Ni Claro A. Lanipa
PAGADIAN CITY, 11 April (PIA) – Gimandoan ni Presidente
Benigno S. Aquino III ang Human Development ug Social Development Clusters nga gipangulohan sa National
Economic Development Authority (NEDA) ug ang Department of Social Welfare and
Development (DSWD), aron sa paghimo ug usa ka hulip nga balaodnon aron sa pagtuboy
ngadto sa sunod nga Kongreso, matod pa ni Social Welfare and Development
Secretary Corazon Juliano-Soliman.
“Ang DSWD ug NEDA sa hingpit motrabaho aron sa pagduso
sa usa ka balaodnon isip hulip sa Magna Carta alang sa mga kabos.
Naglaom kita sa pagsubmitir sa maong balaodnon sa unang o ikaduhang adlaw sa
pagsugod sa Kongreso sa bulan sa Julyo. Ang gilaraw nga mga lakang
tin-aw magpadayag sa progresibong implementasyon sa Magna Carta, lakip ang
tinubdan sa pondo niini, mipasabot si Secretary Soliman.
Dugang gipasabot ni Soliman nga ang desisyon ni
Presidente Aquino aron sa pag beto ang gilaraw nga Magna Carta alang sa mga
kabos mapamatud-an, ug matod pa ang Presidente dili mohatag ug dili tinuud nga
paglaom ngadto sa mga kabos tungod kay ang kagamhanan walay igong pondo alang
sa maong lakang.
Si Sec. Soliman miingon nga nakit-an ni Presidente Aquino
nga ubay-ubay sa mga probisyones sa
gilaraw nga balaodnon lisod sa pagpatuman, diin ang kagamhanan dili makapatuman
niini tungod sa limitadong tinubdan sa pondo.
Ang gilaraw’ng Magna Carta alang sa mga kabos gitumong
sa paghatag ug garantiya sa mga katungod sa mga kabos sama sa pagkaon,
pag-empleyo ug panginabuhian, kalidad nga edukasyon, puluy-anan, ug ubang mga
nahaunang mga serbisyo sa panglawas “isip matang sa katungod.”
Gipaluwat usab ni Secretary Soliman ang mga pagsaway
nga si Presidente Aquino wala mohatag ug pagtagad sa mga kabos, iyang gikutlo
nga 30 porsiento sa nasudnong pondo sa 2013 ang gigahin alang sa paghatod sa
mga nahaunang serbisyo.
“Sama sa Pantawid Pamilyang Pilipino Program, sa pagka
karon adunay 3.9 million ka mga household beneficiaries. Aduna usab 5.2 million
pobreng pamilya ang nakabenepisyo sa PhilHealth,” dugtong ni Soliman. (CAL/PIA9)
