Pres. Aquino, kompiyansang wala nay mokuyanap nga bag-ong tensiyon sa Zamboanga City

Ni Alfonso T. Ruda

DIPOLOG CITY, SEPT. 11(PIA)--- Si Presidente Benigno Aquino III nagpahayag ug kompiyansa niadtong Martes nga wala nay bag-ong tensiyong mokuyanap tali sa Moro National Liberation Front (MNNLF) ug sa puwersa sa gobyerno human gidugangan ang puwersang panseguridad sa dakbayan sa Zamboanga aron pagmintinar sa kahusay ug mapanalipdan ang katawhan.

Sa usa ka press briefing human sa iyang pagpakigpulong sa gipahigayong 7^th ASEAN Navy Chiefs Meeting sa Dakbayan sa Makati, si Presidente Aquino nagkanayon nagpahayag siya’g kompiyansa tungod sa paborableng regular update nga iyang nadawat gikan kang Interior and Local Government Secretary Mar Roxas, nga iyang gipadala sa Dakbayan sa Zamboanga aron personal nga tan-awon ang operasyon batok sa break-away group, maong nagpahayag siya’g kompiyansa.

Gihatagan ug punto sa Presidente nga naghinumbra na ang tropang gipadala aron pasiguro sa estabilidad sa kalinaw sa lalawigan.

“Kahapon, igu-igo lang, ug karon sa akong paminaw, naghinubra na. Daghan na tag tropang napadala, lakip na niini ang atong pinaka-elite nga tropa sa Zamboanga City. Sa akong pagsabot, medyo kalmado na ang sitwasyon,” nagkanayon ang Presidente.

Gihatagan ug punto sa Presidente nga ang kaluwasan sa mga sibilyan ug mga residente sa lalawigan mao ang nag-unang prayoridad sa gobyerno uban ang pagdayeg sa kagamhanang-lokal sa Dakbayan sa Zamboanga nga nagpabiling anaa sa ibabaw sa sitwasyon.

”Sama sa atong instruksyon sukad kahapon, ang nag-una natong prayoridad mao ang kaluwasan sa tanan, o mas masiguro ang kaluwasan sa tanang lumulupyo sa Dakbayan sa Zamboanga,” nagkanayon ang Presidente.

“Nakatutok gyud ug maayo ni Mayor Climaco, naningamot ug mi-activate sa Crisis Management Committee kahapon ug gani nahuman ang iyang report kanako mga alas 11:30 na sa gabii, kagabii,” matod pa niya.

Matod pa usab sa Presidente, nga sa  kasamtangang estado sa operasyon sa hiniusang puwersa sa Armadong Kusog sa Pilipinas ug Philippine National Police, wala pa siya’y nakitang panginahanglan sa pagdeklarar ug State of Emergency sa lalawigan.

“Sa pagkakaron, wala pa akoy nakitang  panginahanglan sa pagdeklarar ug “State of Emergency,” nagkanayon ang Presidente.(ATR/PCOO/PIA9-Zambo Norte)

Napoles, posibling pasakaan ug kaso may kalabutan sa di-tukmang paggamit sa pork barrel funds karong Biyernes, matod pa ni Pres. Aquin

Ni Alfonso T. Ruda

DIPOLOG CITY, SEPT. 11(PIA)--- Gipahayag ni Presidente Benigno Aquino III niadtong Martes nga tukmang kaso may kalabutan sa di-tukmang paggamit sa Prioroty Development Assistance Fund (PDAF) ang posibling ipasaka batok kang Janet Lim-Napoles karong Biyernes.

Sa gipahigayong press conference human sa iyang pagpakigpulong sa 7^th ASEAN Navy Chiefs Meeting sa dakbayan sa Makati, iyang giingnan ang mga tigbalita nga gi-analisar ug gitun-an karon sa mga prosecutors sa gobyerno ang mga ebidensiya, ingon man ang posibling depensa nga dad-on sa hukmanan aron makaangkon ug malig-ong kaso batok kang Napoles.

“Ang unang kaso may kalabutan niining maong isyo, akong nasabtan, nga ipasaka sa dili pa molapas ang adlawng Lunes. Dunay posibilidad nga ipasaka kini karong Biyernes. Hatagan nila ako ug briefing sa gitawag sa mga abogado nga “teoriya sa kaso” ang tmga ebidensiya nga mosuporta sa teoriya sa kaso,” matod pa sa Presidente.

“So, ang hingpit nga briefing himoon karong semana ug ang pagpasaka ug kaso himoon sa dili pa molapas ang adlawng Lunes sa sunod semana, ug posibling karong Biyernes ning semanaha,” matod pa niya. (ATR/PCOO/PIA9-Zambo Norte)