Ni Alfonso T.Ruda
DIPOLOG CITY, DEC.3,(PIA)…
Samtang nangandam
ang gobyerno sa pagsulod sa bagyong Pablo nga dunay inyernasyonal nga ngalang
Bopha, gipahayag sa Malakanyang nga gihimo na sa gobyerno ang tanang pagpangandam
lakip na ang mga resources sa kagamhanan aron mahatagan dayon ug hinabang ang
maapektuhan sa bagyo.
Sa
usa ka press briefing nga gipalanog sa kahanginan pinaagi sa sibyaanang RZRB, Radyo
ng Bayan, miapela si Deputy Presidential Spokesperson Abigail Valte sa mga
membro sa media nga motabang sa gobyerno pagpakatap ug impormasyon kabahin sa
dagan sa maong bagyo.
Sumala
sa labing ulahing pahibalo gikan sa Philippine Atmospheric Geo-physical and Astronomical
Services Administration(PAGASA), mga alas 5 ang takna sa buntag, Disyembre 3,
2012, si Pablo nahimutang mga 700 kilometros sa habagang--silangang bahin sa
Hinatuan, Surigao del Nortte matag takna, uban ang pinakakusog nga huros sa hangin nga moabot sa 175
kilometros matag takna duol sa sentro ug paghuros nga moabot sa 210 kilometros
matag takna. Si Pablo gibana-banang maglihok padulong sa kasadpan-amihanang-kasadpan
sa gikusgon nga 22 kilometros matag takna.
Alayon
niini, nanawagan si Valte sa tanang mga Kagamhanang-Lokal nga bantayan ang
pahibalo gikan sa PAGASA matag karon ug unya aron masiguro ang kaluwasan sa mga
tawong nagpuyo sa mga lugar nga ilang nasakupan.
“Kinahanglang
mahibalo kita sa dagan sa bagyong Pablo matag karon ug unya ug makigtinabangay
sa mga lokal nga otoridad samtang nangandam ang nasudnong kagamhanan paghatag
sa gikinahanglang hinabang niadtong maapektuhan sa bagyo,” matod pa ni Valte.(ATR/PCOO/PIA9-Zambo Norte)
