PAGADIAN
CITY, February 10 (PIA) –-Gitinguha
sa kongresista sa unang distrito ning lalawigan nga mapalambo ug mapauswag ang
panginabuhi sa mga mangingisda sa dakbayan sa Pagadian ug mga baybayong lungsod
sa Labangan ug Tukuran ning lalawigan.
Sa
consultative meeting nga gipatawag ni Kongresista Victor Yu sa kalim-an nga mga
mangingisda uban nila Maria Ravilla Luhan ug Evelyn Grace Ayson, researchers sa
SouthEast Asian Fisheries Development Center (SEAFDEC), Tigbauan, Iloilo City nga gipahigayon sa Dynasty Beach Resort,
Lower Bayao, Tukuran ning lalawigan ning nakalabay nga Sabado gipahayag ni Yu
nga ang iyang pagdapit sa duha ka mga experts nagtumong aron nga kahatagan ug
kaalam ang mga mangingisda pagpalambo ug pagpauswag sa ilang abot sa pagpanagat
ug pagpaila sa dugang nga panginabuhiang proyekto sama paghimo sa seaweed
farming, ug uban pa.
Nauna niini
gireklamo sa mga mangingisda ang pagkunhod sa abot sa ilang pagpanagat tungod
pag-usab-usab sa klima ug kakulang sa kaalam pagpadaghan sa mga seaweeds kon
ambalang.
Matud pa ni
Kongresista Yu nga ang SEAFDEC researchers nga si Luhan ug Ayson nag-obserbar
sa kadagatan sa atong dapit ug naminaw sa mga reklamo sa mga mangingisda tungod
pagkanihit sa ilang abot pagpapanagat.
Dugtong pa
ni Yu nga human pag-imbistigar sa duha ka mga experts mohimo sila ug pagtuon
aron nga makahatag rekomendasyon sa kasulbaran sa ilang mga gihambin nga
suliran ug makapangayo ug hinabang sa kagamhanan.
Giplano
usab sa nasangpit nga kongresista nga magpadala ug mga tawo sa SEAFDEC dakbayan
sa Ilo-ilo aron makabaton sa dugang kaalam ug mapauswag ang abot sa mga isda ug
seaweeds dinhi sa atong dapit.
Samtang
gikalipay sa mga mangingisda nga gihatagan ug pagtagad ni Yu ang ilang suliran
pinaagi pagdapit sa mga nasangpit nga researchers diin nakatampo ug dako ang
kaalam nga ilang gipaambit sa pagbuhi sa mga isda ug seaweeds sa atong kadagatan.
(GCC/PCOO/PIA9-Pagadian
City)
