Pres. Aquino, malaumong mahinayon ang diyalogo uban sa Tsina

Ni Alfonso T. Ruda

DIPOLOG CITY, SEPT.13(PIA)---Nagpabilin gihapong naglaum si Presidente Benigno Aquino III nga mahinayon ang diyalogo uban sa Tsina aron matuki ang mga mahinungdanong isyo  nga nagumikan sa pagpangangkon ug teritoryo sa duha ka  nasod sa West Philippine Sea.

Sa usa ka interview, ang Presidente miingon nga ang kinasing-kasing  nga sinultihay nga matinud-anon ug bukas mahimong mao na ang dalan padulong sa kasulbaran sa isyo.

“Naglaum gihapon ako nga mahinayon ang diyalogo uban sa Tsina diin makahigayon kami alang sa kinasing-kasing nga sinultihay ug matinud-anon nga sinukliay sa hunahuna uban ang kinatibuk-ang kamatinud-anon ug  bukas,” nagkanayon ang Presidente uban ang pag-ingon nga posibling kini na ang dalan padulong sa kasulbaran sa problema.

Matod pa sa Presidente nga bisan ug ang ilang miting uban ni Chinese President Hu Jintao nga angayng nahitabo unta sa kilid sa Asia-Pacific Cooperation (APEC) Leaders Summit didto sa Vladivostok, Russia niadtong miaging semana wala man mahinayon, bukas gihapon ang kagamhanan sa Tsina sa ideyang pagpahigayon ug sinultihay kabahin sa maong isyo uban kanato.

“Ang hapit na mahitabong miting sa Vladivostok mao ang usa niini. Ug siguro akong bukas usab sila sa ideyang ipadayon ang sinultihay,” matod pa ni Presidente Aquino.(ATR/PCOO/PIA9-Zambo Norte)

Ministro sa Kalihokang Langyaw sa Argentina moari sa Pilipinas

Ni Alfonso T. Ruda

DIPOLOG CITY, SEPT. 13(PIA)---  Ang Ministro sa Kalihokang Langyaw sa Argentina mahidangat sa Manila karong adlawa, alang sa iyang duha ka adlawng pagbisita dinhi sa Pilipinas nga nagtumong sa pagpalig-on sa ekonomikanhon ug politikanhong relasyon sa duha ka nasod, matod pa sa Departamento sa Kalihokang Langyaw sa Pilipinas.

Si Minister of Foreign Affairs and Worship sa Republika sa Argentina, Hector Trimman magpabilin dinhi sa nasod hangtud ugma ug makigtagbo sa mga opisyales sa Pilipinas, lakip na sa iyang counterpart nga si Albert del Rosario, aron tukion kon unsaon pagpalig-on sa Pilipinas ug Argentina ang ilang relasyon ug katawhan, ingon man kulturanhong kalihokan.

Si Trimman gidapit ni del Rosario dihang nagkita sila sa gipahigayong Ministerial Meeting on the Forum for East Asia and Latin America Cooperation didto sa Buenos Aires, Argentina niadtong miaging bulan.

Kini ang labing unang higayon nga mobisita dinhi sa nasod ang usa ka Ministro sa Kalihokang Langyaw gikan sa Latin America panahon sa administrasyon ni Presidente Benigno Aquino III.

Ang Pilipinas ug Argentina nagpahimulos na sa diplomatikanhong relasyon sa nakalabayng 64 ka tuig, usa sa unang estado sa Latin America diin nag-establisar ang Pilipinas ug bilateral ties. 

Sa ilang miting, gilaumang tukion ni Trimman ug Del Rosario ang mga mahinungdanong isyo sa natad sa patigayon, pamuhonan, ekonomiya, rehiyonal ug kalibutanong kalambuan, ug kulturanhon kooperasyon ug pagbinayloay.

Makigtagbo usab si Trimman sa  mga magbabalaod sa Pilipinas nga membro sa Philippine-Argentina  Parliamentary Friendship Association, ingon man sa mga public figures, academics, ug mga negosyante.

Magtagbo usab ang mga opisyales sa duha ka nasod alang sa unang miting sa Philippine-Argentina Joint Technical Group on Technical Cooperation nga magpanday ug Workplan para sa implementasyon sa Philippine-Argentina Memorandum of Understanding (MOU) on Technical Cooperation.

Ang kasabutan nagtumong usab nga mangitag paagi kon unsaon sa PIlipinas ug Argentina nga makabenepisyo sa mga best practices ug kasinatian sa mga priority areas sama sa biotechnology, renewable energy ug medisina.(ATR/PCOO/PIA9-Zambo Norte)