DOE mipasalig ug supisyenteng supply sa kuryente panahon sa eleksyo

Ni Alfonso T. Ruda

DIPOLOG CITY,JAN.4(PIA)--- Isip suporta sa tinguha sa kagamhanan nga mapahigayon ang malinis nga piniliay sa 2013, nagpagawas di pa lang dugay ang Department of Energy ug circular nga nagmugna sa Power Task Force 2013.

Kini nagtumong nga dunay supisyente ug makanunayong supply sa kuryente, sa dili pa, sa adlaw ug pagkahuman sa piniliay sa 2013 pinaagi sa pagsagop ug tukmang lakang alang niini.

Subay sa DOE Dept. Circular No. DC-2012-12-0011, ang Task Force panguluhan sa DOE, uban sa National Power Corp., National Transmission Commission, National Electrification Administration,  Power Sector Assets and Liabilities Management  Corp., Phil. Electricity Market Corp., National Grid Corp., ug Manila Electric Co., isip mga membro.

Ang Independent Power Producers Power Association Corp., Phil. Rural Electric Cooperatives Associations, Private Electric Power Operators Association, ug uban pangh asosasyon sa mga distribution facilities nga dili klarong gihinganlan sa kamanduan magsilbing mga supporting members.

“Ang amo karong tahas mao ang pag-ila sa mga lugar nga magkinahanglan ug dugang pagpaningkamot gikan sa Task Force kabahin sa supply sa kuryente ug ang pipila ka mga lugar nga walay koneksyon sa grid ug uban pang lugar sa Mindanao,” matod pa ni Energy Sec. Raphael Lotilla.

Midugang pa si Lotilla,  gikan sa mga hingtungdan nga dili una magpahigayon ug maintenance work panahon sa pagpangandam alang sa eleksyon.

Ang pag-isyo sa maong Circular maoy usa sa mga standard operating  procedures sa DOE subay sa ilang mandato paghatag ug mekanismo para sa integrasyon, rasyonalisasyon, ug koordinasyon sa nagkalain-laing kalihokan aron mapatuman ang polisiya sa enerhiya sa nasod.

Ang DOE una nang nag-isyo ug circular nga nagmugna ug Task Force niadtong piniliay sa Mayo 10, 2010.(ATR/PIA9-Zambo Norte)

Palasyo, malipayong midawat sa ceasefire re-extension sa mga rebelding komunista

Ni Alfonso T. Ruda

DIPOLOG CITY, JAN. 4(PIA)--- Ang Malakanyang malipayong midawat sa ceasefire re-extension sa mga rebelding Komunista hangtud sa Enero 15 karong tuiga, uban ang pag-ingon nga ang maong lakang makabenepisyo ug dako sa manggugubat nilang mga elemento.

“Ang Central Committee sa Communist Party of the Philippines  mideklarar ug re-extension  sa ceasefire hangtud sa Enero 15, 2013, butang nga gikalipay sa gobyerno. Ang re-extension maghatag sa mga sundalo ug mga membro sa CPP/NPA/NDF  ug dugang panahon nga makauban ang ilang mga mahal sa kinabuhi nga malisod panahon sa kagubot,” matod pa ni Presidential spokesperson Edwin Lacierda.

“Bisan pa man sa unilateral statement nga sukwahi sa nagpanghitabo, andam pa gihapon ang gobyerno nga tahuron ang maong pahayag-usa ka klarong indikasyon sa among sinseridad ug determinasyon nga mamintinar ang kalinaw ug istabilidad.

Ang mga representante gikan sa gobyerno ug CPP/NPA/NDF nagtagbo niadtong semana sa The Hague, Netherlands aron ipatuman ang holiday truce nga nagsugod  niadtong Disyembre 20, 2012 hangtud sa  Enero 15, 2013.

Matod pa ni Lacierda, gilantaw karon sa administrasyong Aquino ang pagdas-og sa negosasyon sa kalinaw uban ang paglaum nga makab-ot na ang malungtarong kahusay ug kalinaw sa nasod.

Ang rebelding grupo miputol sa ilang gideklarar nga ceasefire uban sa gobyerno hangtud karong semanaha imbis nga sa Enero 15.

Sumala pa sa CPP/NPA/NDF, ilang giputol ang gidugayon sa ceasefire gumikan sa kapakyas ni Presidente Aquino nga mag-isyo ug susamang deklarasyon nga nagpakitang tapuson ang ceasefire hangtud sa Enerio 15, 2013.(ATR/PCOO/PIA9-Zambo Norte)

Malacanang mihatag kasegurohan sa mga miretirong kapulisan sa ilang benepisyo

Ni: Claro A.Lanipa

PAGADIAN CITY, 3 Jan (PIA) – Ang Malacanang mihatag ug kasegurohan sa mga miretirong kawani gikan sa Philippine National Police nga ang ilang benepisyo pagka pensyonado madawat nila sa dili madugay.

Si Presidential Spokesperson Edwin Lacierda mibutyag sa kasegurohan sa usa ka press briefing ning bag-o lang nga gipahigayon didto sa Malacanang human si Budget Secretary Florencio Abad mipahibalo nga ang pondo alang  sa pension benefits sa kapin sa 62,000 ka mga PNP retirees andam na sa pagpagawas.

Apan, matod pa ni Lacierda, ang pagpagawas sa maong pondo nagdepende sa pagsumbitir sa PNP sa kaulohan sa gitawag “cleansed pension roster” niini, kini usa ka programa sa PNP aron sa pagpatino sa  kuwalipikadong ug angayan nga mga retirado nga modawat sa maong benepisyo.

Dugtong pa niya, nga kining mga retirado kinahanglan usab motuman sa mga kinahanglanon sa PNP sa pagkuha ug pagsumbitir sa ATM (automated teller machine) accounts diin ang ilang mga benepisyo direktamente ipasulod.

Sa karon matod pa ni Lacierda, ang proseso sa paghinlo sa listahan sa mga pensyonado anaa sa 80 porsiento, sa ato pa sa 62,000 ka mga pensyonado 50,000 na kanila rehistrado  ug adunay ATM accounts.

Gipunting ni Lacierda, nga ang kinahanglanon sa mga PNP retirees mokuha ug ATM accounts aron sa pagmatuud ang ilang legalidad isip mga pensyonado ug aron sa paghinlo sa listahan niadtong namatay na.

Kaniadto, ang hinugdan ngano nalangan sa pagdawat sa mga pensyonado ang ilang benepisyo tungod kay pipila kanila midumili sa pagkuha ug ATM accounts, dugtong ni Lacierda. (PCOO/CAL/PIA9)