Balaodnong maghatag ug 75 porsiento nga diskwento sa mga centenarians, gi-veto ni Pres. Aquino

Ni Alfonso T. Ruda

DIPOLOG  CITY, MAYO 29(PIA)--- Si Presidente Benigno Aquino III mi-veto sa hiniusang balaodnon sa kongreso ug senado nga maghatag ug 75 porsiento nga diskwento sa mga centenarians, uban ang pag-ingon nga makakuha kini ug dako sa ginansiya sa mga negosyante ug magresulta sa pagkalugi sa ilang puhonan, matod pa sa usa ka Opisyal sa Palasyo.

Sa regular nga press briefing sa Malakanyang niadtong Martes, si Deputy Presidential Spokesperson Abigail Valte mipahibalo sa mga sakop sa media nga gi-veto sa Hepe Ehikutibo niadtong Mayo 15 ang balaodnong“An Act Honoring and Granting Additional Benefits and Privileges to Filipino Centenarians.”

Sa iyang veto message, giila ni Presidente Aquino ang maayong katuyoan sa maong balaodnon, apan matod pa niya, ang 75 porsiento nga diskwento sobra ra kaayo sa kasagarang mark-up rate sa mga patigayon ug magtibhang ug dako sa ilang ginansiya nga magresulta sa pagkalugi sa puhonan sa mga negosyante, tungod kay wala man giingon sa maong balaodnon nga mahimo kining kuhaon gikan sa bayrang buhis  sa mga patigayon aron mabawi usab nila ang maong diskuwento.

“Dalaygon ang katuyoan sa maong balaodnon ug gipasabot usab kini  sa veto message sa Presidente nga gipadala sa duha ka Balay-Balaoranan. Ang sentro sa pagveto sa Presidente mao lang ang 75 porsiento nga diskwento sa mga pamalitong produkto ug serbisyo nga ihatag ngadto sa mga centenarians,” matod pa ni Valte.

“Kinahanglang balansehon ug maayo sa mga nangamahan sa maong balaodnon sa ilang pagduso niini ug balik tungod kay maayo man ang katuyoan niini.  Si Bureau of Internal Revenue Commissioner Kim Hinarez, kinsa mitambong sa gipahigayong pagdungog sa Committee level, nagpabiling mibarog nga ang 75 porsiento nga diskwento bug-at ra kaayo para sa mga negosyante ko dili kini makuha gikan sa buhis,” dugang pa ni Valte.

Ang Centenarian Bill mao ang usa sa mga balaodnon nga gi-veto ni Presidente Aquino.  Sayo niini, giveto usab sa Presidente ang Magna Carta for the Poor ug ang balaodnong magwagtang sa height requirement para sa mga pulis.(ATR/PCOO/PIA9-Zambo Norte)