Aquino mipasalamat sa IMF Managing Director sa iyang kompiyansa sa Pilipinas

Ni Alfonso T. Ruda

DIPOLOG  CITY, JAN. 25(PIA)--- Gipasalamatan ni Presidente Benigno Aquino III si International Monetary Fund (IMF) Managing Director Christine Legarde sa iyang kompiyansa sa Pilipinas dihang nagtagbo ang duha atol sa pagtambong sa Presidente sa tinuig nga tigom sa World Economic Forum didto sa Davos, Switzerland.

Si Presidente Aquino ug Legarde nagtagbo niadtong Martes sa gabii. “Ang miting milungtad ug 40 minutos,” matod pa ni Presidential Communications Development and Strategic Planning Secretary Ricky Carandang.

“Sama lang kadto sa courtesy call, pagbinayloay ug mga hunanuna diin gipahibalo ni Legarde ang Presidente sa pag-upgrade sa IMF sa growth projection sa Pilipinas,” matod pa ni Carandang ngadto sa mga membro sa Philippine media.

“Sumala pa sa IMF, base sa ilang pagbalansi, positibo kaayo ang mga butang alang sa Pilipinas ug kompiyansa silang makab-ot ang target base sa momentum nga nasinatian,” matod pa ni Carandang.

Gipatas-an sa IMF ang economic growth forecast sa Pilipinas ngadto sa 6 porsiento 2013 gikan sa 4.8 porsiento niadtong 2012 tungod kay nagpaabot sila nga mas mopaspas pa ang pagtubo kay sa una nilang gilauman. Gumikan niini, gipasalamatan sa Pangulo si Legarde sa iyang kompiyansa sa Pilipinas.  

Sa ilang miting, gipaambit ni Presidente Aquiuno kang Legarde ang pagpaningkamot sa gobyerno nga makab-ot ang kalambuan pinaagi sa tukmang paggasto sa pondo sa gobyerno ug pagpatag sa lugar-dulaanan aron makadani ug dugang mamumuhunan, matod pa ni Carandang.

Matod pa sa Kalihim, nakadayeg ang Presidente sa Hepe sa IMF. Lisod kaayo ang trabaho ni Legarde tungod kay iyang responsibilidad ang pagkumbinsi sa mga lider sa kalibutan paghimo ug lisod nga disisyon. Gidayeg kini sa Presidente tungod kay nahimo kini niya sa epektibo nga paagi, matod pa niya.

Mitambong usab sa miting ni Presidente Aquino ug Legarde mao sila si Foreign Affairs Secretary Albert del Rosario, Budget Secretary Butch Abad, Secretary Cesar Purisima, Secretary Gregory Domingo, Secretary Rene Almendras ug Secretary Arsenio Balisacan.(ATR/PCOO/PIA9-Zamboanga del Norte)

Palasyo masaligong mosagubang sa nagkataas paghidangat sa mga turista sa nasud

Ni Claro A. Lanipa

PAGADIAN CITY, 25 Jan (PIA) – Masaligon ang Malakanyang nga ang kagamhanan makasagubang sa nagkataas paghidangat sa mga turista dinhi sa Pilipinas human natala kini sa upat ka milyon sa 2012.

Ang Pilipinas nilapas sa upat ka milyon visitor arrival mark alang sa 2012 kon mikabat kini sa 4,272,811 langyaw’ng bisita sa miaging tuig. Kining ihap nagpakita sa 9.07 porsiento nga tubo kon itandi sa 3,917,454 ka mga bisita  natala sa 2011.

Tali sa mga tinguha sa kagamhanan aron mopadayon kining kalamboan mao sa pagpalapad sa inprastruktura sa nasud ilabi na sa sekta sa turismo, miingon si Presidential Spokesman Edwin Lacierda sa usa ka press briefing sa Malakanyang ning bag-o lang.

Laing plano sa kagamhanan mao ang pagwagtang sa ‘common carriers tax’ aron  modani sa mas daghan nga mga turista, miingon si Lacierda, apan ang  sangputanan  niining maong lakang mokunhod usab ang koleksyon sa buhis nga mokabat  sa P1.1 bilyon.

“Maglaom kita nga mas daghan mga turisma ang moabot dinhi sa Pilipinas. Maoy hinungdan naneguro kita ug nag-andam  sa paghidangat sa mga turista ug mao kini ang  saad ni Secretary Mon Jimenez,” miingon si Lacierda.

Si Secretary Jun Abaya naghimo usab ug mga pagpangandam nga ang inprastruktura sa turismo mahiluna na gayud.”

Masaligong ang DOT nga anaa na sila sa tukmang dalan sa pagkab-ot sa tumong niini sa 10 milyon tourist arrivals sa tuig 2016.

Nagpabilin ang South Korea isip ang pinaka dakong merkado alang sa Pilipinas, matod pa sa DOT. Ang South Korea maoy unang nasud  nakatampo sa  usa ka milyon ka mga bisita sa 2012, dugtong pa sa taho. (PCOO/CAL/PIA9)

Presidente Aquino nagdala ug maayong balita gikan sa nasud ngadto sa mga trabahanteng Pilipino sa Switzerland

By Gideon C. Corgue

PAGADIAN CITY, January 25 (PIA) –- Si Presidente Benigno S. Aquino nagpadayag sa iyang kahinam mahitungod sa kahigayonan pagpakighimamat sa mga trabahanteng Filipino sa iyang pagbiyahe sa Davos, Switzerland aron pagtambong sa World Economic Forum (WEF).

Ang Presidente nagkanayon sa iyang departure speech sa wala pa nagsakay sa chartered Philippine Air Lines flight sa Ninoy Aquino International Airport Terminal 2 ning Miyerkoles sa gabii nga dili ang bugnaw nga panahon sa mga nasud sa Oropa ang makapugong sa mainit nga pag-abi-abi sa iyang mga katagi-lungsod nga gilauman nga makigtagbo kaniya karong Sabado.

“Dili pa mabalaka sa Switzerland tungod kay makauban nato ang atong mga kababayan sa Zurich,” matud pa sa Presidente.

“Nasayod ako nga dili nato mabati ang kabugnaw sa panahon tungod kay kini ang mahulipan sa kainit pagdawat sa atong isip ka Pilipino,” dugtong pa niya.

Matud pa niya nga linawas nga iyang ipadangat ang iyang kinasingkasing sa nasud kinsa wala lamang nakatabang sa ilang hingtundang pamilya dinhi apan lakip na ang ekonomiya sa nasud.

“Atong ipaabot kanila ang atong mga pasalamat sa dako nila nga natampo sa pag-uswag sa ekonomiya dili lamang sa Switzerland kung dili lakip na dinhi sa atong nasud,” matud pa sa Presidente.

“Ang atong pasalubong sa ilaha  mao ang maayong balita sa atong nasud, ug ang luwas ug maayo nga kahimtang sa ilang mga mahal sa kinabuhi,” dugtona pa niya.

Adunay gibana-bana nga  10,000 nga OFW nga nagpuyo ug nagtrabaho sa Switzerland.  (GCC/PCOO/PIA9-Pagadian City)