Ni Alfonso T. Ruda
DIPOLOG CITY,
NOV.10(PIA)---Gi-awhag
ni Presidente Benigno Aquino III ang katawhan, sa lokal nga komunidad ug mga
ahensiya sa gobyerno nga magtinabangay pagsulbad sa malnutrisyon sa nasod
ilabi na sa nutrisyonal nga panginahanglan sa mga kabataan.
Sa iyang pagpakigpulong sa 2012 National Nutrition
Awarding Ceremony sa Pasay City niadtong Biyernes, ang Presidente nagkanayon
nga samtang daghan nang nakab-ot ang gobyerno sa pagpakig-away batok sa malnutrisyon,
daghan pa gihapong mga hagit ang nagpaabot sa unahan.
Tipik sa target sa Millenium Development Goals sa
gobyerno mao ang paghatag sa katawhan ug mas maayong nutrisyon ug panglawas,
partikularmente ang pagtutok sa mga batang nagpangidaron ug ubos sa 5-anyos
nga kulang sa timbang
|
Base report sa Food and Nutrition Research Institute
(FNRI) nga,”Updating of the Nutritional Status of Filipinos” nga gikan sa
26.5 porsiento sa mga kabataang kulang ug timbang niadtong 1992, napaubsan
kini sa administrasyong Aquino ngadto sa 20.2 porsiento niadtong 2011.
Samtang iyang gipahalipayan ang mga kagamhanang-lokal
ug mga ahensiya sa gobyerno, iya usab nga gi-ila ang panginahanglan nga
makab-ot ang 13.6 porsiento nga target sa 2015 ug kinahanglang doble ang
himoong pagpaningkamot sa gobyerno aron makab-ot kining maong 110 nga target.
“Usa sa nag-unang estratehiya mao ang pagtutok sa
unang 1,000 ka adlaw sa matag bata-gikan sa pagkaporma hangtud na nga
magpangidron kini ug 2 ka tuig,” matod pa ni. Presidente Aquino.
Mahimo kining
makab-ot pinaagi sa pagpahigayon ug nutrition counseling ngadto sa mga
nagsabak nga mga inahan, pag-andam kanila para sa pagpasuso sa ilang anak,
pagbutang ug lactating stations ug pagpromote sa paggamit sa alternatibong
gatas.
Gihatagan ug punto
sa Presidente ang kamahinungdanon sa paghatag sa bata ug maayong pagkaon sa
unang duha ka tuig sa iyang kinabuhi aron masiguro ang mas maayong pundasyon
sa ilang kinatibuk-ang pagkatawo ug panglawas.
Ang Department of Social Welfare and Development
(DSWD), uban sa mga LGUs ug mga non-government organizations, padayong
nagpatuman ug supplementary feeding programs, ug naghatag ug masustansiyang
pagkaon sa mga kabataang motambong sa daycare session.
Hangtud niadtong Septyembre niining tuiga, 581,388 ka mga kabataan sa tibuok nasod gikan 13,268 ka daycare centers sa tibuok nasod ang nakapahimulos na niining maong programa, matod pa sa Ptrsidente.
Isip tipik sa mga inisyatibo sa gobyerno, ang DSWD
padayong nag invest sa katawhan pinaagi sa Pantawid Pamilyang Pilipino
Program.
Ang mga hinabang gikan sa gobyerno padayon nilang
madawat samtang padayon nilang gisunod ang mga kondisyones nga gitakda sa
programa, matod pa sa Presidente.
“Ang programa nagbunga ug maayong resulta gikan sa
Enero hangtud sa Agosto niining tuiga diin ang compliance rate para sa
check-up ug immunization para sa nagsabak nga mga babaye ug mga kabataan mitala
ug 92.26 porsiento. Sa pagpurga sa mga kabataan nga nagpangidaron ug gikan 6
ngadto sa 14 anyos, ang compliance rate miabot ug 99.23 porsiento,” nagkanayon
ang Presidente.
“Ang matag lakang nga atong gihimo nagasukad sa usa lamang ka katuyoan- kini mao ang pag-atiman sa kaayuhan sa matag Filipino ug hatagan sila ug mas halapad nga kahigayonan sa kalambuan, nagkanayon ang Presidente.
Sa samang nanawagan ang Presidente sa mga ginikanan
nga giyahan ang ilang mga anak ug andamon ang ilang kaugmaon sanglit ang mga kabataan
man mao ang giilang maoy magmugna sa atong ugma.
Ang pagtubag sa nutrisyonal nga panginahanglan sa
katawhan, mao ang nag-unang obligasyon sa gobyerno tungod kay sukwahi sa
ubang mga problema, ang unsa mang kalangan pagsulbad sa malnutrisyon, aduna
nay dakong epekto sa katawhan ug sa katakos sa nasod nga molambo, pahayag pa
sa Presidente.
Ang 2012 National Nutrtiion awarding ceremnony nga
gi-organisa sa Department of Health, nagtumong nga hatagan ug pag-ila ang
natampo sa mga LGUs ug Barangay Nutrition Scholars sa pagpalambo sa ilang komunidad.( ATR/PCOO/PIA9-Zambo Norte)
|
November 16, 2011 - Wednesday
Friday, November 9, 2012
Aquino naghangyo sa mga ahensiya sa gobyerno ug publiko nga magtinabangay pagsulbad sa malnutrisyon
Subscribe to:
Posts (Atom)