Aquino mipahayag nga ang tanang hingtungdang ahensya sa kagamhanan maghiusa pagtrabaho aron paghatag kaseguruhan sa mga trabaho sa Pilipino pagkahuman sa graduation

By Gideon C. Corgue

PAGADIAN CITY, February 6 (PIA) –- Si Presidente Benigno S. Aquino III mihatag kaseguruhan sa ubay-ubay ka mga hngtungdang ahensya sa kagamhanan paghimo sa mga mahinundanong paningkamot aron pagkab-ot sa tumong sa administrasyon pagtanyag ug trabaho sa mga Pilipino human sa graduation.

Ang hepe ehekutibo mipahibalo sa mga tigbalita human pagsalmot sa Philippines Development Forum 2013 nga gipahigayon sa Marco Polo Hotel, dakbayan sa Davao ning Martes diin iyang gimandoan ang Department of Labor and Employment (DOLE) makigtrabaho uban ang mga kaabag nga ahensya pagpatuman sa ubay-ubay ka mga  job creation facilitation programs.

"Ang atong giapas mao ang pagtinabangay sa Labor, CHED (Commission on Higher Education), DepEd (Department of Education) ug TESDA (Technical Education and Skills Development Authority) nga seguraduhon nga adunay masudlan nga trabaho sa atong mga kaigsoonan paghuman nila ug eskwela," matud pa sa Presidente.

Si Presidente Aquino nagkanyon nga ang K to 12 program gidibuho aron pagtabang ug sulbad sa suliran sa pagpanarbaho sa nasud.

"'Ang pagduso sa K+12 mao ang paghatag kagahum sa atong mga katawhan nga adunay maayo nga trabaho aron paghatag kanila sa maayo nga skills aron nga makaangkon sa trabaho," matud pa niya.

Ang programa nagtumong aron pagsulbad sa nagpasaulabi karon nga jobs mismatch, naalingatan sa Presidente. 

"Akong usbon nga bisan ug 'bahala na system' atong gipangkamutan nga mahibaloan kung unsa ang mga trabaho dili karon kung dili duha ka tuig, upat ka tuig gikan karon . Ipahibalo nato sa mga nagtungha aron nga haum ang ilang gikuha nga kurso paingon sa ilang mahimong sudlan nga trabaho," matud pa niya.

Samtang ang  business process outsourcing (BPO) usa ka nagmauswagon nga industriya sa Pilipinas, ang Presidente mipaibalo nga adunay daghan nga mga tulunghaan nga nagtanyag ug BPO courses.

Ang administrasyon misulay sa pagdani sa domestic ug international investors aron pagmugna ug daghan nga mga kahigayonan sa trabaho alang sa mga Pilipinos, matud pa niya. (GCC/PCOO/PIA9-Pagadian City)

Kagamhanan malaumon sa pagkab-ot sa 2013 FSSP target ilabi na gyud ang humay

By Gideon C. Corgue

PAGADIAN CITY, February 5 (PIA) –- Bisan ug dako nga hagit sa Department of Agriculture nga makab-ot ang kaigo-an sa humay ning tuiga, si DA secretary Proceso J. Alcala nagkanayon nga bisan si Presidente Benigno Aquino malaumon nga kini ang iyang mahimo ug ingon man mahimo usab niya.

“Atong iseguro nga atong makab-ot ang atong target ilawom sa Food Staples Sufficiency Program kon FSSP ilabi na ang humay,” si Aquino nagkanayon sa Filipino atol sa 2013 1st quarter national management committee (ManCom) meeting sa DA sa nakalabay nga bulan sa dakbayan sa Legazpi.

Ang Presidente nanawagan sa mga opisyales sa ahensya nga ang kaigoan sa pagkaon ilabi na sa humay ug mais ang makab-ot ning tuiga.

Ang natala sa ani nga 18 millyones nga metrikong tonelada sa palay (wala gigaling nga humay) nga nahimo sa nakalabay nga tuig, ug ang DA nagtumong sa pagpauswag niini sa 20 milyones nga metrikong tonelada sa katapusan sa 2013 aron pagkab-ot sa siyento porsiyento nga kaigoan sa humay, matud pa sa pamahayag gikan sa DA.

Ang nasangpit nga ahensya nag-awhag sa mga mag-uuma nga mananom ug sayo human sa summer crop, ug mohimo gilayon sa ‘quick-turn-around’ kon QTA scheme ihuman nga ang wet season crop sa dili pa ang Septyembre 15, 2013 nga molangkub sa 300,000 nga ektarya aron nga makab-ot ang 20 milyones nga metrikong tonelada nga target.

Alang sa QTA, ang DA nagkanayon nga kini ang motanyag sa mga mosalmot nga mga mag-uuma sa libre nga free certified seeds ug crop insurance coverage.

Dugang pa si Secretary Alcala ang mimando usab sa National Food Authority nga mohimo ug palay procurement aron pagsilbi sa dugang nga mga mag-uuma ilabi na sa mga lagyo nga dapit ug makapahimulos sa P17 matag-kilo nga paletonon nga humay aron pagdasig nila pagtanom ug mohimo sa dugang nga mga humay sa 2013. Ang NFA nagtumong pagpalit sa 615,000 metrikong tonelada ning tuiga.

Ang DA nagpunting usab pagkaangkon sa otso milyones nga metrikong tonelada ning tuiga aron nga makab-ot ang 100 porsiyento nga kaigoan. Ang yellow corn production ang ipadala ngadto sa mga interesado nga mga nasud isa pakig-abag sa pribadong sektor, matud pa Alcala.

Atol sa ManCom meeting, si Alcala nagkanayon nga ang roadmaps sa mga dagko nga palaliton ilabi na niadtong adunay dako nga epekto sa kapanginabuhian ug abot sa gagmay nga mga mag-uuma ug mangingisda ang pagahumanon.

Ang disaster risk reduction and rehabilitation program ang humanon usab aron pagpugong sa mga makadaot nga epekto sa mga bagyo ug baha ug pagpanalipod sa mga ani ug panginabuhian lakip na sa mga imprastraktura sama sa irrigation systems, postharvest facilities ug trading centers, matud pa niya. (GCC/PCOO/PIA9-Pagadian City)