Administrasyong Aquino mipasalig nga dili manghilabot ang mga Opisyales sa Gabinete sa imbestigasyon sa pork barrel

Ni Alfonso T. Ruda

DIPOLOG CITY, SEPT. 5(PIA)--- Mipasalig ang administrasyong Aquino nga dili manghilabot ang mga opisyales sa gabinete sa gihimong imbestigasyon sa National Bureau of Investigation (NBI) sa pork barrel scam.

“Akong ipasalig kaninyo nga walay opisyal sa gabinete nga manghilabot sa gihimong imbestigasyon sa NBI,” nagkanayon si Presidential Spokesperson Edwin Lacierda sa pakighinabi sa mga tigbalita didto sa Malakanyang niadtong Miyerkules.

Matod pa ni Lacierda, nagpahigayon na ang NBI ug makuti ug patas nga imbestigasyon  may kalabutan sa giingong dili tukmang paggamit sa Priority Development Assistance Fund (PDAF).

“Naghimo pa lang ug kaso ang NBI,” matod pa ni Lacierda dihang gipangutana kon nganong wala pa mopasaka ug kaso ang NBI sa mga tawong anaa sa likod sa giingong 10-bilyones ka pesos nga pork barrel scam.

Sa samang higayon, gihupay usab ni Lacierda ang  kabalaka nga malangan ang imbestigasyon sa pork barrel scam gumikan sa gitunol nga “irrevocable resignation” ni NBI Director Nonnatus Rojas. Matod pa niya, nagpabilin pa gihapon si Rojas nga usa sa taas nga opisyal sa gobyerno nga nakaangkon  ug pagsalig ug kompiyansa ni Presidente Benigno Aquino III.

Sayo niini, gipahayag ni Justice Secretary Leila De Lima nga iyang irekomendar kang Presidente Aquino ang dili pagdawat sa resignasyon ni Rojas.

“Abi ninyo, ang imbestigasyon magpadayon. Ang imbestigasyon magpadayon, duna may resignasyon si Rojas o wala. Ang imbestigasyon magpadayon….ang NBI nga attached agency sa DOJ maoy mogunit niini,” matod pa ni Lacierda.

Gilantaw ni Presidente Aquino nga ang pagkaditini ni Janet Lim-Napoles maoy usa ka lakang padulong sa tukmang direksyon pagkab-ot ug hustisya ug pagdiskubre sa kamatuoran may kaabutan sa giingong dili-tukmang paggamit sa PDAF,” matod pa ni Lacierda.(ATR/PCOO/PIA9-ZamboNorte)