Ni Alfonso T. Ruda
DIPOLOG CITY, DEC.
6(PIA)---Gi-aprobahan
na sa Board of Trustees sa Government Service Insurance System(GSIS) ang
paggahin ug 1.8 bilyones ka pesos isip Christmas cash gift para sa 219 mil ka
mga old age, retirement ug disability pensioners nga padayong nagdawat ug binulang
pensiyon hangtud sa Disyembre 15, 2012.
Matod
pa ni GSIS President ug General manager Robert Vergara, ang pinaskuhang kas ideposito
sa GSIS e-card account sa mga pensiyonado sa di pa modangat ang pasko.
Ang
mga pensiyonado kang kansang cash gift niadtong 2011 miabot ug 10 mil pesos
paubos, makadawat karong tuiga ug pinaskuhan nga katumbas sa ilang binulang
pensiyon, samtang ang mga pensiyonado nga nakadawat sobra sa 10 mil pesos
niadtong 2011 makadawat karong tuiga ug katumbas sa ilang binulang pensiyon
apan dili molapas sa 12,600 pesos.
Samtang
giklaro sa GSIS nga dunay mga pensiyonado nga dili kwalipikadong makadawat ug
pinaskuhang kas. Sila mao ang mga survivorship pensioners, dependent pensioners
ug mga retirees nga nakakas-ag dawat sa ilang pensiyon ug magdawat pa lang sa ilang binulang pensiyon
paglapas sa Disyembre 2012.
Lakip
usab sa dili makadawat ug pinaskuhang kas karong tuiga mao kadtong bag-ong nagretiro
sa serbisyo gikan sa 2008 hangtud sa 2012, diin makadawat pa lamang sila ug
pinaskuhan, lima ka tuig gikan sa ilang pagretiro.
Mao
usab kini ang mahitabo niadtong mga membro nga nabulag sa serbisyo gikan sa
2006 hangtud sa 2012 sa wa pa moabot sa pangidaron nga 60 anyos, ug kwalipikado
nang makadawat pinaskuhang kas sa higayong mahimo na silang regular pensioners
sulod sa lima ka tuig, ug mga pensiyonado ilalom sa Akta Republika 7699 (Portability
Law) nga nagdawat sa ilang regular nga pro-rata pension.
