DBM mipagawas sa P4.8-B pension alang sa miretirong kapulisan

Ni Claro A. Lanipa

PAGADIAN CITY, 29 Jan (PIA) – Gipahibalo sa Department of Budget and Management (DBM) nga gipagawas na nila ang P4.83 bilyon nga pondo aron sa pagbayad sa mga benepisyo  sa 54,660 miretirong  sakop sa Philippine National Police (PNP). Ang maong binulan nga pension makuha sa mga pensyonado  pinaagi sa electronic payments kon Automated Teller Machine (ATM).

Ang nasangpit nga  pondo gamiton sa pagbayad sa mga miretirong kapulisan gikan sa bulan sa Enero hangtod Marso 2013.

“Bisan sa atong tinguha sa paghatag sa tukmang suporta ngadto sa atong mga miretirong kapulisan, gusto usab nato maseguro nga ang pagbayad sa ilang pension mahimong transparent ug accountable nga pamaagi. Ang pagbahiln ngadto sa electronic payments sa binulan nga pension makatabang kanato sa pagpreserbar sa katukma ug kaangayang panahon sa pagbayad sa mga pension, aron ang mga miretiro madawat sa ilang binulan nga pension sa mas madali ug masangputon, matod pa ni Budget and Management Secretary Florencio Abad.

Giingon usab ni Abad ang paggamit sa ATM sa pagbayad sa pension – kaysa tradisyonal pagbayad pinaagi sa tseke – nakatabang sa kagamhanan sa pagwagtang sa mga tinumotumo o “ghost” paglista sa PNP pensioner database. Dugtong pa niya nga ang electronic banking makasanta usab sa gitawag fraudulent accounts, tungod kay ang pagmugna sa usa ka ATM account nagkinahanglan man ang linawas pagpakita ug mga balidong dokumento gikan sa nagalaum account holder.

Sukad sa Disyembre 31, 2012, ang PNP adunay 63,465 ka mga retirees, diin 54,660 kanila ang adunay ATM accounts sa Land bank of the Philippines (LBP). Gawas sa PNP, ang Armadong Kusog sa Pilipinas (AFP) ug ang Philippine Veterans Affairs Office (PVAO) mibalhin usab sa paggamit sa ATM alang sa ilang mga benepisyo.

Ang lakang sa paghatag sa pensyon pinaagi sa ATM  kabahin sa tinguha sa adminsitrasyong Aquino alang sa mas malamboong kasihag ug masangputong mga palakat sa kagamhanan. Ang maong reporma sa digitization sa nasud nakadawat ug mga pagdayeg gikan sa Better Than Cash (BTC) Alliance High-Level Panel Discussion, nga gipahigayon ning Enero 23 atol sa World Economic Forum sa Davos, Switzerland. (PCOO/CAL/PIA9)

Senado mipasa ug balaodnon batok sa hubog nga mga drivers

By Gideon C. Corgue

PAGADIAN CITY, January 29 (PIA) –- Ang Senado ning Lunes miaprobar sa ikatulo ug katapusan nga pagbasa sa balaodnon pagpahamtang ug bug-at nga silot sa mga drivers nga nagmaneho ilawom sa impluwensya sa ilimnon nga makahubog o druga aron pagkunhod sa aksidente sa mga kadalanan sa nasud.

Ang Senate Bill No. 3365 kon Anti-drunk and Drugged Driving Act of 2012 ang gipapangamahanan ni Senador  Gregorio Honasan, chairman sa Committee on Public Order and Dangerous Drugs.

Ilawom sa giplano nga balaodnon, si Honasan nagkanayon nga ang mga driver nga masakpan nga magmaneho ilawom sa impluwensya sa ilimnon nga makahubog kon druga apan nakahimo sa pagkasamad kon pagkamatay ang pagasilutan gikan sa P20,000 ngadto sa P80,000 ug moatubang sa tulo ka bulan nga pagkapriso.

Matud pa niya nga ang DUI mirelsuta pagkasamad ang pagsilotan gikan sa P100,000 ngadto sa P200,000 ug mag-atubang pagkapriso gikan sa tulo ka bulan ngadto sa 12 ka tuig nagdepende sa samad nga gidulot samtang ang DUI nga moresulta sa kamatayon ang pagasilotan gikan sa P300,000 ngadto sa P500,000 kon pagkapriso gikan sa 12 ka tuig ngadto sa 20 ka tuig.

Dugtong pa ni Honasan nga ang non-professional driver’s license sa mga molapas ang pagsakmitan ug isuspenso sa 12 ka bulan sa una nga pagkahukom nga sad-an ug pagawagtangon sa ikaduha nga paghukom nga sad-an.

Sa pikas nga bahin, ang professional driver’s license sa mga molapas ang pagasakmiton ug hingpit nga pagawagtangon sa una nga conviction.

Ang hingpit nga pagwagtang sa driver’s license, dili hatagan ug katakus ang tawo nga mahatagan ug bisan unsa nga driver’s license, matud pa niya.

Matud pa niya ang  mandatory alcohol ug drug testing gikinahanglan alang sa mga drivers nga nahilambigit sa mga aksidente nga moresulta ngadto sa pagkasamad o kamatayon.

“Kining balaodnon nagpalig-on sa Land Transportation Traffic Code of 1964 kinsa dul-an sa 50 ka tuig ang nakalabay ang gimugna aron pagsilot sa mga hubog nga drivers nga adunay tulo ka bulan nga pagkapriso,” matud pa ni Honasan. (GCC/PCOO/PIA9-Pagadian City)

Pamahayag sa DSWD mahitungod sa ‘Anti-Epal’ campaign sa Pantawid Pamilya

Ni Claro A. Lanipa

PAGADIAN CITY, 29 Jan (PIA) – Sa pipila nga milabay’ng mga adlaw, ang Department of Social Welfare and Development (DSWD) ilabi ang programa sa Pantawid Pamilyang Pilipino kon nailhan isip Conditional Cash Transfer program nakadawat sa mga negatibong pagsaway tungod sa gitawag Anti-Epal Campaign.

Ang Anti-Epal Campaign usa ka kampanya gitumong sa paglain sa Pantawid Pamilya panahon sa  kampanya sa piniliay. Gitumong usab kini aron sa pagpalapad sa tinguha sa komunikasyon  aron maseguro nga ang  mga benepisyaryo masayran  sa husto mahitungod sa selection ug delisting nga mga proseso.

Gihimo sa DSWD kining kampanya sa diha nakadawat sila mga feedback gikan sa mga benepisyaryo nga ang ilang pumipiling kandidato naghulga kanila nga kon dili sila mosuporta sa ilang kandidatura  pagatangtagon sila sa listahan.

Ang mensahe sa maong kampanya gitutukan nga ang DSWD lang ang mahimong motangtang ang ilang mga ngalan kon sila dili motuman sa mga kasabutan sa programa.

Sa milabayng pipila ka tuig, ang DSWD makanunayon sa pagpatuman sa ilang katungdanan sulod sa sumbanan sa accountability ug transparency.

Sa tuig 2012, ang DSWD nakadawat sa alokasyon sa P39 bilyon alang sa programa sa Pantawid Pamilya. Niini, P35 bilyon ang gigahin alang sa  cash grants sa 3.1 milyon ka mga household-beneficiaries sa maong programa. Ang nahibilin nga P3.9 bilyon gigamit alang sa mga galastohon sa operasyon sa programa lakip pondo alang sa Social Marketing and Advocacy mnga bahin sa maong programa. (DSWD/CAL/PIA9)

AFP mikondenar pagpangtake sa rebelde sa Negros Occidental

By Gideon C. Corgue

PAGADIAN CITY, January 28 (PIA) –- Ang Armadong Kusog sa Pilipinas ning Lunes mikondenar sa pagpangatake ning Domingo sa Negros Occidental sa New People's Army kinsa miresulta sa kamatayon sa siyam ka mga tawo, walo niini mga civilians, ug ang nasamdan siyam.

"Samtang kita ang nagsuporta sa mga paningkamot sa kagamhanan sa kalinaw ug kalamboan, ang atong gipunting nga combat operations ang magpadayon pagpangita sa mga nagpadayon sa armadong pakig-away nga maoy naghatag pag-antos sa atong katawhan ug pagkawala sa mga inosente nga mga kinabuhi," matud pa ni Col. Arnulfo M. Burgos, Jr., ang military spokesperson.

Gidugtong pa niya nga ang NPA mihimo pagpangatake bisan pa man sa pagbukas sa AFP sa mga rebelde nga mobalik sa demokratikanhong pamaagi.
"Ang mga NPA nagpadayon paghimo sa armadong kapintas, nagpahunong sa peace-building initiatives sa kagamhanan ug wala nagtahud sa proseso sa kalinaw pinaagi paglapas sa kanhi ceasefire pronouncements," matud pa ni Burgos.

Ang tigpamaba sa militar nagkanayon nga ang pagpangatake ning Domingo sa mga nasangpit nga biktima ang tataw nga lain nga kalapasan sa Comprehensive Agreement on Human Rights ug International Humanitarian Law nga ilang gipirmahan.

"Sila ang nagpadayon pagpangatake lakip na ang paggamit sa  improvised explosive devices, pagpahigayon sa pagpamanhig, pagpangilkil, ug pagsabotahe sa mga mahinungdanon nga ekonomikanhong kahimanan," pahayag pa ni Burgos.

Ang AFP karon ang nakig-alayon uban sa National Police nga gipalihok nga Task Force La Castellana aron pagpangita batok sa mga mihimo sa maong salaod.

"Ang atong mga tropa sa dapit ang strikto nga mosunod sa rules of engagement, motahud ug mopalambo sa tawhanong katungod sa atong tanan nga operations," dugtong pa niya.  (GCC/PCOO/PIA9-Pagadian City)

Malacañang gisiguro nga ang gobyerno naglihok alang sa pagbalik ni Amalilio nganhi sa Pilipinas aron atubangon ang daghang sumbong

By: Mary May A. Abellon

DIPOLOG CITY,JAN. 28 (PIA)--- Gibutyag karong Lunes sa Malacañang nga ang pakyas nga paningkamot sa mga tinugyanan sa National Bureau of Investigation nga ibalik nganhi sa nasud si Manuel Amalilio, tag-iya sa Aman Futures,Inc. kay usa lamang ka “temporary setback” nga gihimo sa gobyerno para sa dali nga pagbalik niya. 

Sa usa ka press conference, hugot nga giasoy ni Presidential Spokesperson Edwin Lacierda nga si Amalilio, kun kinsa nag-atubang ug mga kaso tungod sa pagpanghila ug mga nilibo nga residente sa Pagadian ug ubang mga dakbayan sa Mindanao ug Visayas para mu butang sa ilang kwarta sa pagpatuo nga mutubo kini ug dako sa ubos lang nga panahon, kay dad-on nganhi balik sa Pilipinas para atubangon ang mga sumbong.

“O, masiguro namo. Ang kini nga pagkaalantala sa pagbalik ni Ginoong Amalilio sa giingon ni Secretary Leila de Lima kay temporaryo lang. Hugot ang among pagtuo, kauban ang atong Malaysian counterparts, madala nato balik si Mr. Amalilio,” matud pa ni Lacierda.

“Ang nahitabo atong milabay nga Biyernes kay usa lamang ka temporary setback. Naa kita karon sa proseso sa pagdala kang Mr. Amalilio balik nganhi sa Pilipinas. Busa, makasiguro kamo nga gibuhat namo ang tanan para masiguro ang repatriation  ni Mr. Amalilio sa Pilipinas,” dugang niyang asoy. 

Inubanan sa mga tinugyanan sa NBI, si Amalilio kay mubiyahe na unta balik dinhi sa Pilipinas gikan sa Kota Kinabalu, Malaysia sa milabay nga Biyernes apan subli kining gibabagan sa mga awtoridad sa Malaysia gumikan sa isyu sa citizenship. (MAA/PCOO/PIA9-Zambo Norte)    

Malakanyang, mi-awhag sa mga mall operators pagrepaso sa ilang lakang panseguridad

Ni Alfonso T. Ruda

DIPOLOG CITY,JAN. 28(PIA)--- Miapela karon ang Malakanyang sa mga mall operators nga repasuhon ang ilang tagsa-tagsa ka lakang panseguridad ug seguraduhong nakatuman kini sa higpit nga monitoring and detection protocols aron malikayan ang pagsulod sa mga armas ug uban pang matang sa illegal nga hinagiban sa ilang esteblisamento.

Ang apela gipalanog ni Presidential Spokesperson Edwin Lacierda, human ang labing ulahing pagtulis sa tindahan ug alahas sa unang andana sa SM Megamall Department Store sa Mandaluyong City niadtong Sabado.

Sa iyang pag-atubang sa mga tigbalita atol sa iyang naandang press conference sa Malakanyang, si Lacierda nagkanayon nga kinahanglang magpahigayon ug higpit nga pagrepaso ang mga mall operators uban ang koordinasyon sa Philippine National Police aron mosalig pag-usab ang publiko nga luwas pa gihapong puntahan ang mall panahon sa katapusan sa semana.

“Nianang bahina, moapela kami sa mga mall operators nga tun-an ug balik ang seguridad sa ilang mall ug sigurohon nga ang mga kagamitang panseguridad nga gibutang sa palibot sa ilang mall makahibalo ba gayod sa presensiya sa armas,” matod pa ni Lacierda. “Ang angay nilang tun-an pag-usab mao ang ilang security features ug tan-awon kon duna bay bikil ang security measures sa ubang mall operators, uban ang paglaum nga mosalig pag-usab ang ilang mga suki nga luwas pa gihapong puntahan ang ilang establisamento,” dason pa ni Lacierda. Matod pa ni Lacierda, mahinungdanong ma-mintinar nato ang kasigurohan sulod sa mall ug ubang sentro sa kalingawan. Kining mga mall nagdala ug quasi-public character nga bisan ug gipang-iya sa mga pribadong tawo, ang mga tawo mosuki gihapon niini ug gastuhon ang katapusan sa semana sa maong mga mall, duna man silay paliton o wala.(ATR/PCOO/PIA9-Zambo Norte)