DepEd mopahigayon ‘early registration’ sa Enero 25

Ni Claro A. Lanipa

PAGADIAN CITY, Enero 16 (PIA) – Ang Departamento sa Edukasyon (DepEd) mopahigayon karong umaabot nga Enero 25, 2014 adlaw’ng Sabado sa ‘early registration’ sa tanang pampublikong tulunghaan sa elementarya ug sekondarya sa tibuok nasud.

Usa sa tumong sa DepEd Order No. 2 s 2014 mao sa pagkuha sa kasayuran aron maoy himoon basehanan sa pagpangandam niini sa pagtubag sa mga posibleng mga kakulangon sa dili pa ang regular enrolment.

“Gusto nato likayan sa mga problema sa pagbukas sa bag-ong tuig tingtungha nga magsugod sa bulan sa Junyo,” gipasabot ni Education Secretary Br Armin Luistro.

“Kon ang atong mga school heads masayud kon pila gayud ka mga kabataan motungha sa dili pa mobukas ang klase, maka-andam sila sa mas maayo ang mga classrooms, lingkuranan ug ubang mga kinahanglon sa pagtoon,” dugang pa ni Luistro.

Ang unang tumong sa early registration mao ang tanang lima ka tuig  maseguro nga ma-enroll sa kindergarten ug tanang unom ka tuig sa Grade 1  pag-abot sa Junyo.

Ang laing gipunting sa early registration mao ang out-of-school children (OSC) ug out-of-school youth (OSY) gikan sa disadvantaged groups, lakip and mga street children nga gipang-edaran sa 5 hangtod 18 ka tuig.

Kining mga gipunting magtotoon pagahatagan sa ilang tukmang sistema sa edukasyon nga mahimong pormal pinaagi sa alternative delivery mode (ADM) o pinaagi sa alternative learning system (ALS).

Aron maseguro ang paglambigit sa tanan, ang DepEd mohangyo’g tabang sa mga opisyales lokal sa barangay alang sa early registration sa OSC, OSY, kadtong adunay kabilingan sa pagtoon, ug mga indigenous peoples kon IPs.

Niining early registration ang DepEd molihok sa hingpit uban sa mga LGUs,  Parent-Teachers Associations, opisyales sa barangay, civil society groups, civic organizations ug ang business sector aron maseguro sa halapad paglambigit sa lain-laing sekta sa maong pagbansay.

“Ang atong hiniusang tumong mao ang hapsay pagbukas sa klase karong Junyo, mao kini ang hinungdan nga nag-andam kita sa sayong panahon,” miingon si Luistro. (PCOO/CAL/PIA9)

PCW milansad ug film making contest alang sa 2014 Women’s Month

Ni Claro A. Lanipa

PAGADIAN CITY, Jan 16 (PIA) – Gilansad ning bag-o lang sa Philippine Commission on Women (PCW) ang usa ka film making contest alang kini sa umaabot nga kasaulogan sa Women’s Month ning tuiga.

Ang maong contest bukas alang sa tanang mga tinun-an sa kolehiyo sa tibuok nasud aron mopasundayag sa ilang talagsaong kahanas o abilidad sa paghimo ug pelikula.

Ang short film making contest, gisugdan niadtong Enero 10 hangtod Pebrero 21, nga gitumong sa pagpataas sa kasayuran sa publiko mahitungod sa mga isyu sa mga kababaihan. Mopunting kini sa importanteng papel sa mga kababaihan sa pagtubag panahon sa mga kaguliang o kalamidad, media, kalinaw ug kahusay, politika ug pangagamhanan, ug reproductive health.

Ang mga mosalmot kon entries kinahanglan mohulagway sa mga isyu ug hagit nga gi-atubang sa mga kababaihan sa nahisgutang mga kategoriya ug kinahanglan mopakita gayud sa katungod ug papel sa kababaihan sa pagtubag niining mga isyu sumala sa Magna Carta of Women (R.A. 9710).

Mga interesadong grupo mahimong mosalmot sa lima ka mga kategoriya.

Video entries kinahanglan orihinal ug wala pa namantala, gi-record o gipagawas kanhi.

Alang sa kompleto mga kasuyuran sa maong contest mahimong moadto sa PCW website (http://bit.ly/1dLhK64)

Kon adunay mga pangutana mahitungod sa maong contest, mahimong motawag sa Information Resource Management Division (IRMD) sa 735- 1654 local 131 o kaha sa 735-8509 o email irmd@pcw.gov.ph. Like us sa Facebook sa www.facebook.com/philippine.commissiononwomen. (PCOO/CAL/PIA9)