Pilipinas, kampeyon sa 5th ASEAN Regional Quiz Competition

Ni Alfonso T. Ruda

DIPOLOG CITY, AUG. 6(PIA)---Ang Philippine team nga gilangkuban sa mga magtutungha sa sekondarya sa nagkalain-laing bahin sa nasod ang migawas nga mananaog sa gipahigayong 5^th ASEAN Regional Quiz Competition nga gipahigayon niadtong Biyernes, Agosto 3, 2012 didto sa Phnom Penh, Cambodia.

Ang Phil. Team gilangkuban nila ni Fhrancesca Anne Inacay sa St. Albert, the Great High School sa Dagupan City(rehiyon I); Kristiyanne Paul de Pedro sa Koronadal Comprehensive National High School(rehiyon 12); ug Maria Angela Krizelle Rubin sa San Joaquin National High School sa Calbayog City migawas nga mananaog sa gipahigayong 5^th ASEAN Quiz Regional Competition batok sa 27 ka mga contestants gikan sa mga  nasod sa Brunie; Thailand; Cambodia: Indonesia; Laos, Malaysia; Myanmar ug Vietnam.

Ang Philippine Team nakakuha ug kinatibuk-ang 71 puntos nga gisundan sa Cambodia, 70 puntos ug Thailand, 68 puntos.

Ang kompetisyon dunay tulo ka rounds-ang unang round gilangkuban sa True or False, 20 puntos; ikaduhang round nga gilangkuban sa Multiple Choice, 20 puntos ug ang ikatulong round nga gilangkuban sa Fill in the Blanks, dunay 40 puntos.

Ang Philippine team, perfect sa unang round, nakakuha ug 19 sa ikaduhang round ug 32 puntos.

Ang Pilipinas nahimong inila tungod sa kanunay nilang pagdaog sa ASEAN Quiz Regional Competition. Niadtong 2002, nakakuha sa una ug ikaduhang puwesto; niadtong 2004, nakakuha kini ug laing unang puwesto, samtang niadtong 2006, nakakuha ang Pilipinas ug ikaduhang puwesto ug laing unang puwesto  sa 2009.

Ang mga tunghaan sa sekondarya nga gustong mosalmot sa sunod nga ASEAN Quiz Competition, gi-awhagan lamang nga mag-email sa Department of Foreign Affairs ASEAN secretariat sa asean.philippines@dfa.gov.ph. Ang mechanics sa ASEAN Quiz makita na usab sa internet.(ATR/PCOO/PIA9-Zambo Norte).      

Palasyo miingon: RH Bill makatabang sa ekonomiya sa nasod

Ni Alfonso T. Ruda

DIPOLOG CITY, AUG. 6(PIA)---Nanawagan karon ang Malakanyang sa publiko nga suportahan ang Reproductive Health Bill nga giduso sa administrasyong Aquino uban ang pag-ingon nga makatabang kini sa nasod, ilabi na sa natad sa ekonomiya.

Sa usa ka pakighinabi sa radyo DZRB, Radyo ng Bayan, gipangayo ni  Presidential Legislative Liaison Office Chief, Manuel Mamba sa mga magbabalaod nga ipasar na ang Reproductive Health Bill, tungod kay mahinungdanon kini sa nasod.

Ang pahayag giluwatan ni Mamba samtang nagpahigayon ug rali ang mga membro sa Simbahang Katoliko sa Edsa Shrine niadtong Sabado, Agosto 4, 2012 aron supakan ang RH Bill.

“Maanindot kaayo kining maong  balaodnon. Kon ayuhon lang natog basa, atong makita nga ilalom niining maong balaodnon, dunay maayong kaugmaon ang atong mga anak ug ang katawhang Filipinhon sa umaabot nga mga adlaw,” matod pa ni Mamba.

“Usa pa, ang atong ekonomiya kinahanglang makasabay sa pagtubo sa atong populasyon, nga sa sobrang pagdako sa atong populasyon, bisan kanus-a dili gyud makasabay ang atong ekonomiya. Gusto nato ang maayong kaugmaon para sa atong mga kaigsoonan, ato nang ipasar ang RH BILL,” dugang pa ni Mamba.

May kalabutan sa pahayag nga ang RH Bill pro-abortion, si Mamba miingon nga wala kini sa maong balaodnon, ug paagi lang kini aron ilaron o dili tug-anan sa kamatuoran ang katawhan.

“Ang kabalaka sa simbahan nga dunay abortion niining maong balaodnon, dili kana matuod. Atong tug-anan sa matuod ang katawhan,” uban ang pag-ingon dunay obligasyon ang gobyerno nga hatagan ug katungod ang katawhan nga magpili sa gidak-on sa ilang pamilya.

Niining panahona, duna na silay igu-igong representante sa duha ka Balay sa Kongreso ug kompiyansa nga mapasar ra ang nasangpit nga balaodnon.

Nanawagan usab ang opisyal sa publiko ug mga magbabalaod nga dili “i-politicize” ang isyo tungod kay dili kini kabahin sa politika kundili kabahin kini sa kaugmaon sa atong nasod.

Gatusan ka mga tawo ang nagtigom sa Edsa Shrine niadtong Sabado sa hapon nga gihulagway sa Simbahang Katoliko nga usa ka dakong rali aron ipakita ang hugtanong pagsupak sa mga Filipino sa nakapending nga balaodnon sa lehislatura sulod na sa 4 ka tuig.(ATR/PCOO/PIA9-Zambo Norte) 

Malakanyang miabiba sa US State Department Country Report on Terrorism nga nagtumbok sa Pilipinas nga mahinungdanong kaabag sa Anti-Terrorism campaign

Ni Gideon C. Corgue

PAGADIAN CITY, August 6 (PIA) – Ang Malakanyang miabiba ning Domingo sa US State Department’s Country Report on Terrorism nga nagtumbok sa Pilipinas isip mahinungdanon nga kaabag sa iyang Anti-terrorism Assistance program.

Si Deputy Presidential Spokesperson Abigail Valte mitaho nga ang Pilipinas nagpabilin nga komitado sa iyang pagpalig-on sa iyang mga paningkamot pagpakibatok sa terorismo sanglit ang terorismo dili lamang ang gipakabana sa Pilipinas apan kini ang gipakabaa sa mga nasud sa tibuok kalibutan. Atong ipadayon ang atong mga paningkamot sa pagpakigbatok sa terorismo,” matud pa ni Valte.

Sa gipaguila nga taho penetsahan Agusto 1, ang Department of Foreign Affairs nagkanayon nga ang US State Department mipagula sa resulta sa iyang  2011 Philippine Country Report on Terrorism nga nag-ila sa pagpakigbatok sa terorismo sa  kagamhanan sa Pilipinas.

Kini ang nagkanayon nga ang Pilipinas nagpadayon sa iyang lig-on nga counterterrorism cooperation uban ang Estados UNidos pinaagi pagtanyag sa tactical ug investigative training aron pagsuporta pag-usab sa southern Philippines gikan sa military ngadto sa civilian counterterrorism authority sa Mindanao, “ang Pilipinas nagpabilin nga mahinungdanong kaabag sa nasud sa Antiterrorism Assistance program sa Estados Unidos.”

Ang taho nagkanayon nga ang pagpatuman sa administrasyon ni Presidente Benigno Simeon Aquino III sa 2011-2016 Internal Peace and Security Plan nakatampo sa kauswagan sa iyang pagpakigbatok sa terorismo. (GCC/PCOO/PIA9-Zambosur)