PhilHealth-DOH Run 2013 ipahigayon sa Pebrero 17

Ni Claro A. Lanipa

PAGADIAN CITY, 08 Feb (PIA) – Aron sa paghatag kamahinungdanon sa  ikanapulo’g walo (18) nga anibersaryo sa Philippine Health Insurance Corporation (PhilHealth), karong Pebrero 17, 2013 pagahimoon ang “PhilHealth-DOH Nationwide Run 2013 uban sa tema “Synergy for Universal Health Care!”

Ang Philippine Children’s Medical Center, usa ka balay tambalan alang sa mga kabataan, ug and Dr. Jose Fabella Memorial Hospital, usa usab ka maternal and newborn tertiary hospital, ang napili isip benepisyaryo niining unang ug nagkadungan nasudnong dagan. Ang ubang mga balay tambalanan nga nag-atiman sa panglawas sa mga inahan ug kabataan sa matag dakong rehiyonal nga dapit makabenepisyo usab sa maong kalihukan.

Ang PhilHealth ug ang Department of Health (DOH) naninguha aron ang Universal Health Care makab-ot gayud. Suporta usab kini sa panglawas sa mga inahan ug kabataan isip usa sa mga pasalig sa nasud ngadto sa Millenium Development Goal (MDG) sa pagpakunhod sa child mortality ug sa pagpalambo sa maternal health.

Gilaoman nga kapin sa usa ka gatos ka libo ka mga professionals ug amateur runners ang mo-apil sa maong dagan, sa 18 kapin ka mga dakong lugar sa tibuok nasud sama sa Manila, Baguio, Dagupan, Tuguegarao, Clark, Malolos, Laguna, Batangas, Legaspi, Iloilo, Cebu, Tacloban, Zamboanga, Cagayan de Oro, Davao, Koronadal, Marawi, Butuan ug Tubod, Lanao del Norte.

Ang PhilHealth nag-awhag sa mga miyembro sa pamilya, ug ang tanang lalaki, babaye ug bata aron molambigit sa maong makasaysayanong kalihukan. Ang mga mo-apil sa dagan mahimong mopalista sa nagkalain-laing kategoriya – tulo, lima, pulo ug napulo’g walo ka kilometro nga dagan uban sa gamay ra nga registration fees. Ang tulo ka kilometro nga dagan alang sa mga kabataan. Deadline sa registration mao sa Pebrero 11. (PCCO/CAL/PIA9)

Kagamhanan molunsad sa socio-economic initiative aron sa pagtuboy sa kahimtang sa MILF communities- Malacanang

Ni Claro A. Lanipa

PAGADIAN CITY, 08 Feb (PIA) – Ang kagamhanang Aquino molunsad karong Lunes ang socio-economic initiative nga gitawag “Sajahatra Bangsamoro,” gitumong sa pagtuboy sa maayong panglawas, edukasyon ug kahimtang sa panginabuhian sa mga miyembro sa Moro Islamic Liberation Front (MILF), matod pa sa usa ka opisyal sa Palasyo.

Subay sa mando ni Presidente Banigno S. Aquino III aron sa paghatag ug hinanaling socio-economic interventions alang sa mga komunidad sa MILF, si Cabinet Secretary Jose Rene Almendras miingon ang nasudnong pangagamhanan molunsad sa “Sajahatra Bangsamoro” inubanan sa liderato sa MILF.

“Sajahatra Bangsamoro, usa ka Aarabic-Melayu-Bahasa nga pinulongan kon sa ato pa ‘Peace Bangsamoro,’ mao ang konkretong inisyatibo ug tabang sa Presidente ngadto sa mga komunidad sa MILF,” miingon si Almendras sa usa ka press briefing sa Malakanyang ning bag-o lang.

Matod pa ni Almendras ang programa nagtimaan sa panag’uban tali sa kagamhanan ug ang MILF padulong ngadto sa kalinaw ug kalamboan sa mga komunidad sa Bangsamoro lakip usab ang kinatibuk-ang nasud.

Ang nasudnong pangagamhanan maoy mangulo sa seremonyas sa  paglusad sa programa nga pagahimoon sa Bangsamoro Leadership and Management Institute compound sa lungsod sa Sultan Kudarat sa Maguindanao.

Dugtong pa ni Almendras ang Sajahatra Bangsamoro motutok sa maayong panglawas, edukasyon ug mga serbisyong panginabuhian nga ipatuman pinaagi sa inter-agency mechanism.

“Naglangkob kini sa paghatag sa health insurance pinaagi sa Philippine Health Insurance Corporation (PhilHealth); pagpalambo sa community-based health services sa Department of Health (DOH); pagtanyag sa college scholarships ug technical-vocational training pinaagi sa Commission on Higher Education (CHED) ug Technical Education and Skills Development Authority (TESDA); educational assistance sa madaris (Islamic schools) ug pribadong tulunghaan pinaagi sa Department of Education (DepEd), pagtantiya sa mga kinahanglanon sa piniling komunidad sa Bangsamoro; Cash for Work Program, pinaagi sa Department of Social Welfare and Development (DSWD) tali sa uban,” miingon si Almendras.

Usa ka ceremonial turnover sa mga serbisyo ngadto sa pipila ka mga benepisyaryo ug medical mission ang pagahimoon atol sa maong paglusad nga pagatambongan ni Presidential Adviser on the Peace Process Teresita Quintos Deles, MILF chair Murad Ebrahim, Government of the Philippines peace panel gipangulohan ni chair Miriam Coronel-Ferrer, MILF peace panel chair Mohagher Iqbal, mga representante sa DOH, DSWD, PhilHealth, DepEd, TESDA, CHED ug DA. (PCOO/CAL/PIA9)

Palasyo mipahayag nga ang kagamhanan motanyag ug insentibo sa mga tigpamuhunan ug daghan nga mga bepenesyo sa mga konsumante ug ekonomiya

By Gideon C. Corgue

PAGADIAN CITY, February 8 (PIA) –- Ang kagamhanan mohatag ug insentibo sa mga tigpamuhunan nga buot mobutang sa ilang salapi sa Pilipinas samtang ang ilang mga negosyo makabenepesyo sa mga konsumante ug sa kinatibuk-an ang ekonomiya, ang opisyal sa Palasyo nagkanayon ning Huwebes.

Mga isyu ang gipangutana human nga ang Board of Investments (BOI) mihatag ug unom ka tuig nga tax incentives sa Thai company nga naghimo ug produktong karne.  Apan ang local hog ug poultry industries nagreklamo nga kini ang nakahatag ug negatibo nga epekto sa ilang mga negosyo.

Sa press conference sa Malacanang ning Huwebes, si Presidential Communications Development and Strategic Planning Office Secretary Ramon Carandang nagkanayon nga ang balanse tali sa interes sa mga langyaw nga tigpamuhunan ug sa mga lokal nga industriya mao ang tinuod nga hagit sa kagamhanan.

“Mao kana ang hagit—pagnunot sa balanse. Walay magduha-duha nga usa ka dako nga pamuhunan sa atong agricultural sector nga atong gidasig kini ang makahatag ug ug negatibo nga epekto sa pipila ka mga players,” matud pa ni Carandang.

“Apan sa kaapusan, kung kini ang mangulo, una sa tanan maayo nga mga presyo sa konsumante, lig-on nga abiyo, ug mangulo sa dugang nga abot sa export ug kana ang atong matimbangtimbang batok sa posible nga mga negatibo nga epekto.”

Matud pa ni Carandang nga ang kamatuoran nga ang BOI mihatag mga insentibo sa Thai company nagpasabot nga adunay proseso pagtimbang sa positibo ug negatibo nga mga epekto sa iyang pamatigayon.

Dihang gipangutana kung ang kagamhanan nagsagop ug susama nga mga polisiya sa ubang nasud, matud pa niya nga ang gihisgutan dili lamang nakabase kung ang Pilipinas makahimo o dili paghatag ug insentibo apan paghatag ug prayoridad sa suporta. (GCC/PCOO/PIA9-Pagadian City)

Aquino midayeg sa mga medical institutions sa ilang mga paningkamot pagpalambo sa Universal Health Care

By Gideon C. Corgue

PAGADIAN CITY, February 8 (PIA) –- Si Presidente Benigno S. Aquino III midayeg sa medical institutions alang sa ilang mapadayonong paningkamot pagpalambo sa national agenda nga Universal Health Care sa administrasyon.

"Ang medical institutions sama sa inyoha mao ang mga mahinungdanon nga haligi alang sa nation-building: Sila ang nagtabang pagmugna sa pundasyon sa atong health-care sector pinaagi pagtanyag sa ilang mga tinun-an sa kaledad nga medical education nga gimatuto sa “culture of inquiry and innovation," ang hepe ehekutibo nagkanayon sa iyang mensahe sa Association of Philippine Medical Colleges atol sa ika- 46th ka tuig nga Annual Convention ning Huwebes.

Ang APMC nagpahigayon sa iyang 46th Annual Convention nga nagdala sa tema "Enhancing the Medical School's Participation in Nation Building," sa West Visayas State University, La Paz, Iloilo City. Ang convention nagsugod sa Pebrero 7 ug motapos sa Pebrero 9.

"Ang iyang kagamhanan nag-agad sa inyong mapadayong paningkamot sa pagpalambo sa atong national agenda nga mao ang Universal Health Care," matud pa sa Presidente.

Siya ang naglaum nga ang kalihokan magsilbi nga lig-on nga plataporma sa research and information nga naglangkub sa mga nagkalain-laing disiplina sa medical field.

"Ang atong hiniusa nga tahas mao ang pagpalahutay sa kusog nga nagdepende sa atong kaikag ug dedikasyon sa atong mga hingtungdang tinguha. Magpabilin kita nga maghupot sa dako nga potensyal sa Pilipino samtang kita ang magdala sa malahutayon ug makahuluganon nga reporma sa atong nasud," matud pa niya. (GCC/PCOO/PIA9-Pagadian City)

25-milyones ka semilya sa lumad nga kahoy, target sa DENR para sa National Greening Program

Ni Alfonso T. Ruda

DIPOLOG CITY, FEB. 7(PIA)--- Gitahasan ni Denr Sec. Ramon Paje ang Ecosystems Research and Development Bureau (ERDB), lakip na ang iyang mga kauban sa mga rehiyonal nga buhatan nga motanom ug 25 milyones ka mga lumad nga semilya sa kahoy karong tuiga para sa National Greening Program (NGP).

Ang pagtaas naggumikan sa maayong binuhatan sa ERDB, usa ka tapot nga ahensiya sa DENR, ug iyang mga satellite offices sa rehiyon nga nakatanom ug 14.8 milyones ka kahoy niadtong 2012.

“Kining pagtaas sa target sa ERB nahasubay sa lihok sa DENR nga mobalhin gikan sa paggamit ug “exotic” nga klase ngadto sa lumad nga matang sa kahoy,” matod pa ni Paje nga ang gipasabot, mao ang DENR Memorandum Circular 2012-01 nga nagtakda sa dalan sa NGP padulong sa paggamit ug semilya sa lumad nga kahoy nga magpakita sa matuod nga kinaiyang Filipinhon.

Ang target para sa lumad nga semilya nagrepresentar ug 15 porsiento sa kinatibuk-ang 169 milyones ka semilya sa kahoy nga gitarget sa DENR ug NGP partners nga itanom karong tuiga.

Gawas sa target sa ERDB, ang Forest Management Bureau(FMB) ug ilang field units gitahasan usab nga maggahin ug dakong bahin sa ilang alokasyon sa 2013 seedling production target nga 136.4 milyones para sa lumad nga klase.

Dili moubos sa 3.7 milyones ka semilya sa lumad nga kahoy ang napatubo sa FMD sa miaging tuig. Kini naglakip sa 2.7 milyones ka punoan sa lumad nga bakhaw ug 862,181 ka mga lumad nga pangdayan-dayan nga kahoy nga haom para sa National Greening Program sama sa acacia, agoho, alibangbang, aratelis, ilang-ilang, balitbitan, caballero ug talisay.

Si Paje mihulagway sa papel sa ERDB sa implementasyon sa NGP nga usa ka “pivotal” pinaagi sa pag-ingon nga ang bureau mao ang nagtakda sa tono kon unsaon sa ubang NGP Partners pagpadayon ang ilang kaakuhan nga pagpatubo ug lumad nga semilya sa kahoy para sa NGP.

Gikuha usab ni Paje ang Philippine Tropical Forest Conservation Foundation (PTFCF), Foundation Philippine Environment (FPE) ug Bukidnon Forest Incorporated(BFI) sa pagpaningkamot, ingon man sa 17 ka mga kolehiyo ug state universities sa tibuok nasod nga makadawat ug pahat nga 3.5 milyones ka pesos matag usa aron motanom ug daghang semilya sa lumad nga kahoy hangtud sa 2016.

Ang ERDB mitaho nga niadtong 2012, kining mga NGP partners nakatanom ug kinatibuk-ang 5.7 ka semilya sa lumad nga kahoy, diin ang PTFCF ug FPE nakatampo ug 4.9 milyones; BFI-500 mil ug 17 ka SUCs 281,081.

Sa bungang-kahoy nga natanom ilalom sa agri-forestry component sa NGP, nalampasan niini ang target sa 2012 nga 4.75 milyones ug 12 porsiento diin natanom ang 5.3 milyones nga tag-as nga kalidad sa bungang-kahoy sulod sa maong panahon.

Nakatanom usab ang Department of Agriculture niadtong 2012 ug 1.2 milyones ka semilya sa mga bungang-kahoy isip ilang kontribusyon sa NGP ilalom sa National Convergence Initiative.

Sa samang higayon, nagpahayag ug kompiyansa si Paje nga makab-ot ang target sa 2012 nga 200 mil ka hektarya, uban ang pag-ingon nga padayon pa karong giandam ang year-end report, diin ang dagan nagpakita nga gibana-banang miabot na sa 122.2 milyones ka semilya sa kahoy ang natanom sa 218 mil ka hektaryang kayutaan.(ATR/PCOO/PIA9-Zamboanga del Norte)