Pres. Aquino mibisita sa resettlement site para sa mga biktima sa bagyong Sendong

Ni Alfonso T. Ruda

DIPOLOG CITY, FEB. 27(PIA)--- Gi-inspeksyon ni Presidente Benigno Aquino III ang Xavier University Ecoville Relocation Site sa Barangay Lumbia sa Dakbayan sa Cagayan de Oro- ang lugar nga giingon sa Presidente ngadto sa mga biktima sa Bagyong Sendong nga gitrabaho sa gobyerno aron mapabarog ug balik ang ilang kinabuhi.

“Nalipay akong nakita ko kamong tanan. Nagkita ta atong pagkahuman sa trahedya. Karon ato na gayong nakita ang inyong inanay nga pagbangon,” matod pa sa Presidente sa iyang pagpakigpulong human ang gihimong pag-inspeksyon sa lugar.

‘Karon sa inyong gipakitang pagtinabangay ug panaghiusa, siyempre, mapalambo ninyo ang inyong komunidad ug atong ipadayon ang dili nato pag-iya-iya ug nagpakabana kita sa usag-usa,” matod pa niya.

Ang paglantaw sa mga tawong nakig-away ug naglihok sa pagsugod ug normal nga kinabuhi usa ka inspirasyon sa gobyerno para tabangan ang pagpaningkamot sa komunidad nga makabangon, matod pa sa Presidente.

Misaad usab ang Presidente nga palambuon ang inprastaktura sa resettlement site, ilabi na ang kalsada, uban sa iyang paghangyo sa katawhan nga tabangan ang gobyerno.

Aron malikayan ang baha, matod pa sa Presidente, nagpadayon karon ang dredging project, sa baba sa suba aron masiguro nga hamugaway ang bul-og sa tubig. Usa ka dike ang himoon sa gobyerno ug kasamtangan karong giproseso ang bidding sa proyekto nga nakatakdang ihatag karong Marso, matod pa niya.

Naghiusa usab ang Department of Social Welfare and Development (DSWD) ug Technical Education and Skills Development Authority (TESDA) paghatag ug panginabuhian ug katakos sa trabaho ngadto sa katawhan.

Sa pagkakaron, duna nay 166 ka balay ang nahuman. Samtang gitan-aw pa ang gobyerno ang pagtukod ug 568 ka balay sa Lumbia Resettlement site. Ang matag balay nagkantidad ug 110 mil pesosm, sumala pa sa gipagawas nga briefer.

Lakip sa nanag-unang katambayayong sa gobyerno pagpabarog ug permanenteng puluy-anan para sa mga biktima sa bagyong Sendong mao ang San Miguel Corp., Union Bank, ug Habitat for Humanity Philippines .

Samtang nahimo usab nga katambayayong sa gobyerno pagpabarog ug temporaryong pinuy-anan mao ang International Organization for Migration (IOM).

Hangtud niadtong Pebrero 16 niining tuiga, 2,586 na ka mga tawo ang napabalhin sa nasangpit nga resettlement site.(ATR/PCOO/PIA9-Zamboanga del Norte)

DSWD mosuporta sa socio-economic programs alang sa Bangsamoro

Ni Claro A. Lanipa

PAGADIAN CITY, 26 Feb (PIA) – Isip suporta sa pasalig sa kagamhanan aron sa pagpadali ang socio-economic development sa Mindanao, ang DSWD mo-implementar sa cash-for-work (CFW) ug programa sa panginabuhian gitumong sa pagtuboy sa kinabuhi sa katawhang Bangsamoro.

Namugna kini human sa nahitabong makasaysayanong pagbisita ni Presidente Benigno S. Aquino III sa Sultan Kudarat, Maguindanao ning bag-o lang sa paglusad  sa ‘Sajahatra Bangsamoro’ Program.

Ang ‘Sajahatra Bangsamoro’ or ‘Peace Bangsamoro’ in Arabi-Melayu-Bahasa, usa ka socio-economic peace initiative sa kagamhanan gitumong sa pagtuboy sa panglawas, edukasyon ug panginabuhian sa mga komunidad sa Bangsamoro.

Si Social Welfare and Development Secretary Dinky Soliman kinsa mikuyog kang Presidente Aquino panahon sa paglusad sa Sajahatra Bangsamoro Program, miingon nga ang dugay na kaayo gipaabot natuman na alang sa kalamboan ug kauswagan sa Mindanao. Ang atong mga igsoong Muslim mahimong mopahimulos na karon sa mga nahaunang serbisyo ug mahimong nang mga kaabag sa kagamhanan sa pagpalambo sa nasud.

Matod pa ni Sec. Soliman, kapin sa 11,000 ka mga miyembro sa pamilya sa Moro Islamic Liberation Front (MILF) ang makabenepisyo gikan sa cash-for-work program sa DSWD. Makadawat sila sa suhol base sa kasamtangan regional wage rate isip bayad sa ipabuhat kanila nga mga proyekto sa ilang komunidad.

Ang Sajahatra Bangsamoro paga-implementar sa mga komunidad sa MILF sulod sa 18 ka mga bulan samtang nagpaabot sa pagpirma sa katapusang kasabotan sa kalinaw kon final peace agreement.

Sa susamang kalamboan, si Mohagher Iqbal, ang hepe negosyador sa MILF miingon nga mosuporta sila sa implementasyon sa mga programa ug proyekto sa kagamhanan, ilabi na sa Pantawid Pamilyang Pilipino Program nga nakatabang sa linibong mga igsoon nato sa tibuok rehiyon sa Mindanao.

Iyang giawhag ang kagamhanan aron sa hingpit mobantay sa programa aron sa pagsumpo sa mga politiko sa pagpahimulos sa mga benepisyaryo alang sa ilang politikanhong katuyoan.

Ang programa sa Pantawid Pamilya nagtanyag sa direktang edukasyon ug serbisyo sa maayong panglawas ngadto sa mga pamilya kinsa nagtuman sa kondisyones, lakip ang regular pagtungha sa mga kabataan sa tulunghaan ug regular pagbisita sa mga health center sa mga inahan ug anak. (DSWD/PIA9/CAL)