9,465 nga mga tawo ang naapektuhan sa baha sa Zamboanga del Norte , matud pa sa NDRRMC

By Gideon C. Corgue

PAGADIAN CITY, February 1 (PIA) –- Ang National Disaster Risk Reduction and Management Council (NDRRMC) mitaho nga adul-an sa 10,000 nga mga tawo sa Zamboanga del Norte naapektuhan sa baha tungod sa nagpadayon nga ulan.

Ang NDRRMC nagkanayon nga walay gitaho nga namatay apan ang baha nakaapektar sa 1,855 nga mga pamilya kon 9,465 nga mga tawo ug 422 nga ektarya sa agricultural lands.

Ang nasangpit nga ahensya nagkanayon nga ang naapektuhan mao ang dakbayan sa Dipolog sa mga barangay nga San Jose, Olingan, Biwan, Lugdungan, Punta, Dicayas, Gulayon, ug Turno; lungsod sa Polanco sa mga barangays nga Pian, Poblacion South, Labrador, Guinies, Obay, Anastacio, Villahermosa, Lingasad, ug Poblacion North; ug ang Barangay Basagan sa lungsod sa Katipunan.

Ang mga tinugyanan sa local disaster response nag-atiman sa mga naapektuhan gna pamilya.
Katluan ug duha ka mga tawo gikan sa Barangay San Antonio sa Katipunan ang naluwas, matud pa sa NDRRMC.

Matud pa sa NDRRMC nga ang nagpadayon nga ulan ning Huwebes nakahimo sa suba sa Polanco National Highway sa miawas sa dul-an sa usa ka metro.

Ang gidak-on sa tubig sa lungsod sa Rizal miabot sa tunga sa metro samtang ang suba sa San Jose sa dakbayan sa Dipolog miabot ngadto sa critical level.

Ang maong ahensya mipuno nga ang Barangays Sto. Niño, Basagan, Mulagas ug Lugdungan sa Katipunan ang naapektuhan usab sa tagahawak nga baha.

Matud pa nga ang mga naapektuhan nga pamilya sa Barangay Dicayas gibakwit sa barangay hall, samtang ang uban nga mga pamilya gidala sa duol nga mga tulunghaan ug hataas nga dapit. (GCC/PNA/PIA9-Pagadian City)

Aquino nagtudlo kang Mehol Sadain isip miyembro sa government negotiating team uban sa MILF

Ni Claro A. Lanipa

PAGADIAN CITY, 01 Feb (PIA) – Gitudlo ni Presidente Benigno S. Aquino III ning bag-o lang kang Atty. Mehol Sadain isip miyembro sa government panel  sa peace talks uban sa Moro Islamic Liberation Front (MILF).

Ang kagamhanang Aquino mipirma uban sa maong grupo ang Framework Agreement alang sa kalinaw sa Mindanao miaging tuig.

Gihulipan ni Sadain ang bakanteng puwesto nga gibiyaan ni Miriam Coronel-Ferrer kinsa nahimong chairman sa maong peace panel. Ang ilang kanhing hepe nga si Marvic Leonen nahimong associate justice sa Korte Suprema.

Gitudlo ni Presidente Aquino si Sadain niadtong April 2012 isip secretary/chief executive officer sa National Commission on Muslim Filipinos ug isip amirul hajj, ang hepe sa Philippine Hajj Mission alang sa Hajj 2012.

Usa siya sa kanhing commissioner sa Commission on Elections (COMELEC), ug natawo niadtong Disyembre 24, 1955 sa San Raymundo, Jolo, Sulu.

Pagkahuman sa iyang basic education sa Mindanao, si Sadain migraduwar sa Bachelor of Arts in Islamic Studies sa Institute of Islamic Studies of the University of the Philippines niadtong 1978.

Nagkuha usab siya law sa UP, ug nahimong ika 16 sa UP’s law class sa 1986. Natapos usab ni Sadain ang Shari’ah Training Course nga gi-sponsoran sa Office of Muslim Affairs niadtong 1992.

Sa wala pa siya magtrabaho sa gobyerno, usa siya ka lecturer sa UP College of Law. (PND/CAL/PIA9)

Presidente Aquino tigpabati sa Global Anti-Corruption Conference sa Huwebes

By: Mary May A. Abellon

DIPOLOG CITY,JAN. 31 (PIA)--- Si Presidente Benigno S. Aquino III maoy  tigpabati sa 5^th Global Conference of Parliamentarians Against Corruption nga ang pagbukas sa seremonya kay pagahimuon sa Philippine International Convention Center sa Pasay City karong Huwebes.

Ang Global Organization of Parliamentarians Against Corruption (GOPAC) kay usa ka international network sa mga parlyamentaryan nga naghinaot makab-ot ang maayong pang gobyerno ug mapakgang ang kurapsyon sa tibuok kalibutan. Sugod sa iyang paghimugso, ang GOPAC kay nagahatag ug impormasyon ug pagsabot, pagtukod ud international benchmarks, ug pag-uswag sa pampublikong kasayuran pinaagi sa panag-ipon sa global pressure ug national action.

Gikan sa Enero 30 ngadto Pebrero 2, ang Pilipinas kay maoy mudumala sa duol 500 ka mga delegado nga mga parliamentarians, mga mabalakong representante sa gobyerno ug mga indibidwal sa katilingban gikan sa 78 nga mga nasod sa ilang pangandoy nga ma konekta, matudluan ug masabtan unsaon sa mga magbabalaod mapukgang ang korapsyon.

Ang GOPAC Global Conference kay usa ka biennial event nga nagdala sa mha lideres, miyembro, linaomang mga miyembro, stakeholders ug funders  para mas ma-awhag, ma edukar ug ma andam ang GOPAC Chapters ug ang indibidwal nga mga miyembro sa padayong pagsugpo sa korapsyon. The komperensya kay usa ka multi-day event nga naglakip sa mga pagbansay-bansay asta mga pagpulong aron makita ang kausbawan ug paghibalag sa mga bag-ong hisgotan sa samang kalabotan.

Ang tema karong tuiga kay: “ Maayong Lideres, Maayong Balaodnon, Maayong Katawhan.”

Duyog sa Presidente mao si Bise-Presidente Jejomar Binay, mga Senador ug GOPAC Vice Chairman Edgardo Angara, Senate President Juan Ponce Enrile, GOPAC Chairman Naser Al Sane, House Speaker Feliciano Belmonte Jr., GOPAC CEO John Williams, Pasay City Mayor Antonino G. Calixto, Pasay City Representative Imelda Calixto Rubiano, and PICC General Manager Renato B. Padilla. (MAA/PCOO/PIA9-Zambo Norte)      

Palasyo mipahayag nga kagamhanan nangibabaw sa kahimtang sa kahusay ug kalinaw sa kauluhan

By Gideon C. Corgue

PAGADIAN CITY, January 31 (PIA) –- Ang Malakanyang mihatag kaseguruhan ning Miyerkoles nga ang kagamhanan mi-aksyon mga nag-uswag nga krimen sa kauluhan.

Sa press briefing sa Malakanyang, ang tigpamaba sa Presidente nga si Edwin Lacierda nagkanayon nga ang Dept. of the Interior and Local Government ang nangibabaw kung ang pag-aksyon sa kagamhanan ngadto sa kriminalidad ang pagahisgutan.

“Ang DILG nangibabaw niini. Si Secretary Manuel Roxas nangibabaw usab niini. Nakabalo siya sa kahimtang. Aduna siya mga matag-adlaw nga taho sa mga dautang panghitabo o bakaha mga pagsikop nga gihimo sa PNP. Ako nagtuo nga si Secretary Mar Roxas nakigsultihanay na hepe sa kapulisan nga si Director General Alan Purisima kalabot ning maong mga butang," si Lacierda mipahayag sa mga tigbalita mahitungod sa mga pagpangatake nga nahitabo sa Metro Manila.

Matud pa niya nga si National Capital Region Police Office chief Police Director Leonardo Espina nagtutok tulis sa SM Megamall.

“Daghan nang mga butang nga nahimo karon aron pag-ila ug pagdakop sa mga malapason sa balaod,” matud pa niya.

Dihang gipangutana kung ang Palasyo nalisang ba ning mga dautang panghitabo, si Lacierda nagkanayon nga atong gilantaw ang kinatibuk-ang kahimtang. Nahitabo nga adunay mga kinadayagan nga mga krimen ang nataho. Busa atong gitan-aw ang kinatibuk-ang kahimtang sa dautang panghitabo sa Metro Manila.”

Ang Palasyo naglaum nga si Interior Secretary Manuel Roxas mohimo ug taho sa mga aksyon nga gihimo sa kapulisan, matud pa niya.

Ang Presidente usab adunay pagsalig kang National Police chief Dir. Gen. Alan Purisima, matud pa Lacierda, bisan ug bag-o lang siya nangatungdanan pipila lang ka bulan ang nakalabay.  (GCC/PCOO/PIA9-Pagadian City)

DA motuboy sa organic farming, agri-tourism

Ni Claro A. Lanipa

Ang Department of Agriculture (DA) nagdasig sa mga mag-uuma, entrepreneurs, mga mahiligong sa pang’uma ug mga overseas Filipino workers aron sa pagtukod ug organic farms nga mosilbi isip agri-tourism sites.

Gibutyag ni Agriculture Secretary Proceso Alcala ang iyang awhag sa diha iyang gidayeg ang usa ka modelong organic farmer gikan sa Laguna nga si Ronald Costales, ug gihatagan sa usa ka certificate isip usa ka accredited technology extension provider, atol sa gipahigayong kasaulogan sa ika 26 nga anibersaryo sa Agricultural Training Institute (ATI), Department of Agriculture,  ning Enero 28, 2013.

Matod pa sa hepe sa DA si Costales nanag-iya sa usa ka ‘nature farm’ sa Majayjay, Laguna diin kanunay gibisitaan sa mga Pilipino ug langyaw’ng turista, ug nahimong unang agri-tourism site nga accredited sa Department of Tourism (DOT).

Si Costales napili isip ang pinaka maayong organic farmer sa nasud sa tuig 2012, ubos sa Gawad Saka, usa ka programa sa DA nga naghatag ug pagpasidungog sa mga bantugang ug malampusong tawo sa agrikultura ug panagat. Gikonsiderar usab siya sa DA ug DOST isip usa ka ‘magsasaka-siyentista’.

Ang iyang uma adunay gitawag integrated natural farming system gilangkoban sa organikong mga utanon, prutas, isda, manokan ug mga buhing hayop. Matod pa ni Costales nga gisagop usab niya ang Japanese ug Korean natural farming nga mga sistema.

Si Secretary Alcala miingon nga gusto siya molantaw daghang mga Costales sa umaabot nga mga katuigan, samtang ang kagamhanang Aquino nagduso sa agrikultura ug turismo.

Gane, si Presidente Aquino mikutlo sa agrikultura ug turismo isip usa sa iyang mga nahaunang mga programa sa nasud, atol sa iyang pakigpulong didto sa World Economic Forum sa Davos, Switzerland. (DA/CAL/PIA9)

NDRMMC anaa sa red alert paglusad sa Sokor ug rocket

By Gideon C. Corgue

PAGADIAN CITY, January 30 (PIA) –- Ang National Disaster and Risk Reduction Management Council (NDRRMC) nagpailawom sa red alert ning Martes human pagsulay sa  South Korea pagdala sa satellite sa kawanangan sa ikatulo nga higayon.

Ang NDRRMC nagkanayon nga ang Red Alert Status ipatuman isip “no fly Zone, no sailing, no fishing policies” ang ipatuman sa Pacific Ocean haduol sa Camarines Norte, Camarines Sur, Catanduanes, Albay, Sorsogon, Northern Samar, Southern Samar, Southern Leyte, Dinagat island, Surigao Del Norte, Surigao Del Sur ug Siargao Island.

Ang kagamhanan mopakanaog ug red alert status sanglit ang mga hingtungdang ahensya mopalig-on sa ilang mga hingtungdan nga disaster operation centers.

Subay sa pasiuna nga kasayuran nga gipadala sa Office of the Asian Affairs sa Dept. of Foreign Affairs, ang paglusad mahitabo sa Enero 30 ug Peb. 8 gikan sa Naro Space Center, Go Heung, Jeollanam-do.

Si NDRRMC Executive Director Benito Ramos nagkanayon nga ang rocket gilauman nga molabay 540 kms sidlakan sa Republic of Korea sa Miyerkoles sa 2:55 ug 5 p.m.

Si Ramos nagkanayon nga ang rocket mawad-an sa iyang duha ka fuel tanks ug mahulog sa dagat ug maguba ug masunog.

Hinoon,  si Ramos mihatag kaseguruhan nga dili maayo nga ang mga parte sa rocket moigo sa yuta.

Tungod ninii iyang giawhag ang katawhan sa sidlakang bahin sa Pacific Ocean (Bicol, parte sa Eastern Visayas ug Caraga) nga mohimo ug pagpangandam.

"Akong ipahibalo nga ang rocket launch sa South Korea dili mabatukon. Gawas pa niini, ang rocket dili magdagla sa makagusbat o bakaha “chemical payload” nga makadaut sa bisan kinsa. Kining maong paglusad tataw nga usa ka tumong nga scientific exploration lamang,’ dugtong pa niya.

Ramos nagkanayon nga ang maong ahensya wala niya gibalewala nga adunay pipila ka mga tawo mosulay pagpahimulos sa umaabot nga kalihokan nga mohimo ug kadaut.

Iyang gipahinumduman ang katawhan ilabi na ang mga nagpuyo sa Bicol, Eastern Visayas ug Surigao nga ang opisyal nga pagpahibalo ang magagikan sa NDRRMC.

Dugang pa niya nga walay paglupad, ug paglayag ug pagdili sa pagpanagat ang ipatuman sa mga nasangpit nga petsa aron pagpanalipod sa atong katawhan kinsa duol nga maagian sa maong rocket. (GCC/PCOO/PIA9-Pagadian City)

Panaghiusa, magdala sa Pilipinas sa kalambuan, matod pa ni Aquino

Ni Alfonso T. Ruda

DIPOLOG CITY, JAN.30(PIA)---Mahimong hingpit nga maangkon sa Pilipinas ang ekonomikanhong kalampusan kon dunay nasudnong panaghiusa ug ang matag Filipino motuman sa iyang kaakuhan, matod pa ni Presidente Benigno Aquino III sa pagpakigpulong atol sa pagsaulog sa ika-40 ka tuig nga anibersaryo sa National Economic Development Authority(NEDA).

Ang Presidente nga nahidangat niadtong miaging semana gikan mitambong sa World Economic Forum sa Dawo, Switzerland, mihandum pa sa iyang kasintian samtang didto sa maong nasod sa Europa.

Dunay kalainan ang Pilipinas ug Switzerland kon ang gidaghanon sa mga tawo ang hisgutan, diin kinahanglan pa kinig makigbisog ang Switzerland batok sa mas mapintas nga palibot.

Apan bisan pa man niining maong mga hagit, nahimong usa ka malambuong nasod ang Switzerland human nga naningkamot kini nga mapahimuslan ug ayo ang epekto sa ilang dakong bentaha ilabi na sa natad sa panalapi.

Ang paggamit sa napanahon ug tukmang impormasyon sa gobyerno mahinungdanon kaayo aron mahan-ay sa mga economic managers ang tukmang estratehiya ug disisyon para sa nasudnong kaayuhan.

“May panultihon sa mahilig sa computer nga nagkanayaon, Basurang mosulod, Basurang mogawas. Kung sayop ang mga datos, o dili tukmang ang tambal, labi pang malangan ang disisyon” matod pa sa Presidente.

Dako usab ang kausaban sa atong nasod sukad mipuli ang bag-ong administrasyon, kapin sa duha ka tuig ang nakalabay Karon, matod pa niya, halos mag-ilog ang mga langyawng kapitalista nga mobutang ug puhonan dinhi sa Pilipinas. “Pipila na ka tuig ang nakalabay, dili gani makita ang Pilipinas sa ilang radar,” matod pa ni Presidente Aquino.

Ang atong nasod nahimo usab nga panag-ingnan sa ubang mga nasod gumikan sa pagpakig-gubat niini sa korupsyon, matod pa niya. Sumala pa sa Presidente, samtang naglisod ang ubang nasod kon unsaon nga mahimong epektibo ang ilang estratehiya batok sa korupsyon, nagmalampusong napatuman sa Pilipinas ang mga inisyatibo niini batok sa korupsyon. (ATR/PCOO/PIA9-Zamboanga del Norte

Coloma nanguna sa inagurasyon sa National Printing Office Operations alang sa pagprinta sa automated official ballots

By: Mary May A. Abellon

DIPOLOG CITY,JAN. 30 (PIA)--- Ang pagpangandam alang sa 2013 nasyonal ug lokal nga eleksyon kay ginasugdan pinaagi sa pormal nga pagbukas sa National Printing Office’s operations alang sa pagprinta sa automated official ballots. 

Presidential Communications Operations Office Secretary Herminio “Sonny” Coloma, Jr. inubanan ni NPO Director Emmanuel Andaya ug Commission on Elections (COMELEC) chair Sixto Brillantes sa seremonyas  nga usa ka marka alang sa pagsugod sa  nasyunal nga kagamhanan nga opisyal nga  printing press sa tinguha nga muprinta ug 52 million nga balota sa sunod tulo ka bulan alang sa May 2013 eleksyon. 

Ang ribbon cutting ug blessing ceremonies kay gihimo ngadto sa NPO headquarter’s basement area  sa may Epifanio delos Santos Avenue (EDSA), Quezon City.

Sa iyang pahayag, subling gidayeg ni Coloma and pagtambayayong sa COMELEC ug NPO para masiguro ang limpyo, mayo ug saktong eleksyon pinaagi sa pagpanday ug pagkabaton niining “world class printing facility” sa automated ballots ug laing government forms nga matod  pa niya kay makalikay sa pag-usisa gikan sa publiko gumikan kay kini gihimo “abri ug klaro nga pamaagi.”

Gi awhag niya ang ubang katambayayong  sama sa Parish Pastoral Council for Responsible Voting sa pagpangulo ni Henrietta De Villa ug mga miyembro sa media nga musalmot niining pagtinabangay para masiguro ang eleksyon karong tuiga nga usa ka hapsay ug makatuuhang eleksyon. 

“Kami nagatan-aw sa mabungahong panagtimbayayong kaninyong tanan para masiguro nato nga karong umaabot nga eleksyon sa Mayo 2013 kay mahimo nga kato-uhan, tinuod ug madawat sa atong mamayang Pilipinhon,” asoy ni Coloma.

Sa iyang welcome remarks, gi publikar ni Andaya ang NPO’s automated ballot printing office  isip parte sa ahensya batok sa kato-uhang eleksyon.

“Karon, gusto namo ibutyag sa mga katawhang Pilipino nga ang National Printing Office kay muhatag sa iyang dakong parte sa pagdumala sa credible elections. Kami naga andam ug mayo para sa pag-prenta sa mga 2013 nga balota,” gibutyag ni Andaya. 

Para sa iyang parte, gitawag ni Brillantes  ang pormal nga pagbukas sa automated ballot printing office isip “pagsugod sa atong electoral processes.”

Ang National Printing Office kay nahimo ngadtong 1987 ni Presidente Corazon Aquino pinaagi sa pagpirma sa Executive Order 285. Kini maong executive order nagrepaso sa General Services Administration ug gi-usa ang Government Printing Offices ug ang printing offices sa Philippine Information Agency ngadto sa National Printing Office sa pagka karon. Kining opisinaha kay ubos sa Office of the Press Secretary. Gikan atong higayuna usa na ka tahas sa ahensya ang pagprenta sa nagkalain-laing porma ug dokumento sa gobyerno apil ang mga opisyal nga balota ug materyales sa pampublikong impormasyon.

Ang automated ballot printing office kay gitukod sa presyo nga P30-milyones gikan sa kaugalingong panudlanan sa NPO para sa paglambo sa inprastraktura ngadto sa basement area sa NPO and P780-milyones gikan abang ug pagprenta nga kontrata  gisulod sa NPO, Holy Family Inc., ug Canon Marketing para sa paggamit ug posible nga pagpalit sa tulo ka Canon Color Stream series printers, ang pinaka  nag-una sa nga printing machine sa kalibutan, matod pa sa NPO Assistant Director Raul Nagrampa.

Gi-asoy pa ni Nagrampa  nga kung mahimong operational na gayod, ang mga “printer” kay makahimo og usa ka milyon nga balota matag adlaw  sa 18-hour matag adlaw nga working schedule nga minanduan sa highly trained NPO ug Comelec staff. (MAA/PCOO/PIA9-Zambo Norte)      

Aquino midayeg sa gitampo sa NEDA alang sa kalamboan sa nasud

Ni Claro A. Lanipa

PAGADIAN CITY, 30 Jan (PIA) – Atol sa gipahigayong kasaulogan sa ika 40 nga anibersaryo sa National Economic Development Authority (NEDA) kagahapon (Martes), gidayeg ni Presidente Benigno S. Aquino III ang gitampo sa maong ahensiya sa pagpalambo sa atong nasud.

Ang ekonomiya sa nasud miuswag, miingon ang Presidente sa iyang mensahe atol sa kasaulogan nga gipahigayon sa buhatan sa NEDA sa dakbayan sa Pasig.

Matod pa sa hepe ehekutibo nga samtang nagtubo ang ekonomiya, ang NEDA kinahanglan maningkamot pa gayud aron makab-ot nato ang malahutayong ug halapad pag-uswag alang sa kaayohan sa mga Pilipino.

“Aduna kitay daghan pang buluhaton, ug ang NEDA mahimong mas importanteng kaabag sa umaabot nga mga katuigan. Kon gusto kita maseguro nga ang atong mag tinguha mabunga ug maayong resulta, ang atong sunod nga lihok kinahanglan banabanaon,” miingon siya.

“Nagsalig kami kaninyo. Karon, mohangyo ako sa matag usa kaninyo aron maningkamot pa gayud sa pagpatuman sa inyong mga katungdanan,” dugtong pa sa Presidente.

Aron molahutay kining kalamboan, ang kagamhanan kinahanglan mopadayon sa mga panglimbasog sa pagkab-ot sa tumong, wagtangon ang korupsyon, ug ipauswag ang pag-indigay sa nasud sa kalibutanong merkado.

Ang kagamhanan mopadayon usab sa pagpamuhunan sa human capital pinaagi sa edukasyon, maayong panglawas, ug ubang mga serbisyo, dugang pa niya ang administrasyon motutok usab sa ubang mga sekta alang sa pag-uswag ug magpahiluna sa mga inisyatibo nga makapatuboy ug kalamboan.

Mipadayag usab sa Presidente ang iyang kalipay ngadto sa NEDA  sa pagpahinungud niini sa pagpatuman sa ilang mando ug nagsilbi sa katawhan nga walay sagol politika o pagpatuboy sa kaugalingon. (PND/CAL/PIA9)