Malakanyang naghatag ug impormasyon kabahin sa Konstitusyon ug Kasaysayan

Ni Alfonso T. Ruda

DIPOLOG CITY, FEB. 3(PIA)… Ang Malakanyang namahayag nga mahimo nang makakuha karon ug detalye ang publiko kabahin sa Konstitusyon sa Pilipinas sa website sa Palasyo  ug sa kasaysayan sa nasod samtang gisaulog ang ika-25 ka tuig nga Constitution Day, kagahapon, Pebrero 2.

Si anhing kanhi Presidente Corazon C. Aquino miproklamar niadtong 1988 nga ang Pebrero 2 himoong usa ka nasudnong paghandum sa pagka-ratipika sa 1987 Constitution niadtong Pebrero 2, 1987.

Isip kontribusyon sa pagsaulog sa Constitution Day, ang buhatan sa Presidential Spokesperson, uban ang Presidential Communications Development and Strategic Planning Office, mihimo usab ug paagi nga makakuha na ang publiko ug impormasyon kabahin sa Konstitusyon ug kasaysayan sa nasod.

Kini maglakip sa briefer sa kasaysayan sa konstitusyon, ingon man kasaysayan sa pagsaulog sa Constitution Day sa nasod.

Gawas niini, duna usay educational info-graphic map nga magpakita sa distribusyon sa mga delegado sa 1934 ug 1971 Constitutional Conventions.

Nagpresentar usab kini sa nagpadayong digital colorization project sa gobyerno, ang colorized archival images sa 1899 Malolos Congress; 1934 Constitutional Convention ug eleksyon niadtong 1943 sa National Assembly o Nasudnong Asembliya.(ATR/PCOO/PIA9-Zambo Norte)   

GDP sa Pilipinas misaka ug 6.8% sa ika-4 nga quarter sa 2012

Ni Alfonso T. Ruda

DIPOLOG CITY,FEB. 3(PIA)--- Ang Gross Domestic Product(GDP) sa nasod misaka ug 6.8 porsiento sa ika-upat nga quarter sa 2012.

Ang pagtubo nagumikan sa maayong dagan sa sektor sa serbisyo nga gipangunahan sa Trade and Real Estate, abang ug mga kalihokan sa patigayon, ingon man sa dakong paglambo sa manufacturing ug konstruksyon.

Sa bahin sa demand, ang Household Final Consumption Expenditures uban sa paggasto sa gobyerno, ang pagbawi sa capital formation, ug ang maayong dagan sa patigayon sa gawas nakatampo ug dako sa himsog nga pagtubo sa ekonomiya sa nasod sa ika-upat nga quarter ug sa tuig 2012 sa kinatibuk-an.  

Sa tiuig nga basehan, ang Gross National Income ug Net Primary Income gikan sa tibuok kalibutan misaka ngadto sa 5.8% ug 3.2% niadtong 2012 gikan sa 3.2 % ug 1.0% sa 2011.

Sa ika-upat nga quarter, misaka ang NPI ug 0.9% niadtong 2012 gikan sa 6.2% sa susamang panahon sa 2011 nga nagresulta sa pagtubo sa GNI ug 5.4% sa 2012 gikan sa 4.5% sa gisundan nga tuig.

Samtang ang seasonally adjusted GDP mitubo ug 1.5% ug GNI ug 1.2% sa kasamtangang quarter.  Ang Agriculture, Hunting, Forestry, ug Fishing misaka ug 0.1% ug 1.2% usab ang gisaka sa sektor sa serbisyo. Samtang misaka ug 2.5% ang sektor sa Industriya gumikan sa maayong dagan sa konstruksyon ug manufacturing.

Uban ang dakong paglambo sa ekonomiya niadtong 2012, ang per capita misutoy usab ngadto sa 4.8% gikan sa 2.2% niadtong 2011 samtang ang GNI per capita misaka usab ngadto sa 4% sa 2012 gikan sa 1.5% niadtong 2011. Sa laing bahin, ang per capita Household Final Consumption Expenditure medyo mihinay ngadto sa 4.4% gikan sa 4.5%.

Sa dakong gitubo sa ekonomiya sa 2012,ang per capita sa GNI misutoy ngadto sa 4.8%. Sa 6.8% nga gitubo sa ika-upat nga quarter, ang per capita sa GDP, GNI, ug HCFI misaka usab ngadto sa 5.1% gikan sa 2.3%, 3.7% gikan sa 2.8%, ug 5.2% gikan sa 4.6%, sumala sa han-ay sa ilang pagkabutang. ATR/PCOO/PIA9-Zambo Norte)