Ni Alfonso T. Ruda
DIPOLOG CITY, SEPT.
23(PIA)--- Mibiya
na si Presidente Benigno Aquino III sa Dakbayan sa Zamboanga niadtong Domingo,
siyam ka adlaw human nahidangat sa maong dakbayan aron personal nga tan-awon
ang operasyon sa militar batok sa Moro National Liberation Front(MNLF)- Nur
Misuari faction nga misulong sa Zamboanga City niadtong Septyembre 9 aron iporsigi
ang ilang kaugalingnan.
Sa
usa ka televised press conference, ang Presidente misaad nga magpadayon ang
operasyon sa militar batok sa MNLF-Misuari faction apan ila kining himoon sa
hinay-hinay ug mainampingon nga paagi aron masiguro ang kaluwasan ug kagawasan
sa mga bihag nga anaa sa kamot sa maong grupo.
“Kinahanglan,
hinay ug hunahunaon ug maayo ang kon unsaon nga makab-ot ang labing unang misyon
nga mao ang pagsiguro sa kaluwasan sa mga bihag ug sa mga inosenteng sibilyan
nga maipit sa sinukliay sa bala,” nagkanayon ang Presidente.
Matod
pa usab sa Presidente, base sa taho, ang rehabilitasyon sa Dakbayan sa
Zamboanga mogasto ug 3.89 bilyones ka pesos. Hinuon,
gipahibalo siya sa Department of Budget and Management (DBM) nga ang 6.2 bilyones
ka pesos gikan sa calamity ug discretionary fund anaa na ug mahimo nang gamiton
alang sa maong katuyoan.
“Busa
biyaan kon na kini sa mga maayong kamot sa Kalihim sa Nasudnong Panalipod,
Kalihim sa Interior and Local Government, ug Kalihim sa Social Welfare and
Development. Ako pod nga susihon ang ubang mga lugar sa nasod aron masiguro nga
naatiman usab sila, ingon man ang mga nalangang trabaho ning milabay nga mga
adlaw,” matod pa sa Presidente.
Miingon
usab ang Presidente nga iya usab nga susihon ang atong mga kaigsoonan sa lalawigan
sa Zambales ug Amihanang-Luzon nga naapektahan sa bagyong Odette, ingon man
makigtagbo usab siya sa mga hingtungdang ahensiya sa kagamhanan kabahin sa
pagtudlo ug bag-ong Deputy Ombudsman samtang gipahigayon ang imbestigasyon sa
giingong di-tukmang paggamit sa Priority Development Assistance Fund(PDAF).
“Mouli
ko kay tan-awon usab nako ang Batanes,” nagkanayon ang Presidente.(ATR/PCOO/PIA9-Zambo Norte)
