Ni Alfonso T. Ruda
DIPOLOG CITY ,
OCT. 15(PIA)--- Gipahalipayan sa Malakanyang si Nonito “The Filipino Flash” Donaire
sa malampuson niyang pagdepensa sa iyang duha ka bakos batok sa iyang kontrang hapones
nga si Toshioki Nishioka sa ilang panagsangka didto sa Home Depot Center,
Carson City, California sa Estados kagahapon, Oktubre 14.
Ang kalipay sa Malakanyang gipabati
ni Deputy Presidential spokesperson Abigail Valte sa regular press briefing sa Malaknyang
nga buhi usab napaminawan sa Radyo ng Bayan-DZRB.
Si Nishioka, 36 anyos, gipalukapa ni
Donaire sa ikaduhang higayon pinaagi sa right cross sa tunga-tunga bahin sa ikasiyam
nga hugna ilang away aron magmadaugon pinaagi sa Technical knockout (TKO) ug mapabilin
sa iyang mga kamot ang International Boxing Federation (IBF) ug World Boxing
Organization (WBO)super bantamweight division title.
Sayo niini, gipahagba usab ni Donaire
si Nishioka sa ikaunom nga hugna pinaagi sa left upper cut.
Matod pa ni Valte, ang kadaugan ni
Donaire nagpalig-on sa makausa pa sa talagsaong abilidad sa mga Filipino sa
natad sa boksing nga magdala ug kabantog ug dungog sa mga Filipinhon
“Busa
dili lamang si Manny Paquiao, duna usab kitay Nonito Donaire ug uban pang
nagakasikat nga mga Filipinong boksidor nga magdala ug kadungganan sa nasod,”
matod pa ni Valte nga nagtumbok kang Saranggani Congressman Emmanuel Paquiao
nga naghupot ug walo ka nagkalalain-laing kalibutanong kampeyonatong bakus sa walo
ka managlahing division sa boksing.(ATR/PCOO/PIA9-Zambo
Norte)
