Ni Gideon C. Corgue
Mitubag sa mga panawagan alang pagpatuman ug balik sa silot sa kamatayon, si Deputy Presidential spokesperson Abigail Valte nagkanayon sa interview sa radyo ning bag-o pa lang nga ang Presidente ang mopabor sa silot sa kamatayon kung adunay tukma nga pagpatuman sa hustisya sa nasud.
Si Valte mihatag sa iyang tubag sa panawagan sa Volunteers Against Crime and Corruption (VACC) pagpatuman sa death penalty sa nasud human si Cyrish Magalang, usa ka honor student gikan sa University of Santo Tomas ang gidunggab ug namatay sa iyang pagpauli sa ilang balay. Matud pa sa kapulisan nga ang biktima nakaangkon ug 49 ka samad dinunggaban human nga kini ang gitulis.
Adunay status quo hangtud nga ang kagamhanan mobati nga kadtong pagahukman sa kamatayon ang guilty sa krimen, matud pa ni Valte.
Samtang ang kagamhanan nag-usab sa justice system, ang Philippine National Police gikinahanglan nga magpadayon sa iyang paagi pagpakigbatok sa krimen sa nasud, matud pa ni Valte.
“Ang pamaagi sa atong kapulisan mao ang pagpataas sa ilang visibility, ipataas ang gidaghanon sa nagpa-patrol, ug kunhuran ang mga pulis sa desk. Makita nato nga adunay epekto sa paagi nga makunhuran ang mga dautang tawo,” matud pa ni Valte.
Gawas nga pakigbatukan ang mapintas nga mga krimen, ang kampanya batok sa illegal nga druga ang ipadayon usab, matud pa sa opsiyal sa Palasyo.
“Walay hunong ang kampanya nato ug dili lang sa druga apan lakip na niini ang pagpakunhod sa mga krimen. Ang tumong sa atong kapulisan ang padayon ug walay hunong ang ilang kampanya aron nga malikayan ang matang ning maong krimen,” matud pa niya. (GCC/PCOO/PIA9-ZamboSur)
