Presidente Aquino nag-awhag sa mechanical engineers pagpalahutay sa ilang kabatid ug kahanas ug mga natampo sa ekonomikanhong kalamboan sa nasud

By Gideon C. Corgue 

PAGADIAN CITY, June 27 (PIA) –- Si Presidente Benigno S. Aquino III nanawagan sa mga mechanical engineers sa nasud pagpalahutay sa ilang kahanas ug kabatid ug pagtampo sa ekonomikanhong kalamboan sa nasud. 

"Ang panahon nga atong dugay na kaayo gitinguha nga kalamboan ang naabot na ug kusog sa kausaban nagsalig sa kamatinud-anon sa matag-sektor ---Ipaabante ang inyong propesyon, ipaahutay ang inyong kahanas ug kabatid ug himoa ang diwa sa kausaban nga mogiya ngadto sa iyang kalamboan," ang Hepe Ehekutibo nagkanayon sa iyang mensahe sa Philippine Society of Mechanical Engineers (PSME) sa okasyon sa 2nd Mindanao Regional Conference.

Ang PSME mibukas ning Huwebes sa 2nd Mindanao Regional Conference kinsa adunay tema "Mechanical Engineers Unite in Pursuit of Global Competitiveness" nga gipahigayon sa Grand Caprice Restaurant and Convention Center, Limketkai Drive, Cagayan de Oro City, Misamis Oriental. Ang tulo ka adlaw nga kalihokan nga gipasiugdahan sa  PSME Iligan Bay Chapter ug motapos sa Hunyo 29.

"Hinaut nga kini nga konperensya maghatag agianan sa mahinungdanong pagkutay ug kalamboan sa bag-o nga mga panahum ug pagpanday sa hiniusa ug lig-ong nga pwersa sa atong tahas sa nation-building," si Presidente Aquino nagkanayon.

"Hinaut nga kamo ang magsilbi nga mga ahente sa kalamboan ug nga kamo ang mopalambo sa panaghiusa sa atong katawhan. Hiniusa nga kita ang motukod sa malamboon nga Pilipinas nga ang takus nga puy-an sa atong mga katawhan," dugtong pa niya. 

Ang konperensya nagtumong paghatag ug update sa mga ginsakpan sa PSME pagpaabante sa engineering science and technology. (GCC/PCOO/PIA,Pagadian City)