Kagamhanan mopirma sa kasabutan sa kalinaw uban sa MILF sa dili pa matapos ang tuig

ni Claro A. Lanipa

Pagadian City, Sept 5 (PIA) –  Ang tigpamaba sa  Office of the Presidential Adviser on the Peace Process (OPAPP) ug Communications Unit Director Polly Michelle Cunanan miingon nga positibo ang  kagamhanan ni Presidente Aquino nga ang kasabutan sa kalinaw uban sa Moro Islamic Liberation Front (MILF) mahimong mapirmahan sa dili pa matapos ning tuig ug kining kasabutan “uyon sa tanang stakeholders sa Mindanao.”

Atol sa gipahigayong Kapihan ning bag-o lang, gibutyag ni Cunanan nga ang inisyatibo sa kagamhanan alang sa kalinaw uban sa MILF nakaangkon na mga positibong resulta, ug “panahon na karon alang sa tanang Pilipino aron suportahan ang proseso sa ingon niana makatabang sila sa hulma sa kasaysayn sa kalinaw sa nasud.”

“Ubos sa programa sa maayong pangagamhanan sa administrasyong Aquino sa gitawag “Daang Matuwid,” aduna na kita’y nakab-ot mga kasabutan uban sa mga nagkalain-laing grupo, lakip ang kasamtangan negosasyon sa kalinaw uban sa MIULF,” miingon si Cunanan.

“Aduna kita’y Presidente kinsa adunay dakong tinguha sa pagkab-ot sa kalinaw. Naglaom ang kagamhanang Aquino nga mapirmahan na ang  kasabutan uban sa MILF sulod ning tuig,”  si Cunanan miingon.

Matod pa niya, atol sa gipahigayong pormal nga negosasyon tali sa kagamhanan sa Pilipinas ug sa MILF peace panels sa Kuala Lumpur, Malaysia ning milabay’ng Agosto, “ ang duha ka partido ang naglihok na sa unahan  sa paghulma sa usa ka posibleng kasabutan,” dugtong pa ni Cunanan.

“Panahon na karon sa mga Pilipino aron molambigit ug  mohatag sa ilang hingpit nga suporta sa gitunguha sa kagamhanan aron makab-ot ang angay ug malahutayong solusyon sa  dugay na kaayong mga armadong kasamok sa nasud,” gipasabot ni Cunanan. (OPPAP/CAL/PIA9)

Hepe sa DAR namahayag walay mass lay-off

ni Franklin P. Gumapon

DIPOLOG CITY, Sept. 5 (PIA) - - Gipanghimakak ni Agrarian Reform Secretary Virgilio delos Reyes ang mga taho nga adunay 7,000 ngadto sa 9,000 ka mga trabahante sa maong buhatan nga mawad-an sa trabaho inig kahuman sa implementasyon sa Comprehensive Agrarian Reform Project sa Hunyo 30, 2014.

Gipasabot ni delos Reyes karong bag-o nga ang trabaho sa Department of Agrarian Reform (DAR) dili lamang ang pagpang-apud-apod ug yuta kon dili ang pagpalambo usab sa kinabuhi sa mga mga mag-uuma kaniadto, karon ug sa umaabot.

Matud pa ni delos Reyes nga ang 2014 scenario kamulo pa karong giumol sa DAR, Department of Agriculture (DA), Department of Environment and Natural Resources (DENR) inabagan sa Department of Budget and Management (DBM).

Ang gobyerno nagtinguha sa usa ka hapsay nga gabayan sa agrikultura, kaangayan sa katilingban, pag-apud-apod sa yuta, malamboong pag-atiman sa yuta ug pagparehistro sa yuta.

Sa pagkakaron, wala pay konkretong plano alang niini, apan gipaneguro sa kagamhanan nga ang kaayuhan sa tanan mao ang unang lantawon sa gobyerno.

Gipaklaro ni delos Reyes nga ang iyang gisumitir sa DBM mao lamang ang usa ka transition plan nga mag streamline sa mga personahe sa DAR agig pangandam sa 2014 scenario.

Gipasabot sa hepe sa DAR nga ubos sa transition plan, dili wagtangon ang maong buhatan, kon dili ipahimutang ang mga trabahante ha-um sa panginahanglanon sa maong buhatan.

Nakita usab sa DAR nga ang pag-apud-apod sa tanang yuta ubos sa CARP dili mahuman inig abot sa Hunyo 30, 2014 tungod kay adunay mga kayutaan nga nag-atubang pa ug mga asunto sa korte nga maoy hinungdan nga dili pa kini mahatag sa mga mag-uuma. (FPG/PCOO/PIA-Zamboanga del Norte)

Palasyo nagyangyo sa katawhan naigo sa linog nga moayuda sa gobyerno

ni Franklin P. Gumapon

DIPOLOG CITY, Sept. 5 (PIA) - - Gihangyo karong bag-o sa gobyernong Aquino ang mga katawhan nga naapektuhan sa linog nga moayuda sa mga buhatan sa kagamhanan aron makalikay sa kadaut.

Kini ang pamahayag ni Presidential Spokesperson Edwin Lacierda kinsa mipasabot nga ang gobeyrno kanunay’ng naglantaw sa kaseguruhan sa katawhan.

Nanawagan usab si Lacierda sa katawhan nga magbantay ug mag-amping kanunay.

Dugang pa ni Lacierda nga dili una mobalik ang katawhan sa ilang tagsa-tagsa ka pinuy-anan kon adunay pagtay-ug sa yuta ug hulaton ang pahimangno sa Provincial Disaster Risk Reduction Management Council (PDRRMC) kon pwede na silang mobalik.

Kahinumduman nga gitay-ug sa usa ka makusog nga linog ang sidlakang kabisay-an kaniadtong Biernes nga naka-apektar sa may 28,000 ka mga molupyo. Ang maong linog nga mikalas ug usa ka kinabuhi may magnitude nga 7.6.

Gipasalamatan usab ni Lacierda ang media sa tabang niini ngadto sa gobyerno pinaagi sa paghatag ug ensaktong kasayuran ngadto sa katawhan sama sa Bombo Radyo, DZRH, DZMM, DZBB ug tanang estayon sa Radyo ng Bayan. (FPG/PCOO/PIA-Zamboanga del Norte)

Aquino, NEDA board mi-aprobar pagkatukod sa mga bag-o nga tugpahanan

Ni  Gideon C. Corgue

PAGADIAN CITY, September 4 (PIA) – Si Presidente Benigno S. Aquino III ug ang National Economic and Development Authority (NEDA) board mi-arobar ning Martes sa katukuran sa Bicol International Airport project ug ang New Bohol (Panglao) Airport Development project.

Ang P4.7 bilyones nga Bicol International project sa Daraga, Albay ang mohulip sa kasamtangan nga Legazpi Airport, si Secretary Ramon Carandang sa Presidential Communications Development and Strategic Planning Office nagkanayon sa media briefing sa Malakanyang ning Martes.

Ang pasiuna nga plano mao ang pagpadako sa Legazpi Airport apan si Carandang nagkanayon nga adunay bungtod nga nagbabag sa mga eroplano busa ang mga tigplano nagkinahanglan nga mangita ug bag-o nga lokasyon.

Ang Department of Transportation and Communication mhimo ug pagtuon ug nakaalingat nga mas barato nga mobalhin sa Daraga kay sa mopatag sa bungtod nga mogasto sa kagamhanan sa P3 bilyones.

“Ang kasangkapan sa tugpanahan usa ka maayong kabtangan nga mabaligya aron ibayad sa pipila ka mga galastohan sa pagbalhin,” iyang naalinggata  . 

Ang P8-bilyones nga New Bohol (Panglao) Airport Development Project, sa laing bahin, kung matukod ang gilauman nga mopauswag sa kauswagan samtang ang mga pamatigayon ang molambo ug daghan nga mga turista ang mahidangat sa Visayas region. 

Gawas sa pagtukod sa bag-o nga mga tugpahanan, ang NEDA board mo-aprobar usab sa Light Rail Transit Line 2 East Extension project ug ang pagpalit sa 52 ka mga bag-o nga kotse alang sa Metro Rail Transit (MRT). 

Ilawom sa P9.7 bilyones ang LRT Line 2 East Extension project, usa ka 4.19-kilometer extension ang pagatukuron gikan sa Santolan Station ngadto sa  Masinag Junction.

Ang duha ka dugang nga mga stations pagatukuron sa Emerald Drive sa Cainta, ug sa Masinag Junction sa dakbayan sa Antipolo.

P2.7-B nga pahat sa OP para sa 2013 gi-aprobahan sa Kamara

Ni Alfonso T. Ruda

DIPOLOG CITY, Sept. 4,(PIA)---Ang House Committee on Appropriation mi-aprobar kagahapon (Martes) sa P2.7 bilyones  nga pahat sa Office of the President para sa tuig 2013.

Ang gisugyot nga pahat sa OP gipresentar ni Executive Secretary Paquito Ochoa Jr., sa House Committee on Appropriations ug dali usab nga giaprobahan sa mga membro sa komiti sa diwa sa inter-parliamentary courtesy ug pagtahod sa parehong sanga sa gobyerno.

Alayon niini, kinasing-kasing nga gipasalamatan ni Ochoa ang komiti sa dali niining pag-aprobar sa pahat para sa OP.

Ang 2013 budget sa OP mas taas ug 14.26 porsiento kay sa pahat karong tuiga. Ang labing bahin niini mapunta sa pondong gamiton para sa salary adjustment sa mga empleyado ilalom sa ika-upat nga hugna sa pagpatuman sa Salary Standardization Law(SSL), ingon man dinagkong papaayo, rehabilitasyon ug pagpa-anindot sa nagkalain-laing edipisyo ug pasilidad sulod sa Malakanyang complex.

Ang P111-milyones nga gidugang sa pahat sa OP sunod tuig mapunta sa Personal services nga gidugangan ug 39 milyones ka pesos ug nahimong P552.9-milyones, ug Capital Outlay nga gihimong P300.4 milyones gikan sa  kasamtangang P150.6 milyones.

Sa laing bahin, gikuhaan usab sa OP ug P77-milyones ang alokasyon para sa Mintenance and Other Operating  expenses ug gihimong P1.88-bilyones gikan sa P1.96-bilyones nga pahat karong tuiga.

Gipadak-an usab sa OP ang pahat sa Capital Outlay ilalom sa proposed plan sa OP sa tuig 2013, para pagpaayo ug pag-improve sa nagkalain-laing edipisyo ug pasilidad sulod sa Malakanyang complex diin kadaghanan niini nagpangidaron ug gatusan ka tuig. Nakatakda usab nga ipaayo sa OP ang nagkalain-laing edipisyo ug pasilidad sa gawas sa Malakanyang sa sama sa Mansion House sa Baguio City; Malakanyang Park sa Nagtahan, Manila ug Malakanyang sa Sugbo sa Cehu City.

Sumala pa sa Kalihim sa Ehikutibo, ang pahat sa OP gigiyahan sa prinsipyo sa fiscal discipline, ang prinsipyong gi-apply pinaagi sa pagdefine sa matuod nga tumong ug prayoridad sa natad sa proyekto ug kalihokan; katakos pinaagi sa pag-obserbar sa bili sa salapi sa pag-ggahin sa alokasyon ug paggamit sa mga resources ug transparency ug accountability pinaagi sa pagbutang ug delivery units sa mga cost centers.(ATR/PCOO/PIA9-Zambo Norte)