Pres Aquino mimando sa DOLE ug ubang ahensiya sa kagamhanan aron sulbaron ang problema sa job mismatch

Ni Claro A. Lanipa

PAGADIAN CITY, 21 May (PIA) – Gimandoan ni Presidente Benigno S. Aquino III ang Department of Labor and Employment (DOLE), Commission on Higher Education (CHED), ug Technical Education and Skills Development Authority (TESDA) aron sa pagpadayon sa pagsulbat sa kasamtangan job mismatch, matod pa sa usa ka opisyal sa Palasyo ning Lunes.

Si Deputy Presidential Spokesperson Abigail Valte sa usa ka press briefing sa Malakanyang miingon nga ang Hepe Ehekutibo mihangyo sa mga hingtungdan ahensiya aron sa paghimo sa tanang gikinahanglan mga panlimbasog aron makab-ot ang tumong sa administrasyon sa pagtanyag ug trabaho sa mga Pilipino pagkahuman sa ilang graduwasyon.

Si Presidente Aquino mihatag ug gimbug’aton sa kinahanglanon alang sa mga hingtungdan ahensiya aron sa pag-andam ug mga lakang aron motabang sa pagsulbat sa problema sa pag-empleyo sa nasud, miingon si Valte.

“Gibalik-balikan ug hisgot sa Presidente mahitungod niini. Nagkinahanglan kini paga-asikasohan pinaagi sa panagtakdo tali sa DOLE, CHED ug sa TESDA,” dugtong ni Valte.

Matod pa niya gimandoan sa Hepe Ehekutibo ang DOLE aron molihok uban sa mga ahensiya nga kaabag niini sa pag-implementar sa nagkalain-laing pamaagi sa pagmugna ug trabaho aron motubag sa kasamtangan wala magkatakdo nga trabaho kon job mismatch.

“Ang gusto nato maoy mohatag sa tukmang pahimangno sa atong mga estudyante kon unsa ang mga kurso nga ilang kuhaon ug abli pa ang merkado alang sa ilang pag’empleyo,” nagkanayon si Valte.

“Busa, nakita nato nga adunay  sobrang supply sa pipila ka mga sekta ug pipila lang ang bakanteng posisyon human sila mograduwar, ug mao kini ang hinungdan ngano si Presidente nagmando niining mga ahensiya aron mag hiusa ug segurohon nga ang tukmang pahimangno ihatag sa atong mga tinun-an kinsa magsugod pa sa ilang pagtungha sa kolehiyo,” miingon siya.

Ang administrasyon naglimbasog nga modani sa domestic ug international investors aron sa pagmugna dugang mga oportunidad sa trabaho alang sa mga Pilipino (PND/CAL/PIA9)

Presidente Aquino midawat sa bag-ong Egyptian envoy sa Malakanyang

By Mary May A. Abellon

DIPOLOG CITY, May 21 (PIA) -- Mainitong gidawat ni Presidente Benigno S. Aquino III ang bag-ong envoy gikan sa Arab Republic of Egypt ngadto dinhi sa Pilipinas nga mitawag kaniya sa Malakanyang sa Lunes. 

Si Mahmoud mostafa Ahmed nga usa ka Ambassador Extraordinary and Plenipotentiary sa Egypt nakigkita ni Presidente Aquino sa Music Room sa Malakanyang para ipakita ang iyang credentials ayha magsugod sa iyang trabaho isip representante sa iyang nasud. 

Sa usa ka humubo nga menssahe, gi siguro ni Ambassador Mahmoud sa Presidente ang padayon nga panaghigalaay ug kooperasyon sa mga katawhan ug ang Egypt ug misumpay nga siya magatrabaho padung sa paglig-on sa maayong bilateral nga relasyon kauban ang Pilipinas.

Gi giyahan sa Presidente si Ambassador Mahmoud sa tapad nga kwarto alang sa pribadong panagsulti.

Sa wala pa ang pakigkita sa Presidente, inubanan sa Foreign Affairs Secretary Albert Del Rosario, si Ambassador Mahmoud kay gitagaan ug military honors sa mga miyembro sa Presidential Security Group sa lawak naga atubang sa palasyo sa Malakanyang. (MAA/PCOO/PIA9-Zamboanga del Norte) 

‘Sajahatra’ caravans magsugod sa Junyo sa napulo ka mga dapit sa Mindanao

Ni Claro A. Lanipa

PAGADIAN CITY, 20 May (PIA) – Ang Sajahatra Bangsamoro caravans andam na nga ipahigayon sugod sa bulan sa Junyo, matod pa sa Joint Coordinating Committee (JCC) sa Kagamhanan sa Pilipinas (GPH) ug ang Moro Islamic Liberation Front (MILF).

Ning milabay’ng Mayo 9 ug 10, ang mga miyembro sa GPH Task Force on Bangsamoro Development, and MILF Task Force Sajahatra, ug ang MILF Project Management Team (PMT) nagtigum alang sa duha ka adlaw workshop aron tukion sa mga andamonon alang sa umaabot nga provincial caravans sa Sajahatra Bangsamoro program – ang konkretong socio-economic inisyatibo alang sa kalinaw ni Presidente Benigno S. Aquino III nga gilusad niadtong Pebrero 2013, human gipirmahan ang Framework Agreement on the Bangsamoro (FAB) niadtong Oktubre 2012.

Atol sa maong workshop, ang MILF PMT mipagawas sa listahan sa napulo (10) ka mga dapit nga maoy mosilbi lugar nga pagahimoon sa caravan. Sa matag lugar pagahimoon ang medical missions, scholarship grants, ug suporta alang sa panginabuhian pagatanyagan usab.

Ang mga dapit nga gikonsiderar mao ang mga giilang mga komunidad sa Tawi-Tawi, Basilan, Lanao del Sur, Sulu, Zamboanga Sibugay, South Cotabato, Davao Oriental, North Cotabato, Lanao del Norte ug Maguindanao, Ang caravan gilaoman molungtad hangtod sa bulan sa Nobyembre ning tuig.

Sa iyang bukas nga pakigpulong, si Cabinet Secretary Jose Rene Almendras nanawagan sa iyang mga kaubang opisyales sa kagamhanan aron sa personal motabang sa programa, aron kini makahatag sa mga serbisyo ngadto sa mga benepisyaryo nga angay kanila,” dugtong pa niya nga kining programa dili lang usa ka piraso sa papel nga gipirmahan ug unya gisulod sa kabinete.”

“Usa kini ka tinuod nga programa,” miingon si Almendras, kinsa ang kasamtangan chairman sa GPH Task Force for Bangsamoro Development.  

“Nakapatandog kini sa kinabuhi sa tinuod nga katawhan,” dugtong pa niya.

Ang GPH Task Force on Bangsamoro Development gipangulohan sa Office of the Cabinet Secretary inabangan sa Department of Health (DOH), Department of Education (DepEd), Department of Social Welfare and Development (DSWD), Philippine Health Insurance Corporation (PhilHealth), Commission on Higher Education (CHED), Department of Agriculture (DA), Technical Education and Skills Development (TESDA), ug ang buhatan sa Presidential Adviser on the Peace Process (OPPAP), tali sa uban. (OPPAP/CAL/PIA9)