Cybercrimes Prevention Act of 2012, gipirmahan ni Presidente Aquino

Ni Alfonso T. Ruda

DIPOLOG CITY, SEPT. 17(PIA)---Sa tinguhang pakigbatukan ang cybercrimes sa nasod, gipirmahan ni Presidente Benigno Aquino III niadtong Miyerkules ang Akta Republika no. 10175 kon Cybercrimes Prevention Act of 2012.

Sa usa ka pakighinabi sa sibyaanang DZRB-Radyo ng Bayan, gipahayag ni Deputy Presidential spokesperson Abigail Valte, nga ilalom sa bag-ong duna nay silot ang mga kalapasan batok sa confidentiality, integrity and availability of computer data system, illegal access, illegal interception, data interference, system interference ug  dili tukmang paggamit sa aparato.

Kini naglakip sa mga kalapasan nga may kalabutan sa computer sama sa computer-related forgery, fraud ug identity theft. Kining maong mga kalapasan, baniog na kayo sa internet.

“Aduna nay silot ilalom sa bag-ong balaod ang content-related offenses sama sa cybersex, ug child pornography,” matod pa ni Valte.

“Ang bag-ong balaod nagsilot usab sa mga unsolicited commercial communications kon cyber-squatting, matod pa niya. Ang cyber-squatting mao ang pag-angkon sa personalidad sa usa ka tawo sa di-maayong paagi aron lang mokita, pagmis-lead sa katawhan, pagdaot sa kadungganan sa usa ka tawo aron hikawan ang usa ka tawo nga makaparehistro ilalom niini. Duna usay silot ilalom sa Akta Republika 10175 ang kasong libel,” dugang pa ni Valte.

Ang gobyerno mibahin sa cyber crimes dinhi sa Pilipinas sa duha ka kategoriya- internet ug commercial crimes nga nahimo gamit ang internet. Niadtong miaging tuig, ang mga otoridad nagpagawas ug legal advisory may kalabutan sa cybercrimes aron panalipdan ang publiko samtang naggamit sa internet.

Ang kasamtangang balaod sa Pilipinas nga nagpahamtang ug silot sa internet crimes  mao ang Akta Republika 9995(Anti-Photo Voyeurism Act of 2009), RA 9775 (Anti-Pornogrpahy Act of 2009) ug RA 9208(Anti-Trafficking in Person Act of 2003).(ATR/PCOO/PIA9-Zambo Norte)

Palasyo mipahayag nga ang kagamhanan makagarantiya sa seguridad sa American envoys ug personahe dinhi sa nasud

Ni Gideon C. Corgue

PAGADIAN CITY, September 16 (PIA) -- Ang Malakanyang nagkanayon ning Domingo nga ang kagamahan sa Pilipinas makagarantiya sa kaluwasan sa American envoys ug personahe niini nga nagtrabaho sa nasud bisan pa sa pagpangatake sa embahada sa Amerika sa Libya ning nakalabay nga semana nga miresulta sa kamatayon sa embahador ug tulo sa iyang mga staff.

Sa usa ka press briefing nga gisibya sa dzRB Radyo ng Bayan, si Deputy Presidential Spokesperon Abigail Valte miingon nga ang law enforcement agencies mipalihok sa ilang mga pwersa aron paghatag kasegurhan sa mga Pilipino ug mga langyaw sa nasud.

“Ang kagamhanan makagarantiya sa kaluwasan sa embahada sa Estados Unidos. Gani, si General (Leonardo) Espina sa NCRPO (National Capital Region Police Office) ang misusi na sa gipadako nga presensya sa mga pulis gawas sa embaha sa Estados Unidos,” matud pa ni Valte.

“Dili na kinahanglan nga mobiya. Walay kakuyaw batok nila dinhi sa Manila ug sa Pilipinas,” dugtong pa niya. (GCC/PCOO/PIA9-Zambosur)