By Gideon C. Corgue
PAGADIAN CITY, September 30 (PIA) –- Ang Malakanyang nagpadayag sa iyang paglaum ning Domingo nga ang adbokasya sa reporma ni Presidente Benigno S. Aquino III pinaagi pagpatuman sa matinud-anon nga mga lakang pagwagtang sa corruption sa kagamhanan ang magpadayaon hangtud sa katapusan sa tuig.
Sa press briefing nga gisibiya sa dzRB Radyo ng Bayan, si Presidential Communications Development and Strategic Planning Office Secretary Ramon Carandang nagkanayon nga bisan pa man nga ang kinatibuk-an nga bulan sa Septyembre ang nakasinati sa daghan nga mga pagsulay ug isyu, ang administrasyon ni Presidente Benigno S. Aquino III nagpabilin nga matinud-anon sa iyang mga paningkamot pagwagtang sa corruption sa kagamhanan.
Tipik sa mga pagsulay nga nasinati sa administrasyon ni Aquino naglakip pagtapos sa krisis sa dakbayan sa Zamboanga, pagpasaka ug sumbong sa wala pagbayad ug buhis batok sa gikatuhuan nga pork barrel scam queen nga si Janet Lim Napoles, mga reporma sa Bureau of Customs ug pagduso sa ubos balay balaoranan sa balaod nga pagwagtang sa priority development assistance fund (PDAF) gikan sa nadudnong budget.
“Mahuman na ang bulan sa Septyembre ug kung atong hunahunaon daghang nahitabo sa nakalabay nga bulan. Didto sa dakbayan sa Zamboanga sumala sa gipahibalo ni Secretary Voltaire Gazmin niadtong usa ka adlaw nga naluwas na Zamboanga sa mga pwersa ni Misuari ug nagsugod na ang mga clearing operations,” matud pa ni Carandang.
Iyang naalinggatan nga ang katawhan makalaum nga ang pagpasaka ug mga kaso batok kang Nur Misuari, ang chairman sa Moro National Liberation Front ug sa iyang mga kaabin sa krisis sa dakbayan sa Zamboanga.
“Sa isyu mahitungod sa isyu sa PDAF, nakapasaka na kita ug kasong plunder batok kang Janet Lim-Napoles ug sa uban pang mga magbabalaod. Napasakaan ug kaso nga tax evation si Napoles niadtong usa ka adlaw pa lang, naduso na sa ubos balay balaoranan ang budget nga nagtangtang sa alokasyon sa PDAF,” matud pa ni Carandang tungod kay ang imbistigasyon sa mga tawo nga direkta nga nahilambigit sa scam ang magapadayon uban ang tukma nga mga kaso nga ipasaka sa labing madali nga panahon,” matud pa ni Carandang. (GCC/PCOO/PIA,Pagadian City)
