COMELEC gihatagan ug P4.14-B alang sa piniliay ning tuig

Ni: Claro A. Lanipa

PAGADIAN CITY, 15 Jan (PIA) – Gipahibalo sa Department of Budget and Management (DBM) nga gipagawas na nila ang P4.14 bilyon nga pondo alang sa Commission on Elections (COMELEC) aron suportahan ang mga  kalihukan sa Synchronized National, Local ug ARMM elections karon tuiga.

Ang maong pondo gikuha sa savings gikan sa  unutilized appropriations  sa 2012 General Appropriation Act.

“Among gidugangan ang pondo sa COMELEC aron sa pagbuhat sa mga gikinahanglan pagpangandam alang sa mga piniliay ning tuig. Kining dugang pondo makahatag ug kasegurohan sa mga kalihukan sa dili pa ang piniliay nga matuman subay sa gitakdang panahon ug masangputon gayud, matod pa ni Budget and Management Secretary Florencio Abad.

Sa maong pondo, P1.54 bilyon pagagamiton alang sa mga galastohon sa Synchronized National ug Local Elections, samtang ang P755.08 milyon pagagamiton sa pagpalit sa mga PCOS machines, sama sa pagpalambo sa collateral, software support ug maintenance, pagbansay ug galastohon sa mga seminars.

Uban mga butang ilalom sa maong pondo  naglakip sa P100.9 milyon, nga gigahin usab alang sa mga kinahanglanon sa Overseas Absentee Voting.

Gipamatuud usab ni Abad nga ang P4.14 bilyon gamiton lang alang sa mga kalihukan nga may kalimbigitan sa 2013 nga piniliay, ug ang tanan  wala nagamit nga kuwarta ubos sa maong pondo dili mahimong gamiton alang sa uban galastohonon  sa katapusan sa tuig. (PCOO/CAL/PIA9)

Gobyerno, nagplanong gunitan ang tanang websites sa kagamhanan

Ni Alfonso T. Ruda

DIPOLOG CITY,JAN. 15(PIA)---Gitun-an karon sa Malakanyang ang sugyot nga gunitan sa gobyerno ang tanang websites sa kagamhanan aron malikayan nga maguba sa mga manikbasay ang nawong niini sa umaabot nga mga adlaw.

Sa usa ka briefing, gipahayag ni Presidential spokesperson Edwion Lacierda nga ang pagbalhin sa mga websites sa gobyerno ngadto sa balay sa gobyerno maoy magsiguro sa ilang kaluwasan gikan sa mga manikbasay isip teritoryo sa gobyerno nga dumalaon sa Department of Science and Technology(DOST).

“Kadtong mga websites nga gidumala sa gobyerno luwas; pananglitan ang PCDSPO kon Presidential  Communication Development and Strategic Planning Office ug Official Gazette (OG) gidumala sa gobyerno ug bisan unsang pag-atake nga gihimo sa mga manikbasay sa OG, wala gyud sila molampos pagguba niini,” matod pa ni Lacierda.

“Pipila ka mga websites sa gobyerno gidumala sa mga pribadong grupo ug ang sugyot nga ibalhin kini sa pagdumala sa gobyerno kasamtangang gitun-an karon sa Malakanyang, midugang pa si Lacierda.

Ang unom ka mga websites sa gobyerno; http://pro8.pnp.gov.ph/, http://mambulao.gov.ph/, http://www.cpa.gov.ph/, http://mmda.gov.ph/, http://nfa.gov.ph/, http://www.nmp.gov.ph/) gibuak sa mga manikbasay di palang dugay aron ipakita  ang ilang sentimiento batok sa Anti-Cyber Crime Act of 2012 nga gipirmahan ni Presidente Benigno S. Aquino III niadtong Septyembre aron mahimong hingpit nga balaod. ATR/PCOO/PIA9-Zambo Norte)

Presidente Aquino nag-awhag sa Criminal Investigation and Detection Group magpabilin nga matinud-anon pagpangita sa kamatuoran ug hustisya

By Gideon C. Corgue

PAGADIAN CITY, January 14 (PIA) –- Si Presidente Benigno S. Aquino III nanawagan sa Philippine National Police - Criminal Investigation and Detection Group (PNP-CIDG) nga magpabilin nga matinud-anon sa ilang pagpangita sa kamatuoran ug pagpatuman sa balaod.

"Ang pagmentenar sa kahusay ug kalinaw usa ka mahinungdanong aspeto sa atong tahas pagtukod sa nasud: usa ka luwas nga katilingban nga makahatag kaseguruhan sa iyang mga katawhan sa kagawasan pagpadayon sa iyang mga kalihokan nga mahinungdanon sa ilang personal nga kalamboan ug nagiya ngadto sa atong hinusan nga kalampusan," ang Hepe Ehektubo nagkanayon sa iyang mensahe sa CIDG sa kasaulugan sa ika-60 ka tuig nga Founding Anniversary. 

Ang Presidente nagkanayon nga ang CIDG, isip usa ka investigative arm sa PNP naghimo sa iyang mahinungdanong kaakuhan ngadto sa pagkaangkon sa nasudnong damgo. 

Iyang gihatagan ug gibug-aton nga ang specialized skills ug training sa CIDG usa ka mahinungdanon aron pagsulbad sa mga krimen ug pagseguro nga kung kinsa ang mohatag peligro sa kinabuhi ang manubag sa balaod."

"Hinaut nga kamo ang malign-on sa inyong paghimo sa inyong kalampusan sa nakalabay nga unom ka dekada. Kini nga anibersaryo usa usa ka garbo nga panghimatuod sa inyong mga katungdanan isip kawani sa CIDG. Nagpakita sa inyong kadasig, kadungganan, ug kahawod sa inyong trabaho nga kita ang makapadayon sa malinawon ug mauswagon nga nasud nga atong tinuod nga matawag nga panimalay. Ako ang nanghinaut kaninyo sa malipayon ug makahuluganon nga anibersaryo," matud pa sa Presidente. (GCC/PCOO/PIA9-Pagadian City)

Framework Agreement mohatag pagpanalipod sa tanan - hepe sa GPH

Ni Claro A. Lanipa

PAGADIAN CITY, 14 Jan (PIA) -- Gibutyag ni Miriam Coronel Ferrer ang hepe sa GPH negotiating panel atubangan sa mga Obispo sa Simbahang Katoliko, kaparian, mga presidente sa Jesuit University  ug mga pangulo sa peace centers sa Mindanao, “nga adunay angay nga proteksyon alang sa tanan ubos sa gitawag “Framework Agreement on the Bangsamoro.”

Si Coronel-Ferrer miila sa gibati sa pipila ka mga sumasalmot nga adunay halapad nga suporta alang sa Framework Agreement on the Bangsamoro (FAB) nga gipirmahan sa kagamhanan ug ang Moro Islamic Liberation Front (MILF), aduna usab mga kalabaka mahitungod sa walay kasegurohan, isyu sa yuta ug ang politikanhong kahimtang mosamot mograbe.

“Kining mga kalabaka anaa na sukad sa pa una,” miingon si Coronel-Ferrer. “Dili kini resulta gumikan sa FAB.” Kabahin kini sa gitawag unacceptable status quo nga gipangandoy nato mausab pinaagi sa proseso sa kalinaw.”

Si Bishop Jose Colin Bagaforo, Auxiliary Bishop sa Cotabato mitaho nga walay nahitabong panag-enkuwentro tali sa puwersa sa kagamhanan ug ang MILF sukad napirmahan ang FAB.

Gikutlo usab ni Bagaforo, “ nga miuswag ang patigayon ug gibati sa mga katawhan nga mas luwas sila mogawas aron magabi-abi ug mamuhunan.” Usa kini ka timailhan sa hataas nga kalauman sa FAB nga sa katapusan ang kalinaw, kalig’on ug kalamboan anaa sa Cotabato ug sa Central Mindanao, gipatigbabaw sa Obispo.

Apan, nabalaka usab si Bishop Bagaforo nga ang non- Bangsamoro sulod sa teritoryo dili makabaton sa makahuluganong politikanhong paglambigit.

Isip tubag, si Coronel-Ferrer mipadayag nga ang pagrespeto sa nahaunang katungod sa tawo o grupo subli gibutyag sa FAB. Ang Bangsamoro Basic Law nagtanyag usab ug luna alang sa mga sekta sama sa lumad, mga lumulupyo ug mga kababaihan aron maseguro ang ilang papel sa pangagamhanan.

Gipangulohan sa Episcopal Commission in Inter-Religious Dialogue of the Catholic Bishops’ Conference of the Philippines, ang maong tigum gitumong sa pagpatin-aw sa papel sa Simbahang Katoliko sa pagkab-ot sa kalinaw. (OPAPP/CAL/PIA9)