SWS Survey nga nagpakitag high ratings kang Pres. Aquino namatuod sa mando sa kausaban, matod sa Malakanyang

Ni Alfonso T. Ruda

DIPOLOG CITY, SEPT. 8(PIA)--- Ang labing ulahing survey sa Social Weather Station (SWS) nga nagpakita sa katagbaan sa publiko kang Presidente Benigno Aquino III nga misaka ngadto sa 77 porsiento maoy nagmatuod sa matang sa liderato nga padayong gipangasawa sa Hepe Ehikutibo aron pagkab-ot sa gikinahanglang kausaban sa institusyon ug sa gobyerno, matod pa sa usa ka opisyal sa Malakanyang.  

Ang katagbawan sa publiko kang Presidente Aquino subling misaka ug balik ngadto sa labing taas sulod sa iyang administrasyon.

Ang SWS Third Quarter Survey nagrepresentar sa impresibong 14 ka puntong paglukso gikan sa kanhing 63 porsiento nga satisfaction rating sa Presidente sa SWS Second Survey niadtong Mayo 2012,  sumala pa sa tigpamaba sa Palasyo ni Edwin Lacierda sa gipagawas nga pahayag.

“Ang kanunayng malig-ong numero mipalig-on sa mandato sa kausaban nga gusting mahitabo ni Presidente Aquino, maoy kongkretong kamatuoran sa suporta sa katawhan para sa malisod apan gikinahanglang reporma nga gustong ipatuman ni Presidente Aauino sukad pa sa unang adlaw niya sa Palasyo,” matod pa ni Lacierda.

Sukad sa labing unang survey sa SWS sa katagbawan sa publiko niadtong Septyembre 2010, ang satisfaction rating sa Presidente wala gyud manaog ubos sa 63 porsiento, hinuon misaka kini sa kasamtangan ngadto sa 77 porsiento.

Matod pa ni Lacierda, ang survey maoy pagpakita sa makanunayong katagbawan sa katawhan sa binuhatan sa Presidente.

“Kining maong resulta maoy salamin sa malig-ong pagpakita sa Pilipinas, ilabi na sa iyang mga institusyon ug gobyerno sa kasamtangang Global Competitiveness Report sa World Economic Forum. Ang kalibutanong komunidad miila sa mga reporma nga gipatuman sa administrasyong Aquino, ug dinhi sa ato, nagpakita kini sa positibong kausaban sa Presidente mismo,” dugang pa ni Lacierda.

“Ang resulta niining maong mga survey, dinhi sa sulod ug sa gawas, nagmatuod sa matang sa liderato nga kanunayng gipangasawa sa Presidente-ang transparency and accountability,  sa pagpabalik sa pagsalig sa katilingban ug pagpabarog ug balik sa institusyong pampubliko ug sa matinud-anon ug kasaligang serbisyo-publiko,” padayon pa ni Lacierda.

Ang SWS Third Quarter Survey naglambigit sa 1,200 ka mga hamtong sa tibuok nasod ug naggamit sa sampling  error nga +3% para sa nasudnon ug +6% para sa percentage areas.

Ang net satisfaction score sa Pesidente misaka ug 25 puntos para sa “Very Good” +67 niadtong survey sa Agosto, gikan sa “Good” +42 tulo ka bulan ang nakalabay, uban ang 77 porsiento sa mga respondents nga miingon nga natagbaw sila sa binuhatan sa Presidente gikan sa 63% niadtong Mayo.

“Ang kompiyansa sa Presidente nagsugyot usab sa hataas nga kadasig sa publiko nga padayong nahatagan ug gahum nagpadayon sa ilang positibong gibati sa matuod nga direksyon sa atong nasod ug kalambuan sa umaabot,” matod pa ni Lacierda.(ATR/PCOO/PIA9-Zambo Norte)

Kampanya sa turismo sa Pilipinas nga 'It's More Fun in the Philippines' pormal nga ilusad sa ikatulo nga semana ning Sepyembre sa Moscow, Russia

Ni  Gideon C. Corgue

PAGADIAN CITY, September 8 (PIA) – Ang "It's More Fun in the Philippines" nga kampanya sa Department of Tourism ang ilusad ning bulana sa Moscow, Russia aron pagpadako sa gidaghanon sa mga turista sa Pilipinas, ang opisyal sa kagamhanan mipahayag ning bag-ohay pa lang.

Sa interview, ang Philippine Ambassador to Moscow Alejandro Mosquera nagkanayon nga ang cultural group gikan sa Pilipinas ang mahidangat sa Russia magpakita sa kultura sa Pilipinas.

"Panahon nato nga magpasundayag sa 'The Days of Philippine Culture.' Ang mga Ruso nagpahigayon niini sa Pilipinas sa nakalabay nga tuig, ug karon panahon na nato dinhi. Ang Department of Tourism maglusad usab sa 'It’s More Fun in the Philippines,'" si  Mosquera nagkanayon sa mga ginsakpan sa media sa Pilipinas nga nag-cover sa 20th Asia-Pacific Economic Cooperation (APEC) Leaders' Summit.

Gihatagan ug gibug-aton ni Mosquera nga ang seremonya sa paglusad sa mahitabo atol sa ikatulo nga semana sa Septyembre. Iyang naobserbahan nga ang mga turistang Ruso mobiyahe nga usa ka pamilya ug sila ang magbakasyon . "12 milyones nga Ruso ang magbiyahe matag-tuig busa kita ang makakuha ug dako nga abot niini," dugtong pa niya.

Sa nakalabay nga Mayo, ang DOT-London naglusad sa kampanya sa turismo sa Pilipinas  nga 'It‘s more fun in the Philippines' pinaagi sa 45 minutos nga fun motorcade nga nagpasundayag sa advertisements double-decker buses ug black cabs sa London.

Si Presidente Benigno S. Aquino III, atol sa iyang pagduaw sa United Kingdom sa nakalabay nga Hunyo nangunay pagkampanya sa Pilipinas isip nag-una nga tourist destination pinaagi sa 'It’s More Fun in the Philippines' slogan sa nasud.(GCC/PCOO/PIA9-Zambosur)