Malakanyang, kompiyansang makab-ot ang gitinguhang rice self-sufficiency sa 2013

Ni Alfonso T. Ruda

DIPOLOG CITY, SEPT. 6(PIA)---Ang Kagamhanang-Aquino kompiyansa gihapon nga makab-ot ang ilang tinguhang rice self sufficiency sa 2013, pinaagi sa pagpatuman sa nagkalain-laing proyekto para sa mga mag-uuma sa Luzon kang kansang mga pananom nadaot gumikan sa baha ug kusog nga ulan nga dala sa bagyo ug hanging-habagat, sumala pa sa usa ka opisyal sa Malakanyang.

Ang pahayag giluwatan ni Presidential spokesperson Edwin Lacierda sa regular press briefing sa Malakanyang niadtong Miyerkules taliwala sa balitang migawas kabahin sa pag-angkon sa Asian Development Bank(ADB) nga dili makab-ot sa Pilipinas  ang iyang target nga rice self sufficiency sunod tuig gumnikan sa problema sa inprastaktura.

Ang Department of Agriculture (DA) nanghatag na ug libreng  binhing-humay ug crop insurance sa mga mag-uuma kang kansang pananom nadaot sa gumikan sa baha ug kusog nga ulan dala sa bagyong Gener ug Ferdie ug hanging-habagat sa tuig 2012.

“Gihatagan ang mga mag-uuma ug libreng certified seeds ug libreng crop insurance. Naglaum kami nga maka-ani na sa bulan sa Disyembre kadtong nagtanom karong panahona o pagkahuman sa habagat. Busa kami, ug si Agriculture Sec. Proceso Alcala, kompiyansa nga makab-ot ang rice self-sufficiency sa 2013,” matod pa ni Lacierda.

Sayo niini, si Alcala miingon  nga ang binuhatan sa sektor sa Agrikultura misaka ug usa ka porsiento sa unang 6 ka bulan sa tuig. Aron pagbawi sa nawalang pananom, matod pa niya, ang DA midasig sa mga mag-uuma nga magtanom dayon sa  ikatulong tanom sa humay pagkahuman sa kasamtangang ani.

Midugang pa si Alcala nga dili na kinahanglang mo-angkat pa ug dugang bugas-humay karong tuiga tungod kay dunay supisyenteng supply niini. Gani, matod pa niya, ang ani sa humay sa unang unom ka bulan niining tuiga miabot man ug 7.89 metriko tonelada, nga mas taas ug 4.2 porsiento kay ani sa miaging tuig nga miabot lamang ug 7.58 metriko tonelada. Mahayag usab ang produksyon sa humay sa umaabot nga ikaduhang semester, base sa survey sa nagbarog nga humay ug plano sa pagtanom sa mga mag-uuma, matod pa sa Bureau of Agricultural Statistics

Sumala pa sa pagbanabana sa  DA-BAS, ang produksyon sa humay sa ikatulo ug katapusang quarter posibling moabot sa 3.56 metriko tonelada ug 6.36 MT alang sa kinatibuk-an ani nga 9.93 metriko tonelada.

Sa kinatibuk-an, ang ani sa humay sa 2012, posibling moabot sa 17.8 metriko tonelada nga makonsiderang laing record harvest nga 6.7 porsientong mas taas kay sa ani sa miaging tuig nga 16.68 metriko tonelada.(ATR/PCOO/PIA9-Zambo Norte)

Bidding sa P319-M nga development project sa tugphanan sa Tacloban ug Dipolog gitakda sa DOTC

Ni Alfonso T. Ruda

DIPOLOG CITY, SEPT. 5(PIA)… Ang Department of Transportation and Communication nakatakdang magpahigayon ug bidding para sa pagdevelop sa duha ka tugpahanan sa nasod, ang tugpahanan sa Dakbayan sa Tacloban ug Dipolog sa kantidad nga mokabat ug 319-milyones ka pesos.

Sa Invitation to Bid, ang ika-16 sa serye sa ITBs nga gipagawas sa DOTC sukad niadtong Hulyo niining tuiga,  nga namantala niadtong Biyernes, ang Departamento nagkanayon nga ang pagpa-anindot sa duha ka tugpahanan maoy katumanan sa gisaad ni Presidente Benigno Aquino III nga himoong moderno ang pasilidad sa sistema sa transportasyon sa nasod.

“Samtang ang Pilipinas nakasinati karon ug bag-ong kadasig sa klima sa patigayon, gihatagan ni Presidente Aquino ug prayoridad ang pagpabarog ug inprastaktura aron mapadayon ang interes sa dugang puhonan sa lokal nga merkado. Sa iyang State of the Nation Address, ang Presidente misaad  nga idevelop ug himoong modern ang mga tugpahanan,” sumala pa sa DOTC.

Ang pagpa-anindot sa tugpahanan sa Tacloban ug Dipolog maoy tipik sa Master Plan nga gitakda sa kanhing Kalihim sa DOTC nga si Mar Roxas aron himoon ang transportasyon sa kahanginan sa nasod nga komportable, barato, kasaligan, episyente ug luwas.

Ang tugpahanan sa Tacloban gigahinan ug 251.6 milyones ka pesos samtang 66.9 milyones ka pesos usab ang gigahin alang sa Dipolog.

Partikular nga tutokan sa Tacloban ang paghimo ug bag-ong apron ug taxiway, paghuman sa north-east shore protection nga dunay shoulder grade correction, paghimo ug drainage system nga dunay box culvert, ug ang pagtukod ug temporaryong  transisyon.

Samtang sa laing bahin, ang 66.9 milyones ka pesos nga gigahin alang sa tugpahanan sa Dakbayan sa Dipolog, gamiton sa pagpalapad sa apron, pagpadako sa taxiway, pagtukod ug rampa, paghimo ug panalipod o depensa sa suba nga dunay abaga, pagbutang ug box culvert ug drainage system.

Ang tugpahanan sa Tacloban mao ang ika-walong pinaka-busy nga tugpahanan sa nasod sa pagkakaron, diin niadtong tuig 2011sa labing unang higayon, nakarehistro kini ug milestone pinaagi sa pag-abot ug 1 ka milyon ka mga pasaherong naserbisyohan sa maong tuig.

Sa unang unom ka bulan sa 2012, ang tugpahanan sa Tacloban nakasilbi na ug kinatibuk-ang 608,769 ka mga pasahero.

Ang tugpahanan sa Dipolog, sa laing bahin, nakaserbisyo usab ngadto sa 165,163 ka mga pasahero niadtong 2011 ug gibana-banang moabot sa 200 mil ka mga pasahero niining tuiga.

Ang duha ka mga tugpahanan parehong nagserbisyo ug mga biyahe padulong ug pabalik sa Manila ug Cebu.

Ang tugpahanan sa Dipolog nakitang dunay dakong papel sa paglambo sa patigayon ug turismo dili lamang sa Dakbayan sa Dipolog ug Dapitan klundili, hangtud na sa tibuok lalawigan sa Zamboanga del Norte ug silangang mga lalawigan.

Pipila sa mga lugar nga paboritong adtuan sa mga lokal ug langyawng turista mao ang Dakak Beach, Dapitan Bay, mga isla sa Alguay ug Silinog, white water adventure sa Sungkilaw Falls ug Cogon jungle adventure.

Gipasalig sa DOTC nga ang pagpalambo sa duha ka tugpahanan ipaagi sa bukas ug transparent bidding diin ang tanang intresado ug kuwalipikadong mga bidders  mahatagan ug kahigayonang moapil sa bidding.

Ang DOTC magsugod na ug isyo ug bidding documents gikan sa Agosto 31, 2012 hangtud sa Septyembre 19, 2012. Kasunod niini, ang Bids and Awards Committee sa Departamento magpahigayon usab ug pre-bid conference sa Septyembre 11, 2012. Gitakda usab sa DOTC ang pagbukas sa bidding sa 2 ka tugpahanan sa Sepoteyembre 24, 2012.(ATR/PCOO/PIA9-Zambo Norte)