Pagluwat sa katungdanan sa mga opisyales sa NDRRMC, DTI ug PhilHealth sulagma lang, matod sa Palasyo

Ni Alfonso T. Ruda

DIPOLOG CITY, JAN. 16(PIA)--- Gipahayag sa Malakanyang nga ang sunud-sunod nga pagluwat sa katungdanan sa mga opisyales sa National Disaster Risk Reduction and Management  Council (NDRRMC), Dept. of Trade and Industry (DTI) ug Philippine Health Insurance Corp.,(Philhealth) sulagma lang.

Sa press briefing, gipahayag ni Deputy Presidential Spokesperson Abigail Valte, nga ang pagluwat sa katungdanan ni NDRRMC Exec. Director Benito Ramos, DTI Undersec. Cristino Panlilio ug Phealth President ug Chief Exec. Officer Eduardo Banzon nagumikan sa ilang personal nga kagustohan nga padayong makalihok ug bag-ohon ang dalan sa ilang kinabuhi.

“Dunay mga panahon nga kinahanglanon sa usa ka tawo ang padayong paglihok ug bag-ohon ang dalan sa iyang kinabuhi,” matod pa ni Valte. Si Ramos, kinsa misumiti sa iyang ikatulong resignation letter kang Defense Sec. Voltaire Gazmin niadtong miaging semana, “nagpahayag ug intensiyon nga mobiya sa serbisyo gumikan sa personal nga rason aron atimanon ang iyang masakitong asawa, kinsa nag-antus sa komplikasyon gawas sa diabetes.”

Si Panlilio kinsa mitunol na usab sa iyang resignation letter niadto pang miaging bulan aron mobalik sa pribadong kinabuhi, misugot nga magpabilin una sa serbisyo hangtud karong adlawa. Si Banzon, sa laing bahin,  nga misumiti sa iyang resignation letter sa Philhealth Board nakahukom nga mobiya sa serbisyo gumikan sa personal nga hinungdan.

“Nagtoo ko nga sulagma lang ning nagkadungan sila ug luwat sa serbisyo sa gobyerno,” matod pa ni Valte.

Gihatagan ug punto ni Valte nga sanglit duna may nagpadayong ban batok sa pagkuha ug mga bag-ong opisyal ug personahe sa bakanteng posisyon sa gobyerno gumikan sa taliabot nga piniliay sa Mayo, gikonsidera karon sa Malakanyang ang pagkuha ug mga tawo gikan sa sulod sa ahensiya aron temporaryong ibutang sa nabakanteng posisyon.

“Sanglit dunay election ban ug appointment ban, si Health Secretary Ona una ang temporaryong himoong Officer-in-Charge sa Philhealth, puli kang Banzon,” matopd pa ni Valte.

Midugang pa si Valte nga iya usab nga tan-awon ug maayo kon kinsay ibutang sa posisyon nga biyaan nila ni Panlilio ug Ramos.(ATR/PCOO/PIA9-Zambo Norte)