Seguridad alang sa Feast of Black Nazarene, sama kahigpit karong tuiga, sumala pa sa Malakanyang

Ni Alfonso T. Ruda

DIPOLOG CITY,JAN. 7(PIA)--- Ang kapulisan magpatuman ug higpit nga seguridad para sa pagsaulog sa Feast of Nazarene sa Manila karong tuiga, aron masiguro nga mahapsay ug malinawon ang selebrasyon, matod pa sa usa ka opisyal sa Malakanyang.

“Sa nakalabayng tuig, sumala sa inyong nasayran lahi kaayo. Apan karong tuiga, susama kini kahigpit. Si NCRPO Chief, Dindo Espina nakigtagbo na sa mga kadagkuan sa simbahan ug mga opisyales sa kagamhanang-lokal may kalabutan sa pagpangandam nga himoon para sa prosisyon sa Pista sa Nazareno karong tuiga,” matod pa ni Deputy Presidential spokesperson Abigail Valte sa usa ka pakighinabi sa sibya-anang DZRB, Radyo ng  Bayan.

“Ang preparasyon susama kahigpit, bisan ug lahi ang sitwasyon sa miaging tuig.”

Ang prosisyon sa miaging tuig,natala nga pinakataas nga prosisyon nga milungtad ug 22 ka oras.

Gipangandaman sa kapulisan ang posibling pag-atake sa mga terorista, nga maoy nagtukmod kanila nga i-jam ang mga cellphone nga diha sa lugar niadtong higayona.

Ang mga pulis nasugod na karon ug pangandam alang sa Feast of Black Nazarene nga magsugod karong Enero 9. Minilyon ka mga devotees ang gilaumang mosalmot sa tradisyonal nga prosisyon nga mosangko sa simbahan sa Quiapo.

Lakip sa mga kalihokan sa maong okasyon mao ang mga misa sa simbahan sa Quiapo ug prosisyon palibot sa diostrito.(ATR/PCOO/PIA9-Zambo Norte)

Presidente Aquino nagtudlo mga bag-ong opisyales sa kagamhanan

Ni Claro A. Lanipa

PAGADIAN CITY, 07 Jan (PIA) – Si Presidente Benigno S. Aquino III nagtudlo ug bag-ong mga opisyales sa nagkalain-laing ahensiya sa kagamhanan, taho gikan sa usa ka opisyal sa Palasyo.

Gipahibalo ni Deputy Presidential Spokesperson Abigail Valte ang maong pagtudlo atol sa gipahigayong regular press briefing sa Malakanyang ning milabay’ng Biyernes.

Matod pa ni Valte ang Hepe Ehekutibo mipirma niadtong Disyembre 21 ang appointment letter ni Angelita Gregorio-Medel isip undersecretary sa Department of Social Welfare and Development (DSWD). Ang iyang termino sa iyang buhatan usa ka co-terminus dugtong pa niya.

Gitudlo usab ni Presidente Aquino si Catherine Jennifer Francis P. Gonzales isip undersecretary sa Department of Transportation and Communication (DOTC), miingon si Valte.

Ang ubang mga gitudlo sa Presidente mao ang mosunod:

-Edilberto D. Tayao, isip Acting Director IV sa Department of Public Works and Highways (DPWH), hulip kang Sinaolan T. Macarambon.

-Maria Karen S. Olidan isip Director III sa DOTC, hulip ni Jaime Raphael C. Feliciano.

-Dinna Anna Lee L. Cartujano isip Acting Director III sa Department of National Defense (DND), hulip ni Iluminada G. Afuang.

-Isidro Antonio C. Asper isip miyembro nga nagrepresentar sa sekta sa buhat sa Technical Education and Skills Development Authority (TESDA) Board, kansang termino mo-expire sa Nobyembre 25, 2015.

-Ferdinand B. Sales isip Acting Director sa Securities and Exchange Commission ubos sa Department of Finance, hulip ni Benito A. Cataran. (PCOO/CAL/PIA9)