lakip na ang East Sea, kinsa mao usab ang gikabangian nga dapit tali sa Japan ug China.

Samtang siya ang dili makasulti sa hataas nga panagsultihanay sa maritime issues, ang mahinunganon nga butang nga ang Pilipinas nakapunting sa panginahanglan sa malinawon nga kasulbaran tubay sa international law ilabi na sa United Nations Convention on the Law of the Sea (UNCLOS), matud pa ni Hernandez. 

Lakip na nga miuban sa mga pangulo sa ASEAN sa 21st ASEAN Summit mao ang mga pangulo sa Australia, China, India, Japan, New Zealand, Republic of South Korea, Russia ug United States. (GCC/PCOO/PIA9-ZamboSur)