Ni Alfonso T. Ruda
DIPOLOG CITY, DEC.
20(PIA)---Gidumala
ni Presidente Benigno Aquino III kagahapon (Miyerkules) ang pagbalhin sa kamanduan
sa Philippine Navy ug ang retirement ceremony sa nagretirong Hepe sa Phil.
Navy.
Gitudlo
sa Presidente si Vice Admiral Jose Luis Alano isip bag-ong Flag
Officer-in-Command sa Phil. Navy puli ni Vice Admiral Alexander Pama.
Sa
iyang pagpakigpulong sa turn-over of command, nagpahayag ug paglaum si Presidente Aquino nga ipadayon ni Vice Admiral Alano ang mga
repormang nasugdan ni Pama sa Phil. Navy, partikularmente ang pagpalig-on sa
kapabilidad sa Phil. Navy batok sa mga hulga gikan sa sulod ug gawas sa nasod.
“Naglaum
ang publiko nga mabuntog ni Alano ang terorismo, matabangan ang nasod nga makabangon
gikan sa katalagman nga nahiaguman sa Mindanao ug mabatukan ang korupsyon sa
serbisyo,” matod pa ni Presidente Aquino.
Gumikan
sa dedikasyon sa Phil. Navy nga mapalambo ang iyang kaugalingon ug maandam ang
Pilipinas sa umaabot pang mga hagit, ang matag membro sa Navy, ingon man ang
tibuok nasod nga Filipinhon mahimo nang
magpasigarbo na usab sa ilang kaugalingon.
Gidayeg
sa Presidente ang pagpakita sa Navy sa ilang soberenyang katungod sa giilogang
teritoryo sa West Philipine Sea, ang dental ug medical mission, ingon man ang feeding
program ug disaster response initiatives sa Phil. Navy.
Ug
aron madasig nga mas maningkamot pa ang mga membro sa Armadong Kusog sa
Pilipinas, ang Presidente nagkanayon nga miggahin ang gobyerno ug 28 bilyones
ka pesos sulod sa usa ka tuig ug pito ka bulan sa iyang administrasyon para sa
AFP Modernization Program.
Gumikan
sa nagakadakong pondo sa AFP, nakapalit ang nasod ug Hamilton class-cutters-ang
BRP Gregorio del Pilar ug BRP Ramon Alcaraz ug BRP Tagbanua nga hinimo dinhi sa
Pilipinas.
Sumala
pa sa Presidente, nga gumikan sa pagpirma sa AFP Modernization Act niadtong miaging
semana, padayong mapalig-on sa Navy ang iyang
puwersa uban ang pag-ingon nga ilalom sa bag-ong spending plan sa
gobyerno, naggahin kini ug 75 bilyones ka pesos sa mosunod nga lima ka tuig
alang sa paghimong moderno sa AFP.
Matod
pa sa Presidente, ang gobyerno padayong maghatag ug desenteng puluy-anan para
sa mga membro sa kapulisan ug military uban ang pag-ingon nga sunod tuig,
naglaum siyang makompleto na sa National Housing Authority ang dugang 31,200 ka
mga balay alang sa mga pulis ug mga sundalo.
Sa
pagkakaron, miabot na sa 21,800 ka mga balay ang napahimo sa gobyerno alang sa
mga pulis ug mga sundalo.
Lakip
sa kauban sa Presidente sa maong kalihokan mao sila si Defense Sec. Voltaire
Gazmin, Manila Mayor Alfredo Lim, Rep. Rodolfo Biazon, ug Philippine Coast
guard Commander Rear Admiral Rodolfo Isoreno.
Si
Alano nga natawo niadtong Mayo 1, 1958, usa ka gradwado sa Philippine Military
Academy Class Matapat niadtong 1979 ug nakasilbi na sa military sulod sa 37 ka
tuig.
Lakip
sa mga pasidungog nga nadawat ni Alano mao ang 3 ka Distinguished Service
Stars, Outstanding Achievement Medal, Gawad sa kaunlaran, ug Military Merit Medal
nga dunay Spearhead Device.
Si
Alano naminyo kang Maria Hildelita nga usa ka corporate lawyer ug nakaangkon
sila ug duha ka anak babaye nga sila si
Maria Gabriela, 13 anyos ug Sofia Lourdes, 12 anyos. (ATR/PCOO/PIA9-Zambo Norte),