Ni
Alfonso T. Ruda
DIPOLOG
CITY, SEPT. 21(PIA)---Kompiyansa ang Malakanyang nga ma-plantsa ang isyong
gi-isa sa mga mining stakeholders may kalabutan sa implementing rules and
regulations (IRR) sa bag-ong polisiya sa pagmina sa administrasyong Aquino.
Sa press conference sa Malakanyang, gipahayag ni
Presidential Communications Development and Strategic Planning Office Secretary
Ramon Carandang, nga higpit nila karong gitan-aw ang kabalaka nga gipalanog sa
Chamber of Mines of the Philippines nga ang Section 9 sa IRR illegal ug
posibling dunay dakong epekto sa umaabot nga pagpamuhunan sa industriya.
Ang Chamber of Mines nagpasidaan sa gobyerno nga
posibling dili makab-ot sa gobyerno ang 16-bilyones ka pesos nga investment
target niini sa industriya sa pagmina tungod lamang sa pipila ka probisyon sa
bag-ong kamanduan sa pagmina.
Sa iyang pagpatin-aw sa baruganan sa gobyerno sa
maong isyo, si Carandang nagkanayon, “Sa
higayong maplantsa na ang maong isyo, nagtoo kami nga duna na kitay klarong
gabayan nga makahatag ug kadasig sa mga kompaniya
sa pagmina nga mosulod dinhi sa nasod.”
“Nasabtan namo ang ilang kabalaka ug amo kanang
gihisgutan sa Mining Industry Coordinating Council (MICC) kon duna bay basehan
kining maong kabalaka.”
Sumala pa sa opisyal sa Palasyo, nga ang rason nganong
walay puhonan nga mipunta sa sektor sa pagmina, kini tungod sa way klarong
gabayan ug polisiya sa pagmina.
Matod pa ni Carandang, ang gobyerno naningkamot nga
makamugna ug kinatibuk-ang polisiya ug gabayan ilalom sa Executive Order No. 79
nga maghatag ug kahigayonan alang sa mas produktibo ug responsableng operasyon
sa pagmina sa nasod, uban ang pag-ingon nga ang IRR maoy mas magpaklaro sa unod
sa EO 79.
Matod pa ni Carandang nga napahibalo na sa MICC ang
Chamber of Mines ug nagpabilin usab nga bukas ang linya sa komunikasyon.
“Busa sa pagkakaron, wala kamiy nakitang hinanaling
panginahanglan nga magtagbo ang tibuok MICC uban sa Chamber of Mines . Hatagi
lang kamig higayon nga tan-awon kining ilang giingong problema ug among himoon
ang mga butang nga angay namong himoon,” Mtod pa niya.
“Ang pagdala sa isyo sa korte kontra-produktibo,”matod
pa ni Carandang uban ang pag-ingon nga ang labing maayong himoon aron modas-og
kini sa labing daling panahon mao ang paglikay sa litigasyon.(ATR/PCOO/PIA9-Zambo
Norte)