Gobyerno, padayong naghatag ug tambag sa mga biktima sa bagyo

Ni Alfonso T. Ruda

DIPOLOG CITY, DEC. 17(PIA)--- Ang gobyerno misaad nga siguraduhon ang “emotional well-being” sa mga biktima sa bagyo sa Mindanao human gikataho nga kadaghanan kanila nag-antus sa sakit sa utok gumikan sa nasinatiang katalagman, matod pa sa usa ka Opisyal sa Palasyo.

Sa usa ka pakighinabi sa sibyaananang DZRB-Radyo ng Bayan, gipahayag ni Deputy Presidential spokesperson Abigail Valte, nga miadto ma sa mahitaboan sa bagyo ang pipila ka membro sa gabinete ni Presidente Benigno Aquino III ug nakipagdiyalogo sa mga naluwas sa katalagman isip tipik sa nagpadayong pagpaningkamot sa gobyerno nga mahibalik sa normal ang ilang kinabuhi.

Ilang gipasabot sa mga biktima sa kalamidad nga gipatuman na sa gobyerno ang pagpanghatag sa hinabang ngadto sa mga biktima, ingon man ang pagpabarog ug balik sa nangaguba nilang pinuy-anan aron mahibalik sa normal ang ilang mga kinabuhi.

“Gawas sa pagpabakwet ug paghatag ug hinabang sa mga biktima sa bagyo, naghatag usab ang Department of Social Welfare and Development ug stress debriefing sa mga biktima, ug uban sa gidaghanon sa ilang mga social worker, usa gyud kini ka malisod nga tahas, “matod pa ni Valte.  

Samtang padayong nanghatag ang gobyerno ug pagkaon, sinina ug puluy-anan ngadto sa mga biktima, gisiguro usab sa gobyerno nga anaa sa maayong panglawas ang mga biktima.

Samtang ang kabahin sa ispirituhanong aspeto, gitugyan na kini sa gobyerno ngadto sa mga kaparian ug mga pastor nga sa lokalidad ang paghatag ug ispirituhanong tambag ngadto sa mga biktima.

Isip reaksyon sa taho nga nanghatag ang Department of Environment and Natural Resources ug  logging permit sa mga lugar nga naapektuhan sa bagyo, si Valte miingon nga ila pang gipaabot ang resulta sa imbestigasyon nga gimando sa Presidente.

“Dihang nagpadayon pa ang bagyo ug ato pa lang nakita ang epekto sa bagyo, duna nay nag-ingon niana. Ato nala kining gitugyan sa mga membro sa grupong gitahasang mag-imbestigar niini, sanglit usa usab kini sa posibling mga hinungdan- ang illegal logging ug pagmina,” dugang pa ni Valte.

“Tipik kana sa imbestigasyon.  Ang DOJ, DENR, DILG, sila ang gimanduan sa Presidente  nga molantaw kon ngano ug unsa ang hinungdan sa nahitabo sa Davao Oriental ug Compostela Valley,” panapos pa ni Valte.(ATR/PCOO/PIA9-Zambo Norte)

Malakanyang mipahalipay ni Donaire sa knockout victory batok sa Mexican nga kaaway

By Gideon C. Corgue

PAGADIAN CITY, December 16 (PIA) –- Ang Malakanyang mipahalipay ni Nonito “Filipino Flash” Donaire sa iyang pagpalukapa sa Mexican nga Jorge Arce sa katapusang segundo sa ikatulo nga hugna sa ilang World Boxing Organization Super Bantamweight title bout nga gipahigayon sa Toyota Center sa Houston, Texas ning Sabado (Domingo sa Manila).

Si Deputy Presidential Spokesperson Abigail Valte nagkanayon sa interview nga gipalanog sa dzRB Radyo ng Bayan ning Domingo nga ang kadaugan ni Donaire mao ang pagtapak sa kapildihan nga naangkon sa iyang kauban nga Filipino boxing superstar nga si Emmanuel Pacquiao kinsa napildi kang Mexican Juan Manuel Marquez niadtong Desyembre 9.

“Buot natong ipaabot ang kinasing-kasing nga pagpahalipay kang Nonito Donaire tungod kay midaug siya. Atong nakita nga sa ikatulo nga KO (knockout) ang atong nakita kaganina batok sa Mexicano nga si Jorge Arce. busa si Mr. Donaire ang malampuson nga midepensa sa iyang WBO Super Bantamweight nga korona,” matud pa ni Valte.

“Malipayon kita ning maong kadaugan niya ilabi na gayud nga daghan sa atong mga kababayan nga sports fans ang halos dili makatuo sa kapildihan ni Manny Pacquiao kay Juan Manuel Marquez ,” dugtong pa niya.

“Busa usa kini ka welcome victory dili lamang sa mga Filipino sports fans apan sa tanang katawhang Pilipino,” matud pa ni Valte. (GCC/PCOO/PIA,Pagadian City)