PAGADIAN CITY, February
22 (PIA) –- Si Executive
Secretary Paquito N. Ochoa Jr. nag-awhag sa mga kawani sa kagamhanan nga aktibo
nga mosalmot sa mga gihan-ay nga kalihokan alang sa ika-27 ka tuig nga
anibersaryo sa 1986 EDSA People Power Revolution sunod semana.
Sa Memorandum Circular No. 44, si Ochoa ang nag-awhag sa mga kawani sa gobyerno nga mohatag sa ilang hingpit nga suporta sa inisyatibo ug programa alang sa tinuig nga selebrasyon nga nakalatid karong Pebrero 25.
“Gi-awhag nako ang akong mga kauban nga mga civil servants lakip na ang anaa sa government-owned and -controlled corporations ingon man ang local government units nga magpahigayon sa mga kalihokan nga gi-andam aron pagsaulog sa ika-27 ka tuig nga EDSA People Power anniversary,” matud pa ni Ochoa kinsa mao ang nagdumala sa EDSA People Power Commission (EPPC).
“Pinaagi ning mga kalihokan, kita ang makahinundum sa panaghiusa nga gipakita sa atong nasud ug pagbag-o sa atong mga gawi nga gipakita sa atong mga katawhan atol sa panahon sa malinawon nga rebolusyon sa EDSA,” dugtong pa sa Executive Secretary.
Tipik sa mga kalihokan nga giplano ilawom sa maong memorandum mao ang Salubungan sa militar ug civilians aron paghatag sa kamahinungdanaon kung unsaon nila pagtrabaho aron pagkab-ot sa hiniusa nga tumong, pagbukas sa kampo sa militar ug buhatan sa kapulisan sa publiko aron pagsaulog sa ilang papel sa kalampusan sa People Power Revolution, ug People Power parades sa mga nagkalain-laing dapit aron pagpakita sa kasaulugan sa nasangpit nga selebrasyon.
Si Ochoa ang nag-awahg usab sa local government units papahigayon sa ilang kaugalingon nga mga kalihokan aron pagsaulog sa diwa sa EDSA revolution ug pagsuporta sa project-oriented celebrations nga gipanguluihan sa EPPC provincial councils.
Ang memorandum gipirmahan ning Pebrero 19, 2013 ug ipatuman sa labing madali nga panahon. (GCC/PCOO/PIA9-Pagadian City)
